រដ្ឋធានីសេអ៊ូល៖ អនុប្រធានាធិបតីសហរដ្ឋអាមេរិក នឹងមកបំពេញទស្សនកិច្ច នៅតំបន់គ្មានយោធា (DMZ) ពុះចែកកូរ៉េទាំង២ ដើម្បីបង្ហាញពីការប្ដេជ្ញាចិត្តយ៉ាងរឹងមាំរបស់ក្រុងវ៉ាស៊ីនតោន ដើម្បីការពារសន្ដិសុខរបស់កូរ៉េខាងត្បូង ក្រោយពេលកូរ៉េខាងជើង បាញ់មីស៊ីលបាលិស្ទីក សំដៅទៅសមុទ្រ។
សារព័ត៌មាន Bloomberg បានចេញផ្សាយ កាលពីថ្ងៃអង្គារ ទី២៧ ខែកញ្ញា ថា ការប្រកាស អំពីដំណើរទស្សនកិច្ចរបស់លោកស្រី កាម៉ាឡា ហាររីស (Kamala Harris) អនុប្រធានាធិបតីសហរដ្ឋអាមេរិក ទៅកាន់នៅតំបន់គ្មានយោធា (DMZ) នោះ បានកើតឡើង ក្រោយពេលកូរ៉េខាងជើង បាញ់សាកល្បងមីស៊ីលបាលិស្ទីក ទៅកាន់សមុទ្រ និង ចំពេលមានការព្រួយបារម្ភ និង ការភ័យខ្លាច អំពីការសាកល្បងអាវុធនុយក្លេអ៊ែរ ដែលអាចកើតមាន ខណៈការប៉ុនប៉ងរបស់រដ្ឋបាលលោក ចូ បៃដិន ទាក់ទងទៅកាន់មេដឹកនាំកូរ៉េខាងជើង លោក គីម ជុងអ៊ុន (Kim Jong Un) បានទទួលបរាជ័យ។
លោក ហាន ឌូក-ស៊ូ (Han Duck-soo) នាយករដ្ឋមន្ដ្រីកូរ៉េខាងត្បូង បានអះអាង អំពីដំណើរទស្សនកិច្ចរបស់លោកស្រី ហាររីស នៅក្នុងអំឡុងមានជំនួបជាមួយនឹងលោកស្រី អនុប្រធានាធិបតីសហរដ្ឋអាមេរិក នៅក្នុងទីក្រុងតូក្យូ។ លោកស្រី អនុប្រធានាធិបតី កំពុងតែស្ថិតក្នុងតំបន់នេះ ដើម្បីដឹកនាំគណៈប្រតិភូរបស់ប្រធានាធិបតីសហរដ្ឋអាមេរិក មកចូលរួមពិធីបុណ្យសពរបស់អតីតនាយករដ្ឋមន្ត្រីរបស់ជប៉ុន លោក ស៊ីនហ្ស៊ូ អាបេ (Shinzo Abe)។
មន្ដ្រីសហរដ្ឋអាមេរិក បានបញ្ជាក់ ថា «រហូតមកដល់ពេលនេះ មានរយៈជិត៧០ឆ្នាំកន្លងមកហើយ ចាប់តាំងពីមានបទឈប់បាញ់គ្នា រវាងកូរ៉េទាំង២ ហើយដំណើរទស្សនកិច្ចនេះ នឹងបញ្ជាក់ អំពីភាពរឹងមាំរបស់សម្ពន្ធមិត្ត រវាងរដ្ឋាភិបាលក្រុងសេអ៊ូល និង ក្រុងវ៉ាស៊ីនតោន នៅក្នុងការប្រឈមមុខនឹងការគំរាមកំហែងណាមួយ បង្កឡើងដោយកូរ៉េខាងជើង»។
មន្ដ្រីសហរដ្ឋអាមេរិក បានបន្ថែម ថា លោកស្រី អនុប្រធានាធិបតី នឹងធ្វើដំណើរទៅកាន់តំបន់គ្មានកងទ័ព ដើម្បីជួបជាមួយនឹងទីភ្នាក់ងារសន្ដិសន្ដិសុខ ទទួលការសង្ខេបប្រតិបត្តិការ ពីមេបញ្ជាការសហរដ្ឋអាមេរិក ឆ្លុះបញ្ចាំង អំពីការលះបង់រួមគ្នារបស់ទាហានអាមេរិក និង កូរ៉េខាងត្បូង ហើយបញ្ជាក់ឡើងវិញនូវការប្តេជ្ញាចិត្តយ៉ាងរឹងមាំ ចំពោះសន្តិសុខកូរ៉េខាងត្បូង។
កងទ័ពសហរដ្ឋអាមេរិក កាលពីថ្ងៃទី២៣ ខែកញ្ញា បានបញ្ជូននាវាផ្ទុកយន្ដហោះចម្បាំង USS Ronald Reagan ទៅដល់ប្រទេសកូរ៉េខាងត្បូង ដើម្បីចូលរួមធ្វើសមយុទ្ធយោធារួមគ្នា។ ការមកដល់នាវាផ្ទុកយន្ដហោះដើរដោយថាមពលនុយក្លេអ៊ែរជាលើកដំបូងរបស់សហរដ្ឋអាមេរិក ចាប់ពីឆ្នាំ២០១៧មកនោះ ត្រូវបានគេមើលឃើញថា ជាការបង្ហាញ អំពីកម្លាំងយោធាដ៏ខ្លាំងក្លារបស់ខ្លួន ចំពេលមានការគំរាមកំហែង ពីប្រទេសកូរ៉េខាងជើង មកលើកូរ៉េខាងត្បូង៕
