ក្រោយពេលមានការវាយប្រហារដោយរ៉ុក្កែតទៅលើមូលដ្ឋានកងទ័ពអាមេរិក នៅលើទឹកដីអ៊ីរ៉ាក់នោះមក ធ្វើឲ្យ ស្ថានការណ៍ រវាងអាមេរិក និងរដ្ឋាភិបាលទីក្រុងបាដាដ កាន់តែមានភាពតានតឹងដាក់គ្នា ទើបអង់គ្លេសចេញមុខទៅបញ្ចុះបញ្ចូល ដើម្បីបន្ថូរបន្ថយនូវភាពតានតឹង រវាងអាមេរិក និងក្រុមអ្នកនយោបាយរបស់អ៊ីរ៉ាក់។
រហូតមកដល់ពេលនេះ រដ្ឋាភិបាលទីក្រុងវ៉ាស៊ីនតោន កំពុងតែទាមទារឲ្យអ៊ីរ៉ាក់ ធ្វើសកម្មភាពប្រឆាំងនឹងកង ជីវពលដែលគាំទ្រដោយអ៊ីរ៉ង់ ដោយអាមេរិកបានស្ដីបន្ទោសទៅលើការវាយប្រហារដោយរ៉ុក្កែតទៅលើមូលដ្ឋានកងទ័ព នៅទីក្រុងតាជី (Taji) ប្រទេសអ៊ីរ៉ាក់។
បើតាមប្រភពព័ត៌មាន បានឲ្យដឹងថា អង់គ្លេសកំពុងតែចរចាជាមួយនឹងកងកម្លាំងនយោបាយនិកាយស៊ីអ៊ីតរបស់អ៊ីរ៉ាក់ ដើម្បីបន្ថូរបន្ថយនូវភាពតានតឹង ក្រោយពេលមានការវាយប្រហារទៅលើមូលដ្ឋានកងទ័ពរបស់អាមេរិក ដែលជាទីតាំងរបស់កងទ័ពសម្ពន្ធមិត្តអន្ដរជាតិ ប្រយុទ្ធប្រឆាំងនឹងក្រុម ISIS នៅក្នុងប្រទេសអ៊ីរ៉ាក់ ហើយនិងការវាយប្រហារសងសឹករបស់អមេរិក ទៅលើកងជីវពលអ៊ីរ៉ាក់ គាំទ្រដោយអ៊ីរ៉ង់។
ប្រទេសអ៊ីរ៉ាក់ ជាកន្លែងដែលអាមេរិក និងអ៊ីរ៉ង់ ប្រជែងគ្នា ដណ្ដើមយកឥទ្ធិពល ចាប់តាំងពីអាមេរិកចូលលុកលុយប្រទេសនេះ នាអំឡុងឆ្នាំ២០០៣មកម៉្លេះ។ កាលពីប៉ុន្មានខែមកនេះ ប្រទេសអ៊ីរ៉ាក់ បានក្លាយជាកន្លែងវាយប្រហារគ្នា រវាងអាមេរិក និងអ៊ីរ៉ង់។ លោក ដូណាល់ ត្រាំ ប្រធានាធីបតីអាមេរិក បានបញ្ជាឲ្យកងទ័ពវាយប្រហារដោយយន្ដហោះគ្មានមនុស្សបើកបរ បានសម្លាប់មេទ័ពកំពូលរបស់អ៊ីរ៉ង់ លោក Qasseim Soleimani និងលោក Abu Mahdi Al Muhandis ព្រមទាំងមនុស្សជំនិត នៅជិតអាកាសយានដ្ឋានបាដាដ កាលពីថ្ងៃទី៣ ខែកុម្ភៈ ឆ្នាំ២០២០។ ប៉ុន្ដែ៣ថ្ងៃក្រោយមក អ៊ីរ៉ង់ក៏បានវាយប្រហារសងសឹកទៅលើមូលដ្ឋានកងទ័ពអាមេរិក ចំនួន២កន្លែង នៅលើទឹកដីអ៊ីរ៉ាក់។
ការវាយប្រហារសងសឹករបស់អ៊ីរ៉ង់ទៅលើមូលដ្ឋានកងទ័ពអាមេរិកនោះ បានបណ្ដាលឲ្យកងទ័ពអាមេរិកជាង១០០នាក់រងរបួសខួរក្បាល។ រីឯការវាយប្រហារជាបន្ដបន្ទាប់នៅលើមូលដ្ឋានកងទ័ពអាមេរិក នៅលើទឹកដីអ៊ីរ៉ាក់ កាន់តែធ្វើឲ្យស្ថានការណ៍នៅក្នុងប្រទេសអ៊ីរ៉ាក់មានភាពតានតឹងឡើង ទើបអង់គ្លេសចេញមុខមកជួយដោះស្រាយបញ្ហាទាំងនោះ៕