រដ្ឋធានីកូឡុំបូ៖ ក្រោយសេដ្ឋកិច្ចរបស់ស្រីលង្កា បានដួលរលំទាំងស្រុង ប្រជាជននៅលើដែនកោះអាស៊ីខាងត្បូងមួយនេះ បានងើបឡើងតវ៉ា បង្ខំឲ្យប្រធានាធិបតី លោក ហ្គោតាបាយ៉ា រ៉ាចាប៉ាកសា (Gotabaya Rajapaksa) រត់ភៀសខ្លួនចោលប្រទេស ហើយបច្ចុប្បន្ន ក្រុមហ៊ុនប្រឹក្សាហិរញ្ញវត្ថុ Lazard បានចាប់ផ្ដើមចរចាជាមួយឥណ្ឌា ចិន និង ជប៉ុន ស្ដីពីបំណុលរបស់ប្រទេសមួយនេះ។
សារព័ត៌មាន The Manil Times បានចេញផ្សាយ កាលពីថ្ងៃអង្គារ ទី១៣ ខែកញ្ញា ថា អ្នកនាំពាក្យ រដ្ឋាភិបាលស្រីលង្កា បានថ្លែង កាលពីថ្ងៃអង្គារ ដើមសប្ដាហ៍នេះ ថា ក្រុមផ្តល់ប្រឹក្សាហិរញ្ញវត្ថុ Lazard បានចាប់ផ្តើមពិភាក្សាជាមួយឥណ្ឌា ចិន និងជប៉ុន ស្តីពីការរៀបចំរចនាសម្ព័ន្ធបំណុលរបស់ស្រីលង្កាឡើងវិញ ខណៈប្រទេសនៅលើដែនកោះ ដែលកំពុងតែរងនូវវិបត្ដិបំណុល ស្វះស្វែងរកថវិកាសង្គ្រោះ ពីមូលនិធិរូបិយវត្ថុអន្ដរជាតិ (IMF)។
ស្រីលង្កា បានជួលក្រុមហ៊ុនប្រឹក្សាហិរញ្ញវត្ថុ និង គ្រប់គ្រងការវាយតម្លៃ Lazard កាលពីអំឡុងខែឧសភា ជាមួយនឹងក្រុមហ៊ុនមេធាវីអន្ដរជាតិ Clifford Chance ដើម្បីណែនាំរដ្ឋាភិបាល តាមរយៈដំណើរការរៀបចំរចនាសម្ព័ន្ធបំណុលរបស់ខ្លួនឡើងវិញ ដោយប៉ាន់ប្រមាណ ចន្លោះពី ៨៥ពាន់លានដុល្លារ រហូតដល់ជាង ១០០ពាន់លានដុល្លារសហរដ្ឋអាមេរិក។
មូលនិធិរូបិយវត្ថុអន្ដរជាតិ (IMF) កាលពីដើមខែនេះ បានបញ្ជាក់ថា IMF បានឈានដល់កិច្ចព្រមព្រៀងបឋម ជាមួយនឹងប្រទេសស្រីលង្កា សម្រាប់ប្រាក់កម្ចី ចំនួន ២,៩ពាន់លានដុល្លារសហរដ្ឋអាមេរិក។ ប៉ុន្តែមុននឹងឈានដល់កិច្ចព្រមព្រៀងនេះ ត្រូវបានសម្រេចឡើងនោះ ស្រីលង្កា នឹងតម្រូវឱ្យមានការដោះស្រាយបំណុលជាមួយប្រទេសចិន ឥណ្ឌា និងជប៉ុន ដែលជាប្រទេសផ្តល់ប្រាក់កម្ចីអន្តរជាតិដ៏ធំបំផុតរបស់ប្រទេសនៅលើដែនកោះអាស៊ីខាងត្បូងនេះ។
លោក រ៉ាម៉ែស ប៉ាធីរ៉ាណា (Ramesh Pathirana) អ្នកនាំពាក្យ ទីស្ដីការគណៈរដ្ឋមន្ត្រី បានប្រាប់ដល់ក្រុមអ្នកយកព័ត៌មាន ដោយសំអាងទៅលើក្រុមហ៊ុន Lazard ថា «ពួកគេកំពុងតែស្ថិតក្នុងដំណើរការចរចាជាមួយប្រទេសឥណ្ឌា ចិន និង ជប៉ុន ដើម្បីធានាថា យើងអាចឈានដល់ការឯកភាពគ្នា លើបញ្ហាមួយចំនួន»។
ស្រីលង្កា បានជំពាក់បំណុលប្រទេសទាំង៣ រួមមាន ឥណ្ឌា ចិន និង ជប៉ុន ប្រហែល១៣ពាន់លានដុល្លារសហរដ្ឋអាមេរិក ខណៈចិនជាម្ចាស់បំណុលដ៏ធំបំផុតរបស់ប្រទេសដែនកោះអាស៊ីខាងត្បូងមួយនេះ។
ប្រភពពីរដ្ឋាភិបាល បានប្រាប់ទីភ្នាក់ងារសារព័ត៌មាន Reuters ថា នៅចុងសប្ដាហ៍នេះ ស្រីលង្កា ត្រូវគេរំពឹងថា នឹងទាក់ទងជាផ្លូវការ ទៅកាន់ម្ចាស់បំណុលដោយផ្ទាល់ ដែលកាន់កាប់មូលបត្របំណុល ប្រហែល១២ពាន់លានដុល្លារសហរដ្ឋអាមេរិក។ ប្រភពដដែលនោះ បានសុំលក្ខខណ្ឌមិនបញ្ចេញអត្ដសញ្ញាណ ដោយសារការហាមឃាត់ ថ្លែងទៅកាន់ប្រព័ន្ធផ្សព្វផ្សាយ បានអះអាង ថា «រដ្ឋាភិបាល គ្រោងនឹងចាប់ផ្តើមកិច្ចពិភាក្សា ជាមួយឯកអគ្គរដ្ឋទូតចិន អាមេរិក ជប៉ុន និង ឥណ្ឌា ស្តីពីការរៀបចំរចនាសម្ព័ន្ធបំណុល នៅសប្តាហ៍ក្រោយ»។
រហូតមកដល់ពេលនេះ ប្រទេសស្រីលង្កាកំពុងស្ថិតក្នុងវិបត្តិហិរញ្ញវត្ថុដ៏អាក្រក់បំផុត នៅក្នុងប្រវត្ដិសាស្ដ្ររបស់ខ្លួន អស់រយៈពេល៧ទសវត្សរ៍កន្លងមកនេះ ដោយបានបន្សល់ទុកនូវទុនបម្រុងប្តូរ ជាប្រាក់បរទេសតិចតួច សម្រាប់ការទូទាត់ ដល់ការនាំចូលរបស់របរសំខាន់ៗ រួមមាន ប្រេងឥន្ធនៈ អាហារ និង ថ្នាំពេទ្យ …ជាដើម៕
