រដ្ឋធានីមូស្គូ៖ ក្រុងមូស្គូ បានចាប់ខ្លួនមន្ត្រីការទូតម្នាក់របស់ជប៉ុន នៅក្នុងទីក្រុងវ្ល៉ាឌីវ៉ូស្ដុក (Vladivostok) នៅភាគខាងកើត ប្រទេសរុស្ស៊ី ក្រោមការចោទប្រកាន់ ពីបទប្រព្រឹត្ដចារកម្ម ហើយបានបណ្ដេញមន្ត្រីទូតរូបនោះ ចេញពីប្រទេសរបស់ខ្លួន។
ទីភ្នាក់ងារសារព័ត៌មាន AP បានចេញផ្សាយ កាលពីថ្ងៃចន្ទ ទី២៦ ខែកញ្ញា ថា រុស្ស៊ី កាលពីថ្ងៃចន្ទ បានចាប់ឃុំខ្លួនមន្ដ្រីការទូតមួយរូបរបស់ជប៉ុន នៅក្នុងទីក្រុង Vladivostok ។ ក្រុងមូស្គូ បានចោទប្រកាន់មន្ដ្រីការទូតរូបនោះ ពីការអនុវត្ដការងារពាក់ព័ន្ធនឹងចារកម្ម ។
ទីភ្នាក់ងារស៊ើបការណ៍សម្ងាត់របស់សហព័ន្ធន៍រុស្ស៉ី (FSB) បាន បានបញ្ជាក់ នៅក្នុងសេចក្ដីថ្លែងការណ៍របស់ខ្លួន ថា «រុស្ស៊ី បានចាប់ខ្លួនមន្ត្រីការទូតមួយរូបរបស់ជប៉ុន ខណៈកំពុងតែប្រព្រឹត្ត អំពើខុសច្បាប់ នាអំឡុងទទួលព័ត៌មានសម្ងាត់ ជាថ្នូរនឹងការផ្ដល់ប្រាក់។ ចំណែកព័ត៌មានសម្ងាត់ ដែលមន្ត្រីការទូតជប៉ុន រូបនេះទទួលបាន មានការជាប់ពាក់ព័ន្ធនឹងកិច្ចសហប្រតិបត្តិការរបស់រុស្ស៉ី ជាមួយបណ្ដាប្រទេសដទៃ នៅក្នុងតំបន់ឥណ្ឌូ-ប៉ាស៊ីហ្វិក ព្រមទាំងព័ត៌មានមួយចំនួនទៀត ពាក់ព័ន្ធនឹងផលប៉ះពាល់ អំពីទណ្ឌកម្មរបស់បណ្ដាប្រទេសបស្ចិមលោក»។
ទោះជាយ៉ាងណា ក្រសួងការបរទេសរុស្ស៉ី បានទុកពេលវេលា រហូតដល់៤៨ម៉ោង សម្រាប់មន្ដ្រីការទូតជប៉ុនរូបនេះ ចាកចេញពីប្រទេសរុស្ស៊ី។ ក្រៅពីនេះ ទីភ្នាក់ងារ FSB ក៏បានដាក់ កំណត់ទូត តវ៉ាទៅកាន់ជប៉ុន ជាមួយការកំណត់អត្តសញ្ញាណមន្ត្រីការទូតជប៉ុន ជា «អគ្គស្ថានកុងស៊ុល» ប្រចាំនៅទីក្រុង វ្ល៉ាឌីវ៉ូស្ដុក ឈ្មោះ ម៉ូតូគិ តាតស៊ុណូរិ (Motoki Tatsunori) ថែមទៀតផង៕