ដោយសារតែវីរុសកំពុងតែរាតត្បាតយ៉ាងខ្លាំងតាមបណ្ដាប្រទេស និងដែនដី ចំនួន១៩៨ នៅជុំវិញពិភពលោក ដោយមានអ្នកឆ្លងជាង៥៥ម៉ឺននាក់ ក្នុងនោះមានអ្នកស្លាប់ជាង២៥ពាន់នាក់ ទើបសិង្ហបុរីចេញច្បាប់ថ្មី ដោយដាក់បញ្ញត្ដិថា បើអ្នកណាម្នាក់មានចេតនាទៅឈរ ឬអង្គុយជិតអ្នកផ្សេង អាចនឹងប្រឈមនឹងការជាប់គុករយ:ពេល៦ខែ និងពិន័យជាប្រាក់៧ពាន់ដុល្លារអាមេរិក។
សារព័ត៌មានបាងកកប៉ុស្ដិ៍ បានផ្សាយ កាលពីថ្ងៃទី២៧ ខែមីនា ឆ្នាំ២០២០ ប្រជាពលរដ្ឋសិង្ហបុរី អាចនឹងជាប់ពន្ធនាគារ រយៈពេល៦ខែ ប្រសិនបើកពួកគេមានចេតនាចង់ឈរជិតគ្នាជាមួយនឹងអ្នកដទៃទៀត។ ច្បាប់ថ្មីនេះត្រូវបានប្រកាស កាលពីថ្ងៃទី២៧ ខែមីនា ឆ្នាំ២០២០ ហើយនេះក៏ជាវិធានការ សម្រាប់ទប់ស្កាត់ការឆ្លងរីករាលដាល នៃវីរុសកូវីដ-១៩។
សិង្ហបុរីបានចេញវិធានការជាបន្ដបន្ទាប់ ដើម្បីទប់ស្កាត់នូវការឆ្លងរីករាលដាល នៃវីរុសកូវីដ-១៩ ដោយរួមទាំងការបិទរង្គសាល រោងភាពយន្ដ ក៏ដូចជា ការហាមឃាត់ព្រឹត្ដិការណ៍នានា ជាដើម។ រីឯអាជ្ញាធរមានគោលបំណងចង់ឲ្យមនុស្ស ត្រូវនៅឲ្យគម្លាត ឆ្ងាយពីគ្នា ដើម្បីបញ្ឈប់នូវការឆ្លងរីករាលដាល នៃវីរុសកូវីដនេះ។ បម្រាមនេះទាមទារឲ្យបុគ្គលម្នាក់ៗ ត្រូវតែនៅឲ្យឃាតពីគ្នាយ៉ាងតិចបំផុតចម្ងាយ១ម៉ែត្រ។
បើតាមបទប្បញ្ញត្ដិនេះ បានហាមប្រាមដល់មនុស្សឈរ ឬអង្គុយ នៅជិតមនុស្សផ្សេងៗទៀត ដោយត្រូវនៅគម្លាតពីគ្នាយ៉ាងតិច១ម៉ែត្រ។ ដោយឡែកសម្រាប់អ្នកបំពានលើច្បាប់នេះ អាចនឹងត្រូវប្រឈមនឹងការជាប់ពន្ធនាគារ រយៈពេល៦ខែ និងរងការផាកពិន័យជាអតិបរមា៧ពាន់ដុល្លារអាមេរិក។
បើគិតត្រឹមវេលាម៉ោង៥ព្រឹក ថ្ងៃទី២៨ ខែមីនា ឆ្នាំ២០២០នេះ ប្រទេសសិង្ហបុរីមានអ្នកឆ្លងកើនឡើង ចំនួន៧៣២នាក់ ក្នុងនោះស្លាប់២នាក់ និងព្យាបាលជាសះស្បើយ ចំនួន១៨៣នាក់។ ដោយសារតែការឆ្លងរីករាលដាល នៃវីរុសកូវីដ-១៩ បន្ដកើនឡើង នៅក្នុងប្រទេសសិង្ហបុរី បែបនេះ ទើបរដ្ឋាភិបាលចេញវិធានការផ្សេងៗ ដើម្បីទប់ស្កាត់ការឆ្លងរីករាលដាល នៃកូវីដ-១៩៕