[wai id="9"]
ប្រទេសឥណ្ឌាដែលមានប្រជាជនច្រើនជាងគេលំដាប់លេខ ២ នៅលើពិភពលោក កំពុងប្រឈមនឹងការឆ្លងនៅរលកទី ២ ដែលបានជំរុញប្រព័ន្ធថែរក្សាសុខភាពរបស់ប្រទេសនេះ ហៀបនឹងដួលរលំ ដោយមន្ទីរពេទ្យប្រឹងអស់សមត្ថភាព ហើយខ្វះអុកស៊ីសែន។ កង្វះអុកស៊ីសែនមានសភាពធ្ងន់ធ្ងរ ដែលនាំឲ្យតុលាការជាន់ខ្ពស់នៅរដ្ឋធានីញូវដែលី បញ្ជាឲ្យរដ្ឋាភិបាលបង្វែរអុកស៊ីសែនពីរោងចក្រទៅប្រើនៅមន្ទីរពេទ្យ។
ពាណិជ្ជកម្ម
រលកចម្លងកូវីដនៅក្នុងប្រទេសឥណ្ឌាសព្វថ្ងៃនេះ មានកម្លាំងខ្លាំង រហូតធ្វើឲ្យអត្រាឆ្លងកូវីដថ្មីប្រចាំថ្ងៃរបស់ឥណ្ឌា មានចំនួនច្រើនជាងគេបំផុតក្នុងកំណត់ត្រាពិភពលោក។
ចំនួនឆ្លងកូវីដថ្មីរហូតដល់ទៅជិត ១ លាន ៦ សែនករណីត្រូវបានចុះបញ្ជីនៅទូទាំងប្រទេសឥណ្ឌាក្នុងរយៈ ពេលត្រឹមតែមួយសប្តាហ៍ប៉ុណ្ណោះ។ ចំណែកនៅព្រឹកថ្ងៃសុក្រនេះ អាជ្ញាធរសុខាភិបាលឥណ្ឌា បានរាយការណ៍ថាអត្រាឆ្លងកូវីដថ្មីកើនដល់ ៣៣២ ៣៤៨ ករណី ក្នុងរយៈពេល ២៤ ម៉ោង។ ចំនួនជាង ៣៣ ម៉ឺនករណី ក្នុងរយៈពេលត្រឹមតែមួយថ្ងៃនេះ គឺជាចំនួនដ៏ច្រើនសម្បើមណាស់ គឺលើសប្រទេសណាៗទាំងអស់លើពិភពលោកចាប់តាំងពីផ្ទុះមានជំងឺរាតត្បាតកូវីដនេះមក។
ចំណែក ចំនួនអ្នកស្លាប់ប្រចាំថ្ងៃដោយារជំងឺកូវីដ នៅក្នុងប្រទេសឥណ្ឌា ក៏បានកើនខ្លាំងណាស់ដែរ។ អត្រាអ្នកស្លាប់មានជិត ២ ២៥០ នាក់ ត្រូវបានប្រកាសនៅព្រឹកថ្ងៃសុក្រនេះ ។
ករណីឆ្លងកូវីដនៅក្នុងប្រទេសឥណ្ឌា ផ្ទុះកើនមកវិញខ្លាំងយ៉ាងឆាប់រហ័សក្នុងរយៈពេលមួយខែកន្លងមកនេះ។ មូលហេតុចំបងនៅពីក្រោយរលកឆ្លងដ៏ធំនេះ ទី១ គឺដោយសារវិធានាការសុវត្ថិភាពធូររលុងរបស់អាជ្ញាធរឥណ្ឌា ដែលបានអនុញ្ញាតឲ្យមនុស្សម្នាណែនណាន់តាន់តាប់រាប់លាននាក់ ចូលរួមក្នុងពិធីបុណ្យសាសនាហិណ្ឌូមួយនៅឯទន្លេគង្គារ កាលពីថ្ងៃទី១២ មេសា ២០២១។ ចំណែក មូលហេតុទី២ គឺមេរោគបំប្លែងខ្លួនថ្មី ដែលមានចំនួនច្រើន យ៉ាងហោច ៦ នៅក្នុងប្រទេសឥណ្ឌា។
ចំពោះ ការអនុញ្ញាតឲ្យប្រជាជនចំនួនដល់រាប់លាននាក់ ប្រជ្រៀតគ្នាណែនចង្អៀត ចូលរួមក្នុងពិធីបុណ្យសាសនា រដ្ឋាភិបាលឥណ្ឌាទទួលរងនូវការរិះគន់ខ្លាំងថាបានព្រងើយកន្តើយ គ្មានដាក់ការប្រុងប្រយ័ត្នខ្ពស់ រក្សាគម្លាតទាល់តែសោះ រហូតបណ្តាលឲ្យផ្ទុះករណីឆ្លងខ្លាំង៕
