រដ្ឋធានីកៀវ៖ ជាមួយនឹងរលកមីស៊ីលរបស់ទាហានរុស្ស៊ី វាយប្រហារ ប្រឆាំងនឹងហេដ្ឋារចនាសម្ព័ន្ធថាមពល រហូតធ្វើឲ្យមនុស្ស រាប់លាននាក់ នៅក្នុងប្រទេសអ៊ុយក្រែន អត់មានអគ្គិសនីប្រើប្រាស់នោះមក ប្រមុខការពារជាតិសហរដ្ឋអាមេរិក និង អ៊ុយក្រែន ក៏បានពិភាក្សា អំពីការពង្រឹងនូវសមត្ថភាពការពារដែនអាកាស នៅក្នុងប្រទេសអឺរ៉ុបខាងកើតមួយនេះ។
សារព័ត៌មាន Pravda បានចេញផ្សាយ កាលពីព្រឹក ថ្ងៃអង្គារ ទី៦ ខែធ្នូ ថា លោក ឡយ អូស្ទីន (Lloyd Austin) រដ្ឋមន្ដ្រីក្រសួងការពារជាតិសហរដ្ឋអាមេរិក និង សមភាគីអ៊ុយក្រែន លោក អូឡែកស៊ី រេស្នីកូវ (Oleksii Reznikov) បានពិភាក្សាគ្នា អំពីជំហានផ្សេងៗទៀតបន្ដ ដើម្បីពង្រឹងសមត្ថភាពការពារដែនអាកាសរបស់អ៊ុយក្រែន ទប់ទល់នឹងការវាយប្រហារ ដោយមីស៊ីល ពីទាហានរុស្ស៊ី ប្រឆាំងនឹងហេដ្ឋរចនាសម្ព័ន្ធស៊ីវិល។
លោក រេស្នីកូវ ប្រមុខការពារជាតិអ៊ុយក្រែន បានបង្ហោះ នៅលើបណ្ដាញសង្គមធ្វីធើរ កាលពីថ្ងៃចន្ទ ថា «ខ្ញុំសូមថ្លែងអំណរគុណយ៉ាងជ្រាលជ្រៅ ដល់រដ្ឋមន្ត្រីការពារជាតិសហរដ្ឋអាមេរិក ដែលតែងតែយកចិត្តទុកដាក់ និង ជួយដោយស្មោះ សម្រាប់ទប់ទល់នឹងស្ថានការណ៍សង្គ្រាម នៅក្នុងប្រទេសអ៊ុយក្រែន។ ក្នុងអំឡុងពេលការហៅទូរស័ព្ទរបស់យើង នៅថ្ងៃនេះ បានកើតឡើង ក្រោយការវាយប្រហារដោយមីស៊ីលរបស់រុស្ស៊ី បាញ់ស្រោចទៅលើទីក្រុងនានា។ ជាមួយគ្នានេះ យើងក៏បានពិភាក្សាគ្នា អំពីជំហានបន្ថែមទៀត សម្រាប់ពង្រឹងសមត្ថភាពការពារដែនអាកាសរបស់អ៊ុយក្រែន»។
សហរដ្ឋអាមេរិក បានចេញមុខគាំទ្រយ៉ាងពេញទំហឹង ប្រឆាំងនឹងការឈ្លានពានរបស់រុស្ស៊ី នៅក្នុងប្រទេសអ៊ុយក្រែន ដោយបានផ្ដល់ជំនួយគ្រឿងសព្វាវុធ មានទំហំទឹកប្រាក់ប្រហែល ១៨,៥ពាន់លានដុល្លារ ចាប់តាំងពីការផ្ទុះសង្គ្រាម កាលពីថ្ងៃទី២៤ ខែកុម្ភៈ រហូតមកដល់ពេលនេះ។ ជំនួយគ្រឿងសឹករបស់សហរដ្ឋអាមេរិក បានជួយដល់កងទ័ពការពារទឹកដីរបស់អ៊ុយក្រែន មានលទ្ធភាព វាយបកទៅលើកម្លាំងទាហានរុស្ស៊ី រហូតរំដោះទឹកដីរបស់ខ្លួនបានជាបន្ដបន្ទាប់ យកមកគ្រប់គ្រងវិញ ចាប់តាំងពីខែកញ្ញា រហូតមក។
មន្ដ្រីជាន់ខ្ពស់ក្រសួងការជាតិរបស់អ៊ុយក្រែន បានបញ្ជាក់ ថា សមត្ថភាពប្រព័ន្ធការពារដែនអាកាស នៅតែជាអាទិភាពជាចម្បង សម្រាប់កងទ័ពការពារទឹកដីរបស់អ៊ុយក្រែន ដើម្បីបញ្ឈប់ការវាយប្រហារតាមអាកាស ក៏ដូចជា ដ្រូន និង មីស៊ីល ពីទាហានរុស្ស៊ី ប្រឆាំងនឹងហេដ្ឋារចនាសម្ព័ន្ធស៊ីវិល។
ជាមួយនឹងតម្រូវការចាំបាច់បំផុត សម្រាប់ប្រព័ន្ធការពារដែនអាកាសនៅក្នុងប្រទេសអ៊ុយក្រែន នោះ សហរដ្ឋអាមេរិក សម្ពន្ធមិត្ត និង ប្រទេសជាដៃគូ កំពុងតែបញ្ជូនខែលការពារ ទៅជួយដល់រដ្ឋាភិបាលក្រុងកៀវ រួមមាន ប្រព័ន្ធ IRIS-T ផលិតដោយប្រទេសអាល្លឺម៉ង់ និង ប្រព័ន្ធ NASAMS ផលិតដោយសហរដ្ឋអាមេរិក។ ប៉ុន្ដែការផ្គត់ផ្គត់ខែលការពារទាំងនេះ នៅមានចំនួនតិចបំផុត ទើបរុស្ស៊ី នៅតែមានលទ្ធភាព អាចវាយកម្ទេចហេដ្ឋារចនាសម្ព័ន្ធស៊ីវិល នៅក្នុងប្រទេសអ៊ុយក្រែន បន្ដទៀតបាន។ ដោយសារតែមើលឃើញ អំពីបញ្ហានេះ ប្រមុខការពារជាតិសហរដ្ឋអាមេរិក ក៏បានពិភាក្សាគ្នា អំពីការបង្កើនសមត្ថភាពការពារដែនអាកាសបន្ថែមទៀត សម្រាប់ការពារ និង ជួយដល់អ៊ុយក្រែន៕
