រដ្ឋធានីហាណូយ៖ ព្យុះកំណាចទីហ្វុង Noru បានវាយប្រហារ សំដៅមកលើប្រទេសវៀតណាម រហូតធ្វើឲ្យអាជ្ញាធរ នៃប្រទេសអាស៊ានមួយនេះ បង្ខំចិត្តបិទអាកាសយានដ្ឋាន និងដាក់បម្រាមគោចរ ហើយជម្លៀសមនុស្សរាប់ម៉ឺននាក់ ទៅកាន់ទីមានសុវត្ថិភាព។
ទីភ្នាក់ងារសារព័ត៌មានរបស់ចក្រភពអង់គ្លេស Reuters បានចេញផ្សាយ កាលពីថ្ងៃអង្គារ ទី២៧ ខែកញ្ញា ថា វៀតណាម បានបិទអាកាសយានដ្ឋាន ប្រកាសបម្រាមគោចរ និង ជំរុញមនុស្សរាប់ពាន់នាក់ ជម្លៀសខ្លួន កាលពីថ្ងៃអង្គារ ខណៈព្យុះទីហ្វុង Noru កាន់តែមានកម្លាំងខ្លាំង មកកាន់ប្រទេសនេះ ក្រោយពេលគ្រោះធម្មជាតិនេះ បានបណ្តាលឱ្យមនុស្ស យ៉ាងហោចណាស់៨នាក់ស្លាប់ និង បង្កជាទឹកជំនន់រីករាលដាល នៅក្នុងប្រទេសហ្វីលីពីន។
ព្យុះទីហ្វុង Noru បានបោកបក់មកដល់ប្រទេសវៀតណាម នៅថ្ងៃពុធនេះ ហើយវាបានបន្ថយឥទ្ធិពល មកនៅត្រឹមកម្រិតជាព្យុះត្រូពិកវិញ។ ប៉ុន្តែទោះជាយ៉ាងណាក៏ដោយ អាជ្ញាធរវៀតណាម បានព្រមានដល់ប្រជាជនរបស់ខ្លួន ឲ្យស្ថិតក្នុងការបន្តប្រុងប្រយ័ត្នខ្ពស់ជាប់ជានិច្ច ដោយសារមានការព្រួយបារម្ភ អំពីហានិភ័យ ពីគ្រោះទឹកជំនន់ និង ការរអិលបាក់ដី បង្កឡើងដោយសារភ្លៀងធ្លាក់ខ្លាំង។
ព្យុះទីហ្វុង Noru បានវាយប្រហារលើខេត្ត កាងណាំ (Quang Nam) ប្រទេសវៀតណាម នៅក្នុងល្បឿន ១១៧គីឡូម៉ែត្រ ក្នុងមួយម៉ោង កាលពីវេលារំលងអធ្រាត្រ ឈានចូល ថ្ងៃពុធ ទី២៨ ខែកញ្ញា។
ទោះជាយ៉ាងណា អាជ្ញាធរវៀតណាម នៅមិនទាន់រាយការណ៍ភ្លាមៗ អំពីទំហំខូចខាត និង គ្រោះថ្នាក់ដល់មនុស្ស ដែលបង្កឡើង ដោយគ្រោះធម្មជាតិនេះ។ ព្យុះកំណាចទីហ្វុង Noru នេះ បានវាយប្រហារ ទៅលើប្រទេសហ្វីលីពីន ដោយផ្ដាច់ជីវិតមនុស្ស ៨នាក់ កាលពីយប់ ថ្ងៃអាទិត្យ ចុងសប្ដាហ៍កន្លងទៅនេះ មុននឹងមកដល់ប្រទេសវៀតណាម៕
