បើគិតត្រឹមវេលាម៉ោង៥ព្រឹក ថ្ងៃទី២៤ ខែមីនា ឆ្នាំ២០២០ (ម៉ោងនៅកម្ពុជា) បណ្ដាប្រទេស នៅក្នុងតំបន់អាស៊ីភាគអាគ្នេយ៍ ឬហៅកាត់ អាស៊ាន មានអ្នកឆ្លងវីរុសរលាកផ្លូវដង្ហើមប្រភេទថ្មី ឬវីរុសកូរ៉ូណា (កូវីដ-១៩) កើនឡើងរហូតដល់៤០៩០នាក់ ដោយមានអ្នកស្លាប់ចំនួន៩៩នាក់ និងអ្នកព្យាបាលបានជាសះស្បើយចំនួន៤៣២នាក់។
ក្នុងចំណោមបណ្ដាប្រជាជាតិអាស៊ាននោះ គឺប្រទេសម៉ាឡេស៊ីមានអ្នកឆ្លងរហូតដល់១៥១៨នាក់។ ក្នុងចំណោមអ្នកឆ្លងទាំងអស់ មានអ្នកឆ្លងថ្មីចំនួន២១២នាក់ អ្នកព្យាបាលបានជាសះស្បើយចំនួន១៥៩នាក់ និងស្លាប់ចំនួន៤នាក់។ រីឯប្រទេសថៃវិញ មានករណីឆ្លងថ្មី រហូតដល់ទៅ១២២២ ធ្វើឲ្យប្រទេសនេះមានចំនួនអ្នកឆ្លងកើនឡើងដល់៧២១នាក់ ក្នុងនោះ មានអ្នកជាសះស្បើយចំនួន៥២នាក់ និងស្លាប់ម្នាក់ផងដែរ។
ដោយឡែកឥណ្ឌូនេស៊ីវិញ មានអ្នកឆ្លងវីរុសកូវីដ-១៩ កើនឡើងរហូតដល់៥៧៩នាក់ ក្នុងនោះអ្នកជាសះស្បើយចំនួន៣០នាក់។ ប៉ុន្ដែប្រទេសនេះ មានអ្នកស្លាប់ដោយសារវីរុសកូវីដ-១៩ច្រើនជាងគេបំផុត នៅក្នុងតំបន់អាស៊ាន ដោយមានអ្នកស្លាប់កើនឡើងរហូតដល់៤៩នាក់។
ប្រទេសសិង្ហបុរី មានអ្នកឆ្លងថ្មីចំនួន៥៤នាក់ ធ្វើឲ្យចំនួនអ្នកឆ្លងកើនឡើងដល់៥៧៩នាក់ ហើយក្នុងចំណោមអ្នកឆ្លងវីរុសកូវីដ-១៩ទាំងនោះ មាន១៥២នាក់ព្យាបាលជាសះស្បើយ និង២នាក់បានស្លាប់។ រីឯប្រទេសហ្វីលីពីន មានអ្នកឆ្លងថ្មីចំនួន៨២នាក់ ធ្វើឲ្យចំនួនអ្នកឆ្លងកើនឡើង រហូតដល់៤៦២នាក់។ ប៉ុន្ដែក្នុងចំណោមអ្នកជំងឺទាំងនោះព្យាបាលបានជាសះស្បើយ ចំំនួន១៩នាក់ និងមានអ្នកស្លាប់កើនឡើង៣៣នាក់។
ដោយឡែក ប្រទេសវៀតណាមមានអ្នកឆ្លងកើនឡើងដល់១២៣នាក់ និងព្យាបាលជាសះស្បើយចំនួន១៧នាក់។ ប្រទេសប៊្រុយណេ មានអ្នកឆ្លង៩១នាក់ និងមានអ្នកព្យាបាលជាសះស្បើយចំនួន២នាក់។ កម្ពុជាមានអ្នកឆ្លងកើនឡើងដល់៨៧នាក់ និងមានអ្នកជាសះស្បើយ ចំនួន២នាក់។
ទោះជាយ៉ាងណា រហូតមកដល់ពេលនេះ ប្រទេសមីយ៉ាន់ម៉ា និងឡាវ នៅមិនទាន់មានរបាយការណ៍ណាមួយ ស្ដីអំពីចំនួនអ្នកឆ្លងវីរុសកូវីដ-១៩នេះនៅឡើយ៕
