ក្រោយពេលប្រទេសឥណ្ឌាមានអ្នកឆ្លងវីរុសរលាកផ្លូវដង្ហើមប្រភេទថ្មី ឬវីរុសកូរ៉ណា (កូវីដ-១៩) កាន់តែច្រើនឡើង ខណៈប្រទេសនេះមានប្រជាពលរដ្ឋក្រីក្រច្រើនផងនោះ ទើបចុងក្រោយ ទើបលោកនាយករដ្ឋមន្រ្ដី ណារ៉េនដ្រា ម៉ូឌី បានប្រកាសដាក់ប្រទេស ក្នុងគ្រាអាសន្ន រយៈពេល២១ថ្ងៃ ដើម្បីជាវិធានការទប់ស្កាត់នឹងវីរុសកូវីដ-១៩។
លោក ណារ៉េនដ្រា ម៉ូឌី នាយករដ្ឋមន្ត្រីឥណ្ឌា បានថ្លែងតាមកញ្ចក់ទូរទស្សន៍ថា ប្រទេសនេះ ចាប់ផ្តើមបិទរយៈពេល២១ថ្ងៃ ដើម្បីទប់ស្កាត់ការឆ្លងរាតត្បាតជំងឺកូវីដ-១៩។ រីឯការអនុវត្តបម្រាមនេះ បានចាប់ផ្តើមពីពាក់កណ្តាលយប់ថ្ងៃទី២៥ ខែមីនា តទៅ ។
មន្ត្រីក្រសួងសុខាភិបាលឥណ្ឌា បានថ្លែងថា ការឆ្លងវីរុសកូវីដ-១៩ នៅក្នុងប្រទេសឥណ្ឌា បានកើនឡើងដល់ ៦៥៧នាក់ ក្នុងនោះអ្នកជំងឺ១២នាក់បានបាត់បង់ជីវិត។ ទោះជាយ៉ាងណា វិធានការធ្វើតេស្តស្កែនរកវីរុស ក៏ នឹងត្រូវបានអនុវត្តឡើងផងដែរ។
ជាមួយគ្នានេះដែរ អាជ្ញាធរឥណ្ឌា បានបញ្ជាក់ថា បម្រាមខាងលើនេះ មិនប៉ះពាល់ដល់មន្ទីរពេទ្យ ស្ថានីយប៉ូលិស និងស្ថាប័នផ្សព្វផ្សាយព័ត៌មាននោះឡើយ។ រីឯហាងលក់គ្រឿងទេស និងឱសថស្ថាននៅតែបើកទ្វារដំណើរការលក់ដូរធម្មតា។
នៅក្នុងយុទ្ធនាការប្រយុទ្ធប្រឆាំងនឹងវីរុសកូវីដ-១៩នោះ ឥណ្ឌាបានប្រកាសចាយលុយ២ពាន់លានដុល្លារទៅលើប្រព័ន្ធគាំពារសុខាភិបាល។ ជាមួយគ្នានេះដែរ អាជ្ញាធរឥណ្ឌា បានលើក ពាក្យស្លោកថា «អ្នកចេញក្រៅផ្ទះ កុំនាំយកកូវីដ-១៩ ចូលក្នុងផ្ទះ»។
សូមជម្រាបថា ពលរដ្ឋឥណ្ឌាទាំងអស់មានជាង១,៣ពាន់លាននាក់ ស្ថិតិក្នុងឆ្នាំ២០២០។ បើគិតមកដល់វេលាម៉ោង៥ព្រឹក ថ្ងៃទី២៦ ខែមីនា ឆ្នាំ២០២០ (ម៉ោងនៅកម្ពុជា) ប្រទេសឥណ្ឌាមានអ្នកឆ្លងវីរុសកូវីដ-១៩ ចំនួន៦៥៧នាក់ (ករណីឆ្លងថ្មី១២១នាក់)។ ក្នុងចំណោមអ្នកជំងឺទាំងនោះស្លាប់១២នាក់ និងព្យាបាលជាសះស្បើយចំនួន៤៤នាក់៕