រដ្ឋធានីវិលនីស (Vilnius)៖ សង្គ្រាមរបស់មេដឹកនាំវិមានក្រឹមឡាំង នៅក្នុងប្រទេសអ៊ុយក្រែន បានជំរុញឲ្យប្រទេសនៅតំបន់អឺរ៉ុបខាងជើង និង អាត្លង់ទិកខាងជើង រត់ទៅដាក់ពាក្យស្នើសុំចូលជាសមាជិករបស់អង្គការណាតូ ខណៈឥឡូវនេះ ប្រធានាធិបតីតួកគី កំពុងតែគាំទ្រដល់បេក្ខភាពរបស់ប្រទេសស៊ុយអែត ចូលទៅក្នុងប្លុកយោធាមួយនេះ រហូតធ្វើឲ្យវិមានក្រឹមឡាំងរបស់លោកប្រធានាធិបតី ពូទីន កាន់តែព្រួយបារម្ភ អំគ្រោះថ្នាក់យ៉ាងពិតប្រាកដ មកលើប្រទេសរុស្ស៊ី ប្រសិនបើអ៊ុយក្រែន ដើរចូលទៅក្នុងអង្គការសម្ពន្ធមិត្តយោធារបស់លោកខាងលិច។
សារព័ត៌មាន BBC បានចេញផ្សាយ កាលពីព្រឹក ថ្ងៃអង្គារ ទី១១ ខែកក្កដា ថា មេដឹកនាំកំពូលៗរបស់ប្រទេសជាសមាជិករបស់អង្គការណាតូ បានអញ្ជើញទៅជួបជុំគ្នា នៅក្នុងរដ្ឋធានីវិលនីស ប្រទេសលីទុយអានី ដើម្បីចូលរួមនៅក្នុងកិច្ចប្រជុំកំពូលរបស់អង្គការនេះ នឹងត្រូវចាប់ផ្ដើមឡើង រយៈពេល២ថ្ងៃ ចាប់ផ្ដើមពីថ្ងៃអង្គារនេះ។ រីឯសមាជិកភាពរបស់ប្រទេសអ៊ុយក្រែន ចូលរួម នៅក្នុងអង្គការសម្ពន្ធភាពយោធាដ៏ខ្លាំងក្លារបស់ពិភពលោកមួយនេះ នឹងក្លាយជាកម្រិតចម្បង នៅក្នុងរបៀបវារៈ នៃកិច្ចប្រជុំកំពូលនេះ។ ស្របគ្នានេះ សមាជិករបស់អង្គការណាតូ បានឯកភាពគ្នា ថា អ៊ុយក្រែន នឹងមិនទាន់អាចក្លាយជាសមាជិករបស់ប្លុកយោធារបស់លោកខាងលិចបានទេ។ បញ្ហានេះក៏ដោយសារតែអ៊ុយក្រែនកំពុងតែស្ថិតក្នុងសង្គ្រាមនៅឡើយ ហើយមានការភ័យខ្លាចយ៉ាងខ្លាំង អាចនឹងនាំឱ្យមានជម្លោះ ដោយផ្ទាល់ជាមួយប្រទេសរុស្ស៊ី ដែលមហាអំណាចនុយក្លេអ៊ែរដ៏ខ្លាំងក្លាបំផុតមួយរបស់ពិភពលោក ផងដែរ។
លោក វ៉ូឡូឌីមៀរ ហ្សេឡែនស្គី (Volodymyr Zelensky) ប្រធានាធិបតីអ៊ុយក្រែន បានបញ្ជាក់ ថា គាត់ខ្លួនឯង មិនរំពឹង ថា អ៊ុយក្រែន នឹងក្លាយជាសមាជិករបស់អង្គការណាតូ រហូតដល់ក្រោយការបញ្ចប់សង្គ្រាមនេះ។ ប៉ុន្តែលោកប្រធានាធិបតី ចង់ឱ្យកិច្ចប្រជុំកំពូលរបស់អង្គការណាតូ ផ្តល់«សញ្ញាឲ្យប្រាកដ» សម្រាប់សមាជិកភាពរបស់អ៊ុយក្រែន នៅក្នុងអង្គការយោធាមួយនេះ។
ប្រទេសជាសមាជិកមួយចំនួនរបស់អង្គការណាតូ នៅតំបន់អឺរ៉ុបខាងកើត កំពុងតែជំរុញឱ្យពន្លឿនដល់សមាជិកភាព នៃប្រទេសជិតខាងរបស់ខ្លួន។ ប៉ុន្តែបណ្ដាប្រទេសជាសមាជិកផ្សេងៗទៀតរបស់អង្គការយោធាមួយនេះ មានទាំង សហរដ្ឋអាមេរិក និង អាល្លឺម៉ង់ ផងដែរ ត្រូវបានគេមើលឃើញ ថា កំពុងតែស្ទាក់ស្ទើរយ៉ាងខ្លាំង។
ដោយឡែក លោក ឌីមីទ្រី ប៉េស្កូវ (Dmitry Peskov) អ្នកនាំពាក្យ វិមានក្រឹមឡាំងរបស់ប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) បានព្រមាន កាលពីថ្ងៃចន្ទ ថា សមាជិកភាពរបស់អ៊ុយក្រែន នៅក្នុងអង្គការណាតូ នឹងបង្កឲ្យមានផលវិបាកជាអវិជ្ជមាន បំផុត សម្រាប់ស្ថាបត្យកម្មសន្តិសុខរបស់រុស្ស៊ី។ សកម្មភាពបែបនេះ នឹងបំផ្លាញដល់ការកសាងសន្ដិសុខប្រហែលពាក់កណ្តាល ព្រោះអង្គការយោធាមួយនេះ ចូលមកដល់ទ្វីបអឺរ៉ុប កាន់តែជ្រៅ ដោយការរំកិលព្រំដែនណាតូមកដាក់ជាប់ជាមួយនឹងរុស្ស៊ី។
លោក ឌីមីទ្រី ប៉េស្កូវ បានបញ្ជាក់ ថា «សមាជិកភាពរបស់អ៊ុយក្រែន នឹងបង្ហាញអំពីគ្រោះថ្នាក់យ៉ាងពិតប្រាកដ និង គំរាមកំហែងយ៉ាងធ្ងន់ធ្ងរបំផុត មកលើប្រទេសរបស់យើង។ ករណីនេះ យើងនឹងត្រូវតែបង្ហាញប្រតិកម្មយ៉ាងម៉ឺងម៉ាត់ និង ច្បាស់លាស់»។
អង្គការណាតូ បានបញ្ជាក់ ថា ស៊ុយអែត នឹងគាំទ្រយ៉ាងសកម្មនូវកិច្ចខិតខំប្រឹងប្រែង សម្រាប់ពង្រឹងដំណើរការ ចូលជាសមាជិក នៃសហភាពអឺរ៉ុបរបស់តួកគីឡើងវិញ។ សកម្មភាពនេះ នឹងរួមបញ្ចូលទាំងការធ្វើទំនើបភាវូបនីកម្ម សម្រាប់សហភាពគយអឺរ៉ុប-តួកគី និង សេរីភាវូបនីយកម្ម លើទិដ្ឋាការ។
ចាប់តាំងពីសង្គ្រាមរបស់រុស្ស៊ី បានផ្ទុះឡើង នៅលើទឹកដីរបស់អ៊ុយក្រែន នៅថ្ងៃទី២៤ ខែកុម្ភៈ ឆ្នាំ២០២២ រហូតមកដល់ពេលនេះ លោក រេសេប តាយយីប អេដូហ្គេន (Recep Tayyip Erdogan) ប្រធានាធិបតីតួកគី បានដើរតួនាទីយ៉ាងពិសេស ក្លាយជាមេដឹកនាំមួយរូបរបស់អង្គការណាតូ ដែលមានឥទ្ធិពល ទៅលើក្រុងមូស្គូ។ លោកប្រធានាធិបតី បានក្លាយជាអាជ្ញាកណ្តាល ផ្ដួចផ្ដើមគំនិតលើកិច្ចព្រមព្រៀង នាំគ្រាប់ធញ្ញជាតិ ចេញពីសមុទ្រខ្មៅ កាលពីឆ្នាំ២០២២។ កិច្ចព្រមព្រៀងនេះ អនុញ្ញាតដល់ប្រទេសអ៊ុយក្រែន អាចនាំផលិតផលកសិកម្ម ចេញពីកំពង់ផែរបស់ខ្លួន នៅសមុទ្រខ្មៅ ទៅកាន់ទីផ្សាររបស់ពិភពលោក។
រុស្ស៊ី តែងតែគំរាមកំហែងដកខ្លួន ចេញពីកិច្ចព្រមព្រៀង នាំគ្រាប់ធញ្ញជាតិ ចេញពីសមុទ្រខ្មៅ ជាញឹកញាប់ ប៉ុន្ដែមេដឹកនាំតួកគី នៅតែអាចថែរក្សាកិច្ចព្រមព្រៀងនេះ ឲ្យនៅរស់បន្ដទៀត។ លើសពីនេះ តួកគី ថែមទាំងបានធ្វើឲ្យវិមានក្រឹមឡាំង ខឹងសម្បាយ៉ាងខ្លាំង ពាក់ព័ន្ធនឹងការផ្គត់ផ្គង់យន្តហោះគ្មានមនុស្សបើក ឬ ដ្រូន ប្រដាប់ដោយអាវុធ ជួយដល់កងទ័ពអ៊ុយក្រែន យកទៅប្រើប្រាស់ វាយប្រហារ ទៅលើកម្លាំងទាហានរបស់រុស្ស៊ី។
ក្រុមមន្ត្រីរុស្ស៊ី កាលពីចុងសប្ដាហ៍កន្លងទៅនេះ ក៏បានបន្ដខឹងសម្បាយ៉ាងខ្លាំង ក្រោយពេលតួកគី បានផ្លាស់ប្តូរឥរិយាបថដ៏គួរឱ្យភ្ញាក់ផ្អើលមួយ ហើយបានអនុញ្ញាតឱ្យអតីតមេបញ្ជាការយោធភូមិភាគចំនួន៥នាក់របស់អ៊ុយក្រែន ត្រូវបាននាំចេញពីទីក្រុងម៉ារីយ៉ូប៉ូល (Mariupol) ជិះយន្ដហោះ ត្រឡប់ទៅទីក្រុងកៀវ វិញ នៅចុងបញ្ចប់នៃដំណើរទស្សនកិច្ចរបស់ប្រធានាធិបតីអ៊ុយក្រែន លោក វ៉ូឡូឌីមៀរ ហ្សេឡែនស្គី។ ក្រោមលក្ខខណ្ឌនៃការដោះដូរអ្នកទោស កាលពីឆ្នាំ២០២០ រុស្ស៊ី មានការរំពឹង ថា ឈ្លើយសឹកទាំងនេះ នឹងបន្តស្ថិតក្នុងប្រទេសតួកគី រហូតដល់បញ្ចប់សង្គ្រាមនេះ៕