ព្រះអង្គម្ចាស់ឆាលស៍មានព្រះជន្ម៧១ព្រះវស្សា ត្រូវបានគ្រូពេទ្យធ្វើតេស្ដ រកឃើញមានផ្ទុកវីរុសរលាកផ្លូវដង្ហើមប្រភេទថ្មី ឬវីរុសកូរ៉ូណា (កូវីដ-១៩) ប៉ុន្ដែព្រះមហាក្សត្រិយានីអង់គ្លេស ត្រូវបានគេនិយាយថា ព្រះអង្គមានព្រះសុខភាពល្អជាធម្មតា។
យោងតាមសេចក្ដីថ្លែងការណ៍របស់ព្រះរាជវាំង បានឲ្យដឹងថា ព្រះអង្គម្ចាស់ឆាលស៍ត្រូវបានគ្រូពេទ្យធ្វើស្វែងរកវីរុសកូវីដ-១៩ ហើយលទ្ធផលបានបង្ហាញវិជ្ជមាន នៃវីរុសកូវីដ-១៩។ ប៉ុន្ដែព្រះមាតារបស់ទ្រង់ គឺព្រះមហាក្សត្រិយានី នៅមានព្រះរាជសុខភាពល្អជាធម្មតា។
ប្រភពព័ត៌មានដដែល ក៏បានបញ្ជាក់ថា ថ្វីបើទ្រង់មានផ្ទុកវីរុសដ៏កាចសាហាវបែបនេះក្ដី តែព្រះសុខភាពរបស់ទ្រង់នៅល្អជាធម្មតា។ ប៉ុន្ដែមកដល់ពេលនេះ ព្រះអង្គម្ចាស់ត្រូវបានយាងទៅគង់នៅដាច់ដោយឡែកពីរាជវង្សានុវង្ស និងមន្រ្ដីព្រះរាជវាំង នៅក្នុងព្រះរាជវាំង( Duchess of Cornwall) ប្រទេសស្កត់ឡែនដ៍។
ប្រភពព័ត៌មានដដែល បានបញ្ជាក់ថា កាលពីថ្ងៃទី១២ ខែមីនា ទ្រង់បានចូលគាល់ព្រះមហាក្សត្រិយានី ដែលមានព្រះជន្មាយុ៩៣ព្រះវស្សា ហើយជាស្ដេចមានព្រះជន្មវែង។ ប៉ុន្ដែរហូតមកដល់ពេលនេះ ព្រះមហាក្សត្រិយានី នៅមានព្រះសុខភាពល្អ ហើយទ្រង់ក៏មិនមានព្រះរោគសញ្ញាអ្វីដែរ។
ក្រោយពេលដឹងថា ស្ដេចឆាលស៍មានផ្ទុកវីរុសកូវីដ-១៩នោះមក ធ្វើឲ្យគេសង្ស័យថា អាចនឹងមានមនុស្សជាច្រើនទៀតឆ្លងវីរុសនេះ ព្រោះថា មុនពេលធ្វើតេស្ដរកឃើញវិជ្ជមាន នៃកូវីដ-១៩នោះ ស្ដេចឆាលស៍បានយាងជួបមន្រ្ដីជាន់ខ្ពស់ជាតិ និងអន្ដរជាតិជាច្រើននាក់ផ្សេងទៀត។
សូមជម្រាបថា បើគិតត្រឹមវេលាម៉ោង៤ទៀតភ្លឺ ថ្ងៃទី២៦ ខែមីនា ឆ្នាំ២០២០ (ម៉ោងនៅកម្ពុជា) នៅក្នុងចក្រភពអង់គ្លេស មានអ្នកឆ្លងវីរុសកូវីដ-១៩ ចំនួន៨២៦៤ (ឆ្លងថ្មី១៨៧) ក្នុងនោះមានអ្នកជាសះស្បើយចំនួន១៣៥នាក់ និងស្លាប់៤៣៥នាក់៕
