រដ្ឋធានីវ៉ាស៊ីនតោន៖ កងទ័ពជើងទឹកសហរដ្ឋអាមេរិក បានស្ទាក់ចាប់ទូកមួយគ្រឿង ដឹកគ្រាប់រំសេវ មានចំនួនជាង១លានគ្រាប់ ចាកចេញពីប្រទេសអ៊ីរ៉ង់ នាំទៅផ្គត់ផ្គង់ ដល់ក្រុមឧទ្ទាមហ៊ូធី នៅក្នុងប្រទេសយេម៉ែន។
សារព័ត៌មានអារ៉ាប់អន្ដរជាតិ Alarabiya News បានចេញផ្សាយ កាលពីថ្ងៃអាទិត្យ ទី៤ ខែធ្នូ ថា កងទ័ពជើងសហរដ្ឋអាមេរិក បានបញ្ជាក់ ថា កងទ័ពរបស់ខ្លួន ស្ទាក់ចាប់ទូកនេសាទមួយគ្រឿង រត់ពន្ធគ្រាប់រំសេវ មានទម្ងន់៥០តោន នៅក្នុងឈូងសមុទ្រអូម៉ង់។ គ្រាប់រំសេវ ដែលរឹបអូសបាន រួមមានគ្រាប់កាំភ្លើង ជាង១លានគ្រាប់ គ្រាប់រ៉ុក្កែតរាប់ពាន់គ្រាប់ និង ឧបករណ៍បាញ់គ្រាប់រ៉ុក្កែតមួយចំនួនទៀត។
កងទ័ពនាវាទី៥របស់កងទ័ពជើងទឹក សហរដ្ឋអាមេរិក បានបញ្ជាក់ នៅក្នុងសេចក្ដីថ្លែងការណ៍របស់ខ្លួន កាលពីថ្ងៃសៅរ៍ សប្ដាហ៍មុន ថា «ទំនិញខុសច្បាប់ទាំងនេះ បានរកឃើញ តាំងពីថ្ងៃទី១ ខែធ្នូ មកម្ល៉េះ ខណៈត្រួតពិនិត្យ និង រឹបអូសបាន ពីទូកនេសាទមួយគ្រឿង មានទិសដៅចេញពីអ៊ីរ៉ង់ ឆ្ពោះទៅកាន់ប្រទេសយេម៉ែន ដែលកំពុងតែហែកហួរ ដោយសារសង្គ្រាម។ នេះជារឹបអូសទំនិញ ជាអាវុធធំលើកទី២ នៅក្នុងរយៈពេល១ខែនេះ នៅក្នុងសមុទ្រអូម៉ង់។
បើតាមសេចក្ដីថ្លែងការណ៍របស់កងទ័ពជើងទឹក សហរដ្ឋអាមេរិក បានសង្កត់ធ្ងន់ ថា «ការផ្គត់ផ្គង់ដោយផ្ទាល់ ឬ ដោយប្រយោល, ការលក់ ឬ ការផ្ទេរគ្រឿងសព្វាវុធ ទៅឱ្យក្រុមឧទ្ទាមហ៊ូធី (Houthis) នៅក្នុងប្រទេសយេម៉ែន ជាការរំលោភ ប្រឆាំងនឹងសេចក្តីសម្រេច លេខ២២១៦របស់ក្រុមប្រឹក្សាសន្តិសុខ អង្គការសហប្រជាជាតិ និង ច្បាប់អន្តរជាតិ»។
លោកឧត្ដមនាវី ប្រេដ ឃូភ័រ (Brad Cooper) មេបញ្ជាការកងនាវាទី៥ បានចោទប្រកាន់ដល់ប្រទេសអ៊ីរ៉ង់ ជាអ្នកនៅពីក្រោយខ្នងការដឹកជញ្ជូនគ្រឿងសព្វាវុធទៅឲ្យក្រុមឧទ្ទាមហ៊ូធី។ លោកឧត្ដមនាវី បានអះអាង ថា «ច្បាប់ហាមឃាត់ដ៏សំខាន់នេះ បង្ហាញយ៉ាងច្បាស់ ថា អ៊ីរ៉ង់ នៅតែបន្ដផ្ទេរជំនួយសព្វាវុធដ៏សាហាវ ដោយខុសច្បាប់ និង ជាបង្ហាញអាកប្បកិរិយា នាំឱ្យមានអស្ថិរភាពបន្តទៀត»។
សហរដ្ឋអាមេរិក និង អារ៉ាប៊ីសាអូឌីត បានចោទប្រកាន់អ៊ីរ៉ង់ ជាអ្នកផ្គត់ផ្គង់គ្រឿងសព្វាវុធដល់ក្រុមឧទ្ទាម Houthi នៅក្នុងប្រទេសយេម៉ែន រហូតឈានដល់ការវាយដណ្តើមកាន់កាប់រដ្ឋធានី សាណា (Sanaa) កាលពីឆ្នាំ២០១៤។ ដោយឡែក អ៊ីរ៉ង់ បានច្រានចោលការចោទប្រកាន់ទាំងនេះ ប៉ុន្ដែក្រុងតេអ៊ីរ៉ង់ កាលពីពេលកន្លងមក ធ្លាប់អះអាងថា ខ្លួនគាំទ្រក្រុម Houthis តែខាងនយោបាយ ហើយក៏មិនបានផ្គត់ផ្គង់អាវុធដល់ក្រុមនេះដែរ។
ក្រុមសម្ពន្ធមិត្តអារ៉ាប់ ដឹកនាំដោយប្រទេសអារ៉ាប់សាអូឌីត បានដឹកនាំការវាយប្រយុទ្ធ ប្រឆាំងនឹងក្រុមឧទ្ទាម Houthis នៅក្នុងប្រទេសយេម៉ែន។ សង្គ្រាមនេះ បានសម្លាប់មនុស្ស រាប់សែននាក់ និង បានរុញច្រានប្រទេសដ៏ក្រីក្រមួយនេះ ឱ្យធ្លាក់ទៅដល់កម្រិតទុរ្ភិក្សធ្ងន់ធ្ងរបំផុត។
ដោយឡែក បទឈប់បាញ់មួយ បានកើតឡើង ក្រោមការសម្របសម្រួល ពីអង្គការសហប្រជាជាតិ ហើយបានចូលជាធរមាន កាលពីខែមេសា រហូតឈានដល់ការថយចុះអរិភាពយ៉ាងខ្លាំង។ រីឯបទឈប់បាញ់គ្នានេះ បានផុតកំណត់ កាលពីខែតុលា ហើយការប្រយុទ្ធគ្នាក៏នៅតែបន្ដកើតមានជាហូរហែ៕
