[wai id="6"]
[wai id="7"]
ប្រធានអង្គការសុខភាពពិភពលោក WHOលោក Tedros Adhanom Ghebreyesus បានធ្វើការថ្កោលទោសចំពោះការលើកឡើងដោយក្រុមអ្នកវិទ្យាសាស្ត្រថា វ៉ាក់សាំងបង្ការដ៏មានសក្តានុពលសម្រាប់ជំងឺ COVID-19 គួរតែធ្វើតេស្តលើពលរដ្ឋនៅតាមបណ្តាប្រទេសអាហ្វ្រិក ។
អំឡុងសន្និសីទសារព័ត៌មានតាមអ៊ីនធឺណេត លោក Tedros បាននិយាយថា វាគឺជាភាពអាម៉ាស់មួយ និងជារឿងដែលគួរឲ្យហួសចិត្តបំផុត នៅពេលឮអនុសាសន៍បែបនេះ ចេញពីក្រុមអ្នកវិទ្យាសាស្ត្រនាសតវត្សរ៍ទី២១ ។
សេចក្តីអធិប្បាយរបស់លោក Tedros បានកើតមានឡើង ក្រោយពីមានសេចក្តីរាយការណ៍ថា វេជ្ជបណ្ឌិត២រូប រងការចោទប្រកាន់ពីបទប្រកាន់ជាតិសាសន៍ អំឡុងការជជែកដេញដោលលើកញ្ចក់ទូរទស្សន៍បារាំង ស្តីពីការសាកល្បងវ៉ាក់សាំងបង្ការវីរុសនៅអឺរ៉ុប ពេលដែលពួកគេ លើកឡើងថា ការធ្វើ តេស្តគួរតែសាកល្បងនៅអាហ្វ្រិក ។
ពាណិជ្ជកម្ម
អំឡុងពេលថ្លែងសុន្ទរកថានោះដែរ ប្រធានអង្គការ WHOរូបនេះ បានរៀបរាប់លំអិតផងដែរ ពីផែនការយុទ្ធសាស្ត្ររបស់អាហ្វ្រិក ក្នុងការទប់ទល់ជាមួយនឹងជំងឺ COVID-19 ។
លោក Tedros បាននិយាយថា មាននូវជំនួបផងដែរជាមួយមេដឹកនាំនយោបាយចម្រុះរបស់ អង្គការ WHO និងប្រមុខរដ្ឋ ដើម្បីធ្វើផែនការដោះស្រាយវិបត្តិមួយនេះ ។
អំឡុងការជជែកដេញដោលនោះ លោក Camille Locht ដែលជាប្រធានក្រុមស្រាវជ្រាវ Inserm បាន ជជែកលើការសាកល្បងវ៉ាក់សាំងនៅអឺរ៉ុប និងអូស្ត្រាលី ។
ដោយឡែក លោក Jean-Paul Mira ដែលជាប្រធានមន្ទីរពេទ្យ Cochin ស្ថិតនៅក្នុងទីក្រុងប៉ារីស បាននិយាយថា បើសិនជាលោកអាចអំពាវនាវបាន ហេតុអ្វី បានជាយើងមិនធ្វើការសិក្សាស្រាវជ្រាវនៅអាហ្វ្រិក ជាកន្លែងដែលគ្មានម៉ាស់ គ្មានការព្យាបាល និងគ្មានការជួយឲ្យដកដង្ហើមនោះ។
ទោះបីជាយ៉ាងណាក៏ដោយ បណ្តាប្រទេសនៅអាហ្វ្រិក មើលឃើញករណីឆ្លងតិចជាងបណ្តាប្រទេសផ្សេងទៀតនៅលើពិភពលោក គិតមកទល់នឹងពេលនេះ ប៉ុន្តែលោកថេដ្រូស បាននិយាយថា ការត្រៀមខ្លួនសម្រាប់លទ្ធភាពនៃកំណើនករណីឆ្លងវីរុស គឺជាអាទិភាពដ៏កំពូលបំផុត ។
បច្ចុប្បន្ន ករណីឆ្លងនៃជំងឺ COVID-19នៅអាហ្វ្រិក កើនឡើងដល់ ១០.០៧៥នាក់ និងករណីស្លាប់ កើនឡើងដល់ ៤៨៧នាក់ ។
ខណៈពេលនោះដែរ អង្គការសុខភាពពិភពលោក (WHO) បានព្រមាន ថាពិភពលោកត្រូវការគិលានុបដ្ឋាកជិត ៦លាននាក់។
ទីភ្នាក់ងារសុខាភិបាលរបស់អង្គការសហប្រជាជាតិរួមជាមួយដៃគូគិលានុបដ្ឋាកនិងក្រុមប្រឹក្សាគិលានុបដ្ឋាកអន្តរជាតិ (ICN) បានគូសបញ្ជាក់នៅក្នុងរបាយការណ៍ស្តីពីតួនាទីសំខាន់របស់គិលានុបដ្ឋាកដែលមានចំនួនជាងពាក់កណ្តាលនៃបុគ្គលិកសុខាភិបាលទូទាំងពិភពលោក។
លោក Tedros បាននិយាយនៅក្នុងសេចក្តីថ្លែងការណ៍មួយថា គិលានុបដ្ឋាកគឺជាឆ្អឹងខ្នងនៃប្រព័ន្ធសុខភាព ។
លោកបានកត់សម្គាល់ថា សព្វថ្ងៃនេះគិលានុបដ្ឋាកជាច្រើនមើលឃើញខ្លួនឯងនៅជួរមុខក្នុងការប្រយុទ្ធប្រឆាំងនឹងជំងឺ COVID-19 ដោយលោកបានបន្ថែមថា វាចាំបាច់ណាស់ដែលពួកគេ ត្រូវទទួលបានការគាំទ្រដែលពួកគេត្រូវការដើម្បីថែរក្សាសុខភាពពិភពលោក ៕
[wai id="5"]
