បើគិតចាប់តាំងពីការផ្ទុះឡើង នៃវីរុសដ៏កាចសាហាវ នៅក្នុងទីក្រុងវូហាន ខេត្តហ៊ូប៉ី នាភាគ កណ្ដាល ប្រទេសចិន នាអំឡុងខែធ្នូ ឆ្នាំ២០១៩ រហូតមកដល់វេលាម៉ោង៧យប់ (ម៉ោងនៅ កម្ពុជា) ថ្ងៃទី២២ ខែមីនា ឆ្នាំ២០២០ នេះ វីរុសកូវីដ-១៩ បានរាលដាលដល់ប្រទេស និងដែនដី ចំនួន១៨៨ នៅជុំវិញពិភពលោក ដោយមានអ្នកឆ្លង ចំនួន៣១៥៧៩៦នាក់ មានអ្នកជាសះ ស្បើយចំនួន៩៥៨៩២នាក់ និងមានអ្នកស្លាប់១៣៥៩៤នាក់។
ប្រទេសចិនជាទីផ្ទុះឡើង នៃវីរុសកូរ៉ណា ឬកូវីដ-១៩ មានអ្នកឆ្លងចំនួន៨១០៥៤នាក់ អ្នកជាសះស្បើយចំនួន៧៧២៤៤០នាក់ និងមានអ្នកស្លាប់ចំនួន៣២៦១នាក់។ ទោះជាយ៉ាងណា រហូតមកដល់ពេលនេះ នៅទូទាំងប្រទេសចិន មានករណីឆ្លងថ្មីតែ៤៦នាក់ប៉ុណ្ណោះ ហើយករណីថ្មីគឺជាជនបរទេស។ ករណីនេះ គេអាចនិយាយបានថា ចិនអាចគ្រប់គ្រងជាបណ្ដោះអាសន្នបានទាំងស្រុង។
ក្រោយពេលចិនគ្រប់គ្រងស្ថានការណ៍បានទាំងស្រុងនោះមក បែរជាបណ្ដាប្រទេស នៅតំបន់អឺរ៉ុប និងអាមេរិក បានផ្ទុះឡើងយ៉ាងខ្លាំង។ នៅតំប់អឺរ៉ុប ប្រទេសអ៊ីតាលីមានអ្នកឆ្លងកើនឡើង រហូតដល់៥៣៥៧៨នាក់ អ្នកជាសះស្បើយចំនួន៦០៧២ និងស្លាប់៤៨២៥នាក់។ អ៊ីតាលីជាប្រទេសដែលមានអ្នកឆ្លងច្រើនបំផុត បន្ទាប់ពីចិន តែប្រទេសនេះមានអ្នកស្លាប់ច្រើនជាងចិន។
ជាមួយគ្នានេះដែរ ប្រទេសអេស្ប៉ាញក៏មានអ្នកឆ្លងច្រើនជាងគេ បន្ទាប់ពីប្រទេសអ៊ីតាលី ដោយមានអ្នកឆ្លង២៨៥៧២នាក់ (មានអ្នកឆ្លងថ្មី) មានអ្នកជាសះស្បើយ២១២៥ និងស្លាប់១៧២៥នាក់។ 
ដោយឡែកមហាអំណាចសេដ្ឋកិច្ចទី១របស់ពិភពលោក (អាមេរិក) មានអ្នកឆ្លងចំនួន២៦៩០០នាក់ មានអ្នកជាសះស្បើយ១៧៨នាក់ និងមានអ្នកស្លាប៣៤៨នាក់៕
