រដ្ឋធានីកៀវ៖ សង្គ្រាមរបស់ប្រធានាធិបតីរុស្ស៊ី លោក វ្ល៉ាឌីមៀ ពូទីន បានអូសន្លាយ អស់រយៈពេល២៧២ថ្ងៃ គិតត្រឹមថ្ងៃទី២២ ខែវិច្ឆិកា ខណៈការវាយប្រយុទ្ធកំពុងតែបន្ដ ប៉ុន្ដែនៅក្នុងរយៈពេល២៤ម៉ោងកន្លងមកនេះ អ៊ុយក្រែន បានអះអាង អំពីការសម្លាប់ទាហានរបស់ក្រុងមូស្គូ ចំនួន៤០០នាក់ ធ្វើឲ្យក្រុងមូស្គូ បាត់បង់កម្លាំងយោធា កើនឡើងជាង៨ម៉ឺននាក់។
សារព័ត៌មាន Ukrinform បានចេញផ្សាយ កាលពីព្រឹក ថ្ងៃអង្គារ ទី២២ ខែវិច្ឆិកា ថា បើតាមអគ្គសេនាធិការកងទ័ពអ៊ុយក្រែន បានបញ្ជាក់ នៅក្នុងសេចក្ដីរាយការណ៍របស់ខ្លួន ហើយត្រូវបានបង្ហោះ នៅលើបណ្ដាញសង្គមហ្វេសប៊ុក ថា ចាប់តាំងពីការផ្ទុះសង្គ្រាម កាលពីថ្ងៃទី២៤ ខែកុម្ភៈ រហូតមកដល់ថ្ងៃទី២២ ខែវិច្ឆិកា កងទ័ពការពារទឹកដីរបស់អ៊ុយក្រែន បានសម្លាប់ទាហានរុស្ស៊ី កើនដល់៨៥ ០០០នាក់។
ប្រភពពីកងទ័ពអ៊ុយក្រែន ដដែល បានបន្ដថា ក្រៅពីការសម្លាប់ទាហានរុស្ស៊ី នោះ កងទ័ពការពារទឹកដីអ៊ុយក្រែន ក៏បានកម្ទេចគ្រឿងចម្បាំង អស់ជាច្រើនប្រភេទបន្ថែមទៀត មានតម្លៃរាប់ពាន់លានដុល្លារអាមេរិក រួមមាន រថក្រោះ ចំនួន ២ ៨៩៥គ្រឿង, រថពាសដែក ៥ ៨២៧គ្រឿង, ប្រព័ន្ធកាំភ្លើងធំ ចំនួន១ ៨៨២គ្រឿង, ប្រព័ន្ធប្រឆាំងនឹងយន្ដហោះចម្បាំង ចំនួន ២០៩គ្រឿង, យន្ដហោះចម្បាំង ចំនួន ២៧៩គ្រឿង, ឧទ្ធម្ភាគចក្រ ចំនួន ២៦១គ្រឿង, ដ្រូនយុទ្ធសាស្ដ្រ ចំនួន ១ ៥៣៧គ្រឿង, នាវាចម្បាំងតូចធំ ចំនួន១៦គ្រឿង, រថយន្ដយោធា និង ដឹកប្រេងឥន្ធនៈ ចំនួន៤ ៣៩៣គ្រឿង …ព្រមទាំងគ្រឿងសឹកជាច្រើនទៀត។
ទោះជាយ៉ាងណា រុស្ស៊ី នៅមិនទាន់ប្រតិកម្មភ្លាមៗ ប្រឆាំងនឹងការលើកឡើងរបស់អ៊ុយក្រែន ជុំវិញចំនួនទាហានរបស់ខ្លួនស្លាប់ កើនឡើង រាប់ម៉ឺននាក់នោះដែរ។ ប៉ុន្ដែជាការពិតណាស់ ក្រុងមូស្គូ ក៏កម្រនឹងប្រកាស អំពីការបាត់បង់ទាហាន នៅក្នុងសមរភូមិ។
ដោយឡែក លោក ឡយ អូស្ទីន (Lloyd Austin) រដ្ឋមន្ដ្រីក្រសួងការពារជាតិសហរដ្ឋអាមេរិក បានថ្លែង កាលពីប៉ុនា្មនថ្ងៃមុននេះ ថា ទាហានរុស្ស៊ី បានបាត់បង់ជីវិត និង រងរបួស នៅក្នុងសង្គ្រាម នៅអ៊ុយក្រែន ប្រហែលជា១០ម៉ឺននាក់។ ចំណែកចំនួនកម្លាំងការពារទឹកដីរបស់ក្រុងកៀវ ក៏រងគ្រោះថ្នាក់ ប្រហាក់ប្រហែលគ្នាដែរ៕
