រដ្ឋធានីមូស្គូ៖ ស្របពេលស្ថានការណ៍ពិភពលោកកំពុងតែឡើងកម្ដៅជាមួយនឹងលោកខាងលិច ជុំវិញសង្គ្រាម នៅអ៊ុយក្រែន នោះ ប្រធានាធិបតីចិន និង រុស្ស៊ី គ្រោងនឹងជួបពិភាក្សាគ្នា អំពីការងារសំខាន់ៗជាច្រើន ដើម្បីរួបរួមគ្នាកសាងសណ្ដាប់ធ្នាប់ពិភពលោកជាថ្មី។
សារព័ត៌មាន The Jakarta Post បានចេញផ្សាយ កាលពីថ្ងៃអង្គារ ទី១៣ ខែកញ្ញា ថា មន្ដ្រីការទូតជាន់ខ្ពស់របស់ចិនមួយរូប បានថ្លែងថា ក្រុងប៉េកាំង មានឆន្ទៈ នៅក្នុងការរៀបចំសណ្តាប់ធ្នាប់អន្តរជាតិរួមគ្នា ជាមួយនឹងរុស្ស៊ី នៅក្នុង«ទិសដៅត្រឹមត្រូវ និង សមហេតុផលជាងនេះ» ខណៈមេដឹកនាំប្រទេសទាំងពីរ កំពុងតែរៀបចំកិច្ចប្រជុំ នៅសប្តាហ៍នេះ។
ជាមួយនឹងអតីតសម្ពន្ធមិត្ត នាសម័យសង្គ្រាមត្រជាក់ ដែលមានទំនាក់ទំនងយ៉ាងស្អិតល្មួតនោះ ចិន និង រុស្ស៊ី បានខិតចូលមកកាន់ជិតគ្នា នៅក្នុងរយៈពេលប៉ុន្មានឆ្នាំកន្លងទៅថ្មីៗនេះ តាមអ្វីដែលមេដឹកនាំប្រទេសទាំង២ ហៅ ជាទំនាក់ទំនង «គ្មានដែនកំណត់» ដោយដើរតួជាអ្នកប្រឆាំងនឹងការត្រួតត្រានៅពិភពលោករបស់សហរដ្ឋអាមេរិក។
ក្រសួងការបរទេសចិន បានចុះផ្សាយ កាលពីថ្ងៃទី១២ ខែកញ្ញា ថា ប្រមុខកិច្ចការបរទេសរបស់បក្សកុម្មុយនិស្ត លោក យ៉ាង ជាឈី (Yang Jiechi) បានប្រាប់ លោក អេនដ្រេ ដេនីសូវ (Andrey Denisov) ឯកអគ្គរដ្ឋទូតរុស្ស៊ី ប្រចាំនៅប្រទេសចិន ថា «ក្រោមការណែនាំជាយុទ្ធសាស្ត្ររបស់ប្រធានាធិបតីចិន លោក ស៊ី ជិនពីង (Xi Jinping) និងប្រធានាធិបតីរុស្ស៊ី លោក វ្ល៉ាឌីមៀរ ពូទីន (Vladimir) Putin) គឺទំនាក់ទំនង រវាងប្រទេសទាំងពីរតែងតែឆ្ពោះទៅមុខ លើផ្លូវត្រូវ»។
បើតាមក្រសួងការបរទេសចិន បានឲ្យដឹងថា លោក Yang បានមានប្រសាសន៍ ថា «ចិនមានឆន្ទៈ នៅក្នុងការធ្វើការជាមួយប្រទេសរុស្ស៊ី ដើម្បីបន្តអនុវត្តស្មារតី នៃកិច្ចសហប្រតិបត្តិការ ជាយុទ្ធសាស្ត្រកម្រិតខ្ពស់ រវាងប្រទេសទាំងពីរ ការពារផលប្រយោជន៍រួមរបស់ភាគីទាំងពីរ និងជំរុញការអភិវឌ្ឍ លើសណ្តាប់ធ្នាប់អន្តរជាតិ នៅក្នុងទិសដៅដ៏ត្រឹមត្រូវ និង សមហេតុផលជាងនេះ»។
បើតាមឯកសារចុះផ្សាយរបស់ក្រសួងការបរទេសចិន បានបន្ថែមថា ជាការឆ្លើយតបនោះ លោក Denisov បានកោតសរសើរ អំពីលទ្ធផលផ្លែផ្កា នៃទំនាក់ទំនងទ្វេភាគី។ រុស្ស៊ី បានព្យាយាមពង្រឹងទំនាក់ទំនង ជាមួយបណ្តាប្រទេសអាស៊ី ជាពិសេស ប្រទេសចិន ចាប់តាំងពីក្រុងមូស្គូ បានរងនូវទណ្ឌកម្មរបស់លោកខាងលិច មិនធ្លាប់មានពីមុនមក ជុំវិញការឈ្លានពានរបស់វិមានក្រឹមឡាំង ទៅលើប្រទេសអ៊ុយក្រែន។
ការបង្កើនភាពតានតឹង រវាងចិន និង លោកខាងលិច ក្រុងប៉េកាំងមិនបានថ្កោលទោស ចំពោះអន្តរាគមន៍យោធារបស់ក្រុងមូស្គូ នៅក្នុងប្រទេសអ៊ុយក្រែន នោះឡើយ ហើយបានផ្តល់ការបិទបាំងការទូត ដោយរារាំងដល់ទណ្ឌកម្មរបស់លោកខាងលិច និង ការលក់គ្រឿងសព្វាវុធ ទៅដល់ក្រុងកៀវ។
លោក វ្ល៉ាឌីមៀរ ពូទីន (Vladimir Putin) ប្រធានាធិបតីរុស្ស៊ី និង សមភាគីចិន លោក ស៊ី ជិនពីង គ្រោងនឹងជួបគ្នា នៅក្នុងប្រទេសអ៊ូសបេគីស្ថាន (Uzbekistan) នាសប្តាហ៍នេះ នៅខាងក្រៅកិច្ចប្រជុំកំពូល នៃបណ្តាប្រទេសក្នុងតំបន់។ ដោយឡែក លោក លី ហ្សានស៊ូ (Li Zhanshu) សមាជិកសភាកំពូល នៃទីក្រុងប៉េកាំង កាលពីសប្តាហ៍មុន បានក្លាយជាអ្នកនយោបាយបក្សកុម្មុយនិស្តចិន មានឋានៈខ្ពស់បំផុត នៅក្នុងការធ្វើដំណើរទៅកាន់ប្រទេសរុស្ស៊ី ចាប់តាំងពីការឈ្លានពាន ទៅលើប្រទេសអ៊ុយក្រែន មក។ លោក លី បានសាទរ ចំពោះ«កម្រិតទំនាក់ទំនងគួរឲ្យទុកចិត្តបាន មិនធ្លាប់មានពីមុន និង កិច្ចសហប្រតិបត្តិការ រវាងក្រុងម៉ូស្គូ និង ក្រុងប៉េកាំង៕
