រាជធានីប្រ៊ុចសែលស៍៖ ប្រធានអង្គការសន្ធិសញ្ញាអាត្លង់ទិកខាងជើង (ណាតូ ឬ អូតង់) បានព្រមានដល់រុស្ស៊ី ឲ្យបញ្ឈប់ប្រឌិតរឿងក្រុងកៀវ រៀបចំប្រើប្រាស់គ្រាប់បែកវិទ្យុសកម្ម វាយប្រហារទៅលើទឹកដីរបស់ខ្លួន ដើម្បីបង្កើនជម្លោះបន្ថែមទៀត ព្រោះបណ្ដាប្រទេសបស្ចិមលោក នៅតែបន្ដគាំទ្រដល់អ៊ុយក្រែន ដដែលទេ។
សារព័ត៌មាន Barron’s បានចេញផ្សាយ កាលពីថ្ងៃអង្គារ ទី២៥ ខែតុលា ថា លោក ជេន ស្តូលថែនប៊ឺគ (Stoltenberg) អគ្គលេខាធិការ អង្គការសន្ធិសញ្ញាអាត្លង់ទិកខាងជើង (ណាតូ ឬ អូតង់) បានសរសេរ នៅលើបណ្ដាញសង្គមធ្វីធ្វើរ ក្រោយជួបជាមួយនឹងលោក ឡយ អូស្ទីន (Lloyd Austin) រដ្ឋមន្ដ្រីក្រសួងការពារជាតិសហរដ្ឋអាមេរិក និង លោក បែន វ៉ាលឡេស (Ben Wallace) រដ្ឋមន្ដ្រីក្រសួងការពារជាតិចក្រភពអង់គ្លេស ថា «សម្ពន្ធមិត្តណាតូ បានច្រានចោលការចោទប្រកាន់របស់រុស្ស៊ី ពីអ៊ុយក្រែន កំពុងតែរៀបចំប្រើប្រាស់គ្រាប់បែកវិទ្យុសកម្ម។ ក្រុងមូស្គូ មិនត្រូវប្រើប្រាស់ការប្រឌិតបែបនេះ ដើម្បីបង្កើននូវជម្លោះនោះឡើយ។ យើងនៅតែប្រកាន់ជំហរយ៉ាងម៉ឺងម៉ាត់របស់យើង គាំទ្រដល់ប្រទេសអ៊ុយក្រែន បន្ដទៀត»។
ប្រមុខអង្គការណាតូ បានព្រមាន ថា រុស្ស៊ី មិនត្រូវបង្កើនជម្លោះ នៅក្នុងប្រទេសអ៊ុយក្រែន ដោយការប្រឌិត ថា អ៊ុយក្រែន កំពុងតែរៀបចំគម្រោង បញ្ចេញគ្រាប់បែកវិទ្យុសកម្ម (Dirty Bomb) នោះទេ។ លោកប្រធានណាតូ បានថ្លែងសង្កត់ធ្ងន់ៗ ក្រោយពេលក្រុងមូស្គូ បានចោទប្រកាន់ជាដដែលៗ ថា អ៊ុយក្រែន អាចនឹងដាក់ពង្រាយនូវអាវុធមានសារធាតុនុយក្លេអ៊ែរបែបនេះ នាំឲ្យមានការព្រួយបារម្ភកាន់តែខ្លាំងឡើង ដែលរុស្ស៊ី អាចប្រើប្រាស់វិធីសាស្ដ្រនេះ ស្ដីបន្ទោស ដល់ក្រុងកៀវ។
ប្រមុខសម្ពន្ធមិត្តយោធាដឹកនាំដោយសហរដ្ឋអាមេរិក រូបនេះ បានពិភាក្សាគ្នាជាមួយនឹងលោក ឡយ អូស្ទីន (Lloyd Austin) ប្រមុខមន្ទីរបញ្ចកោណ និង លោក បែន វ៉ាលឡេស (Ben Wallace) អំពីការប្រឌិតរឿងរបស់រុស្ស៊ី ទម្លាក់កំហុសទៅលើអ៊ុយក្រែន រៀបចំប្រើប្រាស់គ្រាប់បែកវិទ្យុសកម្ម ទៅលើទឹកដីរបស់ខ្លួន៕
