តំណាងរាស្រ្ដរបស់សហភាពអឺរ៉ុបចំនួន២នាក់ មកពីប្រទេសអ៊ីតាលី ត្រូវគេរកឃើញមានផ្ទុកវីរុសរលាកផ្លូវដង្ហើម ឬវីរុសកូរ៉ូណា ហើយត្រូវគេដាក់ឲ្យនៅដោយឡែក ហើយអនុញ្ញាតឲ្យពួកគាត់ធ្វើការពីចម្ងាយ ឬតាមប្រព័ន្ធអនឡាញជាដើម។
បណ្ដាញផ្សព្វផ្សាយ បានឲ្យដឹងថា រហូតមកដល់ពេលនេះ នៅក្នុងប្រទេសអ៊ីតាលី កំពុងតែឆ្លងរាលដាលវីរុសកូរ៉ូណា ឬកូវីដ-១៩យ៉ាងខ្លាំង បន្ទាប់ពីប្រទេសចិន។ រីឯអាជ្ញាធរ នៃប្រទេសអឺរ៉ុបមួយនេះ បានដាក់ប្រជាពលរដ្ឋចំនួន១៦លានដាក់ឲ្យនៅដាច់ដោយឡែក។
ទោះជាយ៉ាងណាក៏ដោយ សមាជិកសភាអឺរ៉ុបចំនួន២នាក់ មកពីប្រទេសអ៊ីតាលី ត្រូវគេធ្វើតេស្ដរកឃើញវីរុសរលាកផ្លូវដង្ហើម់ប្រភេទថ្មី ឬវីរុសកូរ៉ូណា (Covid-19) ។ តំណាងរាស្រ្ដទាំង២នាក់នោះ គឺលោក Alberto Cirio ត្រូវបានរកឃើញឆ្លង កាលពីថ្ងៃទី ៨ខែមីនា។ រីឯលោក Nicola Zingaretti បានរកឃើញឆ្លងវីរុសផ្លូវដង្ហើម កាលពីថ្ងៃទី៧ ខែមីនា ។ តំណាងរាស្រ្ដទាំង២នាក់នេះ ត្រូវបានកាត់ផ្តាច់ឲ្យនៅដាច់ដោយឡែក ហើយគេមិនអនុញ្ញាតឲ្យទៅចូលរួមរាល់សកម្មភាពរបស់សភាអឺរ៉ុបនោះឡើយ ដោយធ្វើការពីចម្ងាយតាមអនឡាញតែប៉ុណ្ណោះ។ ជាមួយគ្នានេះដែរ ក្រសួងសុខាភិបាលបារាំងក៏បានសម្រេចចេញច្បាប់ហាមប្រាមពលរដ្ឋរបស់ខ្លួន ប្រមូលផ្តុំគ្នា លើសពី១ពាន់នាក់។ ការហាមប្រាមនោះបានធ្វើឲ្យប៉ះពាល់យ៉ាងខ្លាំងដល់វិស័យជាច្រើន នៅក្នុងប្រទេសបារាំង រួមមាន វិស័យបាលទាត់ ជាដើម ព្រោះវិស័យនេះមានអ្នកចូលទស្សនារាប់ម៉ឺននាក់ នៅរៀងរាល់ចុងសប្តាហ៍។ បម្រាមនេះក៏ជាវិធានការទប់ស្កាត់ការឆ្លងរាលដាល នៃវីរុសផងដែរ៕