រដ្ឋធានីកៀវ៖ ក្រោយការពេលមានហេតុការណ៍បំផ្ទុះស្ពានយុទ្ធសាស្ដ្រ តភ្ជាប់ដែនគោករបស់រុស្ស៊ី ដែលបានប្លន់យកពីអ៊ុយក្រែន នៅក្នុងអំឡុងឆ្នាំ២០១៤នោះមក ប្រធានាធិបតីរុស្ស៊ី បានផ្ទុះកំហឹងយ៉ាងខ្លាំង ហើយកោះប្រជុំក្រុមប្រឹក្សាសន្ដិសុខរបស់គាត់ និង ចោទប្រកាន់ដល់ក្រុងកៀវ បានប្រព្រឹត្ដអំពើភេរវកម្ម រួចបញ្ជាឲ្យបាញ់មីស៊ីល ស្រោចទៅលើប្រទេសអ៊ុយក្រែន ដែលមានតម្លៃសរុប ចន្លោះពី៤០០លានដុល្លារ ទៅ៧០០លានដុល្លារសហរដ្ឋអាមេរិក ដែលស្មើនឹងប្រាក់ខែទាហានរុស្ស៊ី ចន្លោះពី១០ម៉ឺន ទៅជិត ២០ម៉ឺននាក់។
ក្រុងមូស្គូ មុននឹងចាប់ផ្ដើមកំណែនទ័ព តាមបទបញ្ជារបស់លោក វ្ល៉ាឌីមៀ ពូទីន (Vladimir Putin) កាលពីអំឡុងខែកញ្ញា នោះ បានប្រកាសជ្រើសរើសអ្នកស្ម័គ្រ ចូលកងទ័ព ដោយធានានឹងផ្ដល់ប្រាក់ខែ រហូតដល់៤០០០ដុល្លារសហរដ្ឋអាមេរិក។ លើសពីនេះទៅទៀត ក្រុងមូស្គូ ថែមទាំងលើកទឹកចិត្តដល់អ្នកទោស ឲ្យទៅចូលរួម នៅក្នុងសង្គ្រាម ជាថ្នូរនឹងលុយកាក់ ហើយការលើកលែងទោស។ ប៉ុន្ដែទំនងជាការគោលនយោបាយរបស់ក្រុងមូស្គូ មិនមានប្រសិទ្ធភាព ទើបមានការចាប់បង្ខំកំណែនទ័ពតែម្ដង។
ដោយឡែក ព្រឹត្ដិការណ៍ កាលពីថ្ងៃសៅរ៍ កន្លងទៅនេះ បានបំផ្ទុះស្ពានយុទ្ធសាស្ដ្រ តភ្ជាប់ពីរុស្ស៊ី ទៅកាន់ឧបទ្វីបគ្រីមៀ ដែលរឹបអូសបានពីអ៊ុយក្រែន កាលពីឆ្នាំ២០១៤នោះ បានធ្វើឲ្យប្រធានាធិបតីរុស្ស៊ី លោក វ្ល៉ាឌីមៀ ពូទីន ខឹងសម្បាយ៉ាងខ្លាំង ហើយបានបញ្ជាឲ្យបាញ់ស្រោចមីស៊ីល ទៅលើទីក្រុងនានា នៅទូទាំងប្រទេសអ៊ុយក្រែន កាលពីថ្ងៃចន្ទ។
សារព័ត៌មាន Newsweek បានចេញផ្សាយ កាលពីព្រឹក ថ្ងៃអង្គារ ទី១១ ខែតុលា ថា ប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) កាលពីថ្ងៃអាទិត្យ បានចោទប្រកាន់អ៊ុយក្រែន ពីការរៀបចំការបំផ្ទុះដ៏មានកម្លាំងខ្លាំង បំផ្លាញស្ពានគ្រីមៀ។ មេដឹកនាំវិមានក្រឹមឡាំង រូបនេះ បានចាត់ទុកការបំផ្ទុះស្ពានយុទ្ធសាស្ដ្រគ្រីមៀ ដែលតភ្ជាប់ពីដីគោករបស់ប្រទេសរុស្ស៊ី ទៅកាន់ឧបទ្វីបគ្រីមៀ ជា«អំពើភេរវកម្ម»។
ប្រធានាធិបតិរុស្ស៊ី បានបញ្ជាក់ នៅក្នុងវីដេអូ នៅលើបណ្ដាញតេឡេក្រាមរបស់វិមានក្រឹមឡាំង ថា «មិនចាំបាច់សង្ស័យអ្វីទៀតទេ។ នេះជាសកម្មភាព អំពើភេរវកម្ម ដោយមានគោលដៅបំផ្លិចបំផ្លាញហេដ្ឋារចនាសម្ព័ន្ធស៊ីវិលដ៏សំខាន់នេះ។ ចំណែកការបំផ្ទុះស្ពាននេះ ត្រូវបានរៀបចំ អនុវត្ដ និង ចេញបញ្ជា ដោយទីភា្នក់ងារពិសេសរបស់ប្រទេសអ៊ុយក្រែន»។
លោក វ្ល៉ាឌីមៀ ពូទីន (Vladimir Putin) បានបញ្ជាក់ថា គាត់បានបញ្ជាឲ្យវាយប្រហារសងសឹក ចំពោះការវាយប្រហារភេរវកររបស់ក្រុងកៀវ បំផ្លាញស្ពានឃើច (Kerch) តភ្ជាប់ពីដីគោករបស់រុស្ស៊ី ទៅកាន់ឧបទ្វីបគ្រីមៀ។
បណ្ដាមេដឹកនាំអឺរ៉ុបជាច្រើនប្រទេស បានថ្កោលទោស ចំពោះការវាយប្រហាររបស់រុស្ស៊ី មកលើប្រទេសអ៊ុយក្រែន។ មេដឹកនាំទាំងនេះ បានប្ដេជ្ញាបន្ដគាំទ្រ ផ្ដល់ជំនួយយោធាបន្ថែមទៀត ជួយដល់ក្រុងកៀវ។
ដោយឡែក មេដឹកនាំក្រុងកៀវ បានចាត់ទុកការវាយប្រហាររបស់រុស្ស៊ី មកលើប្រទេសអ៊ុយក្រែ ជាសកម្មភាព«ភេរវកម្ម»។ សកម្មភាពរបស់ក្រុងមូស្គូ បានកាត់ផ្ដាច់បណ្ដាញអគ្គិសនី ខូចខាតហេដ្ឋរចនាសម្ព័ន្ធ និង សម្លាប់មនុស្ស យ៉ាងតិច ១៤នាក់ និង រងរបួស ជាង៩០នាក់។
អគ្គសេនាធិការកងទ័ពអ៊ុយក្រែន ដែលធ្វើបច្ចុប្បន្នភាព អំពីប្រតិបត្ដិការសឹករបស់រុស្ស៊ី បានឲ្យដឹង ថា កម្លាំងទាហានក្រុងមូស្គូ កាលពីថ្ងៃចន្ទ បានបាញ់មីស៊ីល ចំនួន៨៤គ្រប់ និង ដ្រូន ចំនួន២៤គ្រឿង។ ក្នុងចំណោមមីស៊ីលទាំងនោះ ត្រូវបានប្រព័ន្ធការពារដែនអាកាសរបស់អ៊ុយក្រែន ស្ទាក់ចាប់បានចំនួន៤៣គ្រាប់។ ចំណែកមីស៊ីល ដែលបានបាញ់ទាំងនោះ ត្រូវបានទស្សនាវដ្ដី Forbes ស្គាល់ រួមមាន មីស៊ីល Kh-101, មីស៊ីល Kh-555, មីស៊ីលកាលីប៊ឺ (Caliber), មីស៊ីលអ៊ីសខានដឺរ (Iskander), មីស៊ីល S-300 និង មីស៊ីលថ័រណាដូ-អេស (Tornado-S)។
ក្រោយពេលទស្សនាវដ្ដីពាណិជ្ជកម្ម Forbes នេះបានដឹង អំពីប្រភេទមីស៊ីលទាំងអស់នេះ ហើយ ក៏បានចាប់ផ្ដើមប៉ាន់ប្រមាណ អំពីតម្លៃរបស់មីស៊ីល ដែលរុស្ស៊ី ប្រើប្រាស់ កាលពីថ្ងៃចន្ទ ។ Forbes បានប្រមាណ តម្លៃមីស៊ីល និង ដ្រូន ទាំងនោះ មានតម្លៃសរុប ចន្លោះពី៤០០លានដុល្លារ ទៅ៧០០ដុល្លារសហរដ្ឋអាមេរិក។ ប៉ុន្ដែទោះជាយ៉ាងណា ទស្សនាវដ្ដីដដែលនេះ បានកត់សម្គាល់ ថា ការប៉ាន់ប្រមាណតម្លៃមីស៊ីល និង ដ្រូនរបស់ខ្លួន អាចនឹងត្រូវកែសម្រួលឡើងវិញ ខណៈទទួលបានព័ត៌មានថ្មីបន្ថែមទៀត។
បើតាមតម្លៃ នៃការចំណាយ លើមីស៊ីលរបស់កងទ័ពអ៊ុយក្រែន បាញ់រយៈពេល១ថ្ងៃ កាលពីថ្ងៃចន្ទ អាចបើកប្រាក់ខែ១ខែ ដល់ទាហានរុស្ស៊ី ចន្លោះពី១សែន ទៅជិត២សែននាក់៕