រដ្ឋធានីកៀវ៖ រហូតមកដល់ពេលនេះ កងទ័ពអ៊ុយក្រែនបានរកឃើញដ្រូនអត្តឃាត តាមអ្វីដែល បណ្ដាមន្ដ្រីយោធាបស្ចិមលោក បានអះអាង កាលពីខែកក្កដា ថា អ៊ីរ៉ង់ នឹងផ្គត់ផ្គង់ដ្រូនអត្ដឃាត រាប់រយគ្រឿង ជួយដល់កម្លាំងទាហានរុស្ស៊ី ដើម្បីយកមកធ្វើសង្គ្រាម វាយប្រហារទៅលើកងទ័ពអ៊ុយក្រែន។
សារព័ត៌មាន Al Jazeera បានចេញផ្សាយ កាលពីព្រឹក ថ្ងៃទី១៤ ខែកញ្ញា ថា កងទ័ពអ៊ុយក្រែន បានអះអាង ពីការប្រទះឃើញដ្រូនអត្ដឃាតរបស់អ៊ីរ៉ង់ ត្រូវបានកម្លាំងទាហានរុស្ស៊ី ប្រើប្រាស់ ជាលើកដំបូង នៅក្នុងសមរភូមិ។ ការផ្គត់ផ្គង់ដ្រូនអត្ដឃាតរបស់អ៊ីរ៉ង់ ជួយដល់កម្លាំងទាហានរុស្ស៊ី បានបង្ហាញ អំពីចំណងទំនាក់ទំនង កាន់តែស៊ីជម្រៅ រវាងរដ្ឋាភិបាលក្រុងមូស្គូ និង ក្រុងតេអ៊ីរ៉ង់។
នាយកដ្ឋានទំនាក់ទំនងយុទ្ធសាស្ត្ររបស់កងទ័ពអ៊ុយក្រែន បានផ្សព្វផ្សាយរូបភាព អំពីបំណែកយន្តហោះគ្មានមនុស្សបើក ឬដ្រូន ដែលត្រូវបានបាញ់កម្ទេចចោលនោះ។ ដ្រូននោះ មានលក្ខណៈស្រដៀងនឹងត្រីកោណ ឬ រាងជាដីសណ្ត ត្រូវបង្ហោះដោយអ៊ីរ៉ង់ ហើយគេស្គាល់ថា ជា Shahed ។
មន្ដ្រីយោធាអ៊ុយក្រែន បានបញ្ជាក់ថា កម្លាំងការពារទឹកដីក្រុងកៀវ បានប្រទះឃើញដ្រូននេះ នៅជិតទីក្រុងគូពីយ៉ាន់ (Kupiansk) ស្ថិតក្នុងតំបន់ខាគីវ (Kharkiv) ចំពេលក្រុងកៀវ កំពុងតែវាយទម្លុះខ្សែបន្ទាត់សមរភូមិរបស់ទាហានរុស្ស៊ី នៅជុំវិញតំបន់នោះ។
ទីភ្នាក់ងារស៊ើបការណ៍សម្ងាត់របស់សហរដ្ឋអាមេរិក បានព្រមាន ជាសាធារណៈ កាលពីខែកក្កដា កន្លងទៅ ថា រដ្ឋាភិបាលក្រុងតេអ៊ីរ៉ង់ គ្រោងនឹងបញ្ជូនដ្រូន ផ្ទុកគ្រាប់បែក មានចំនួនរាប់រយគ្រឿង ទៅកាន់ប្រទេសរុស្ស៊ី ដើម្បីជួយដល់សង្គ្រាមរបស់ក្រុងមូស្គូ នៅក្នុងប្រទេសអ៊ុយក្រែន។ មុនដំបូង អ៊ីរ៉ង់ បានបដិសេធការអះអាងរបស់សហរដ្ឋអាមរិក ប៉ុន្ដែកាលពីពេលថ្មីៗនេះ ប្រមុខឆ្មាំបដិវត្តន៍ទាហានប៉ារ៉ារបស់ក្រុងតេអ៊ីរ៉ង់ បានអួតអាង អំពីការផ្គត់ផ្គង់គ្រឿងសព្វាវុធ ដល់ប្រទេសមហាអំណាចកំពូល នៅលើពិភពលោក៕