មេដឹកនាំរុស្ស៊ីបានយល់ឃើញថា ការយកចិត្តទុកដាក់ពីថ្នាក់ដឹកនាំដល់អ្នកជំងឺកូវីដ-១៩ គឺជាការលើកកម្លាំងចិត្ត និងស្មារតីដ៏រឹងមាំដល់ពលរដ្ឋ ក្នុងការទប់ស្កាត់ការឆ្លងរាលដាល នៃជំងឺ កូវីដ-១៩។
ដោយសារតែមើលឃើញចំណុចដ៏សំខាន់ខាងលើនេះ ទើបប្រធានាធិបតីរុស្ស៊ី លោក វ៉្លាឌីមៀរ ពូទីន បានចូលទៅកាន់មន្ទីរពេទ្យ ព្យាបាលអ្នកជំងឺកូវីដ-១៩ ដោយផ្ទាល់ និងសួរសុខទុក្ខអ្នកជំងឺ ដើម្បីលើកទឹកចិត្តអ្នកជំងឺឲ្យកាន់តែរឹងមាំ។ លោកពូទីនបានស្លៀកឯកសណ្ឋានការពារ ឆ្លងវីរុស ហើយចូលទៅកាន់មន្ទីរពេទ្យ នាទីក្រុងមូស្គូ។
លោកប្រធានាធិបតីបានស្លៀកឯកសណ្ឋានការពារពណ៌លឿងពាក់របាំងមុខការពារ ចូលទៅកាន់មជ្ឈមណ្ឌលព្យាបាលអ្នកជំងឺកូវីដ-១៩ Kransarka ក្នុងទីក្រុងមូស្គូ។ ប៉ុន្ដែនៅពេលចូលទៅដល់មន្ទីរពេទ្យ លោក ពូទីន ក៏បានជួបពិភាក្សាជាមួយក្រុមគ្រូពេទ្យជំនាញប្រឆាំងកូវីដ-១៩ ។ បន្ទាប់មក លោកពូទីន បានចូលទៅសួរសុខទុក្ខអ្នកជំងឺកូវីដ-១៩ ដែលកំពុងសម្រាកព្យាបាល នៅក្នុងមន្ទីរពេទ្យ។
សូមជម្រាបថា បើគិតត្រឹមវេលាម៉ោង៥ព្រឹក ថ្ងៃទី២៦ ខែមីនា ឆ្នាំ២០២០ (ម៉ោងនៅកម្ពុជា) រុស្ស៊ីមានករណីឆ្លងកូវីដ-១៩ ចំនួន៦៥៨នាក់ ស្លាប់២នាក់ និងព្យាបាលជាសះស្បើយចំនួន២៩នាក់ុំ នៅចុងសប្ដាហ៍នេះ រុស្ស៊ីនឹងធ្វើតេស្តមនុស្ស ១៣ពាន់នាក់ដែលត្រូវបានដាក់ឲ្យនៅដាច់ដោយឡែកពីគេ ព្រោះតែសង្ស័យឆ្លងវីរុសកូវីដ-១៩៕
