លោក Joe Biden បេក្ខភាពប្រធានាធិបតីអាមេរិក មកពីគណបក្សប្រជាធិបតេយ្យ កំពុង ស្វះស្វែងរកសំឡេងគាំទ្រដំណាក់កាលចុងក្រោយ ដើម្បីទទួលបានសិទ្ធិជាបេក្ខភាពតំណាងឲ្យគណបក្សប្រជាធិបតេយ្យ ស្រាប់ចូលរួមបោះឆ្នោតប្រជែងជាមួយប្រធានាធីបតី លោក ដូណាល់ ត្រាំ នៅខែវិច្ឆិកាខាងមុខនេះ។
បេក្ខភាពប្រធានាធិបតី លោក Joe Biden បានប្រកាស នៅក្នុងពេលឃោសនាស្វែងរកសំឡេងគាំទ្រថា ប្រសិនបើលោកជាប់ឆ្នោតជាប្រធានាធិបតីអាមេរិក នាពេលខាងមុខនេះ លោកនឹងជ្រើសរើសស្ត្រី ឲ្យធ្វើជាអនុប្រធានាធិបតី។ ស្ត្រីក៏មានសមត្ថភាពគ្រប់គ្រាន់ ក្នុងការដឹកនាំប្រទេសផងដែរ។
នៅក្នុងឃោសនាស្វែងរកសំឡេងគាំទ្រ នាដំណាក់កាលដំបូង គេសង្កេតឃើញស្រ្ដីអាមេរិកាំង ចំនួន៦នាក់ បានចូលរួមប្រកួតប្រជែងបេក្ខភាពតំណាងឲ្យគណបក្សប្រជាធិបតេយ្យ។ បេក្ខនារីទាំងនោះ មានសមាជិកព្រឹទ្ធសភា លោកស្រី Elizabeth Warren, Amy Klobuchar, Kamala Harris, Kirsten Gillibrand និង Tulsi Gabbard ហើយលោកស្រី Marianne Williamson ។ ប៉ុន្ដែពួកគាត់ទាំង៦នាក់ មិនទទួលបានសំឡេងគាំទ្រច្រើន ដើម្បីបន្ដដំណើរការឃោសនាទៅមុខទៀតបានឡើង ទើបពួកគាត់ដកខ្លួនថយវិញ។
ទោះជាយ៉ាងណា រហូតមកដល់ពេលនេះ លោក Joe Biden អាយុ៧៧ឆ្នាំ និងលោក Sanders អាយុ៧៨ឆ្នាំ បានផ្អាកសកម្មភាពឃោសនាបោះឆ្នោត នៅតាមទីសាធារណៈ ដោយសារ ការឆ្លងរាលដាល នៃកូវីដ-១៩ កាន់តែខ្លាំងឡើង នៅអាមេរិក។ ប៉ុន្ដែពួកគាត់ទាំង២នាក់បែរជាបង្វែរមកឃោសនា បោះឆ្នោត តាមកញ្ចក់ទូរទស្សន៍ ផ្សាយជំនួសវិញ។
រីឯលោក Biden មានសង្ឃឹមច្រើនជាង លោក Sanders ហើយអាចនឹងក្លាយជាបេក្ខភាពតំណាងឲ្យគណបក្សប្រជាធិបតេយ្យ៕
