រដ្ឋធានីវ៉ាស៊ីនតោន៖ មេដឹកនាំក្រុងមូស្គូ តែងតែគំរាមកំហែងជាញឹកញាប់ ពីការប្រើប្រាស់អាវុធបរមាណូ ចាប់តាំងពីការផ្ទុះសង្គ្រាម នៅក្នុងប្រទេសអ៊ុយក្រែន កាលពីថ្ងៃទី២៤ ខែកុម្ភៈ ហើយរហូតមកដល់ពេលនេះ កម្លាំងទាហានរុស្ស៊ី ចាប់បផ្ដើមចាញ់សង្គ្រាម នៅតាមតំបន់ជាច្រើន ទើបក្រុមមន្ដ្រីក្រុងមូស្គូ មួយចំនួន បានជំរុញឲ្យមេដឹកនាំវិមានក្រឹមឡាំង ប្រើប្រាស់អាវុធនុយក្លេអ៊ែរ ដើម្បីបញ្ចប់សង្គ្រាមនេះ ទើបធ្វើឲ្យពិភពលោក មានការព្រួយបារម្ភ កាន់តែខ្លាំងឡើង ប៉ុន្ដែសម្រាប់សហរដ្ឋអាមេរិក ក៏មានសេណារីយ៉ូចំនួន៣សម្រាប់ទប់ទល់នឹងការវាយប្រហារ ដោយបរមាណូនេះដែរ។
សារព័ត៌មាន Newsweek បានចេញផ្សាយ កាលពីថ្ងៃព្រហស្បតិ៍ ទី៦ ខែតុលា ថា នៅក្នុងព្រឹត្តិការណ៍មិនទំនង ប៉ុន្តែវាមិនអាចទៅរួច ដោយសារតែប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) សម្រេចធ្វើតាមការគំរាមកំហែងរបស់គាត់ កាលពីពេលថ្មីៗ ដើម្បីទម្លាក់គ្រាប់បែកនុយក្លេអ៊ែរ ទៅលើប្រទេសអ៊ុយក្រែន។ ចំណែក សហរដ្ឋអាមេរិក វិញ ក៏នឹងមានជម្រើស អាចធ្វើទៅបាន សម្រាប់ការឆ្លើយតបនឹងសកម្មភាពនេះ។
លោក ម៉ាតធូ ក្រូនីគ (Matthew Kroenig) ជាអ្នកវិទ្យាសាស្ដ្រនយោបាយ និង ជាអតីតមន្ដ្រីទីភ្នាក់ងារស៊ើបការណ៍សម្ងាត់របស់សហរដ្ឋអាមេរិក CIA បានប្រាប់ដល់សារព័ត៌មាន Newsweek ថា «អ្វីដែលសំខាន់បំផុតនោះ សហរដ្ឋអាមេរិក ចង់ព្យាយាមរារាំងដល់ប្រធានាធិបតីរុស្ស៊ី លោក វ្ល៉ាឌីមៀ ពូទីន មិនឲ្យប្រើប្រាស់អាវុធនុយក្លេអ៊ែរ»។
អតីតមន្ដ្រី CIA រូបនេះ បានបញ្ជាក់ ថា «នោះ ជាបញ្ហាដែលរដ្ឋបាលរបស់សហរដ្ឋអាមេរិក បានព្យាយាមធ្វើ នៅក្នុងរយៈពេល១សប្តាហ៍មុន ... ប៉ុន្តែប្រសិនបើលោក ពូទីន បន្តប្រើប្រាស់អាវុធមហាប្រល័យលោក ក្រុងវ៉ាស៊ីនតោន ក៏ស្ថិតក្នុងស្ថានភាពមួយដ៏លំបាកផងដែរ»។
ការគំរាមកំហែងរបស់ប្រធានាធិបតីរុស្ស៊ី កាលពីពេលថ្មីៗនេះ ជុំវិញការប្រើប្រាស់អាវុធនុយក្លេអ៊ែរ ការពារប្រទេសរុស្ស៊ី ប្រឆាំងនឹងការវាយប្រហារ អាចលើសពីការនិយាយបំផ្លើស ដូចអ្វីដែលលោក ពូទីន ធ្លាប់គំរាម កាលពីថ្ងៃទី២១ ខែកញ្ញា នៅក្នុងអំឡុងពេលថ្លែងសុន្ទរកថា ប្រកាស អំពីការចល័តទ័ពបម្រុងមួយផ្នែក នៅក្នុងប្រទេសរបស់គាត់។
ដោយឡែក លោក ឡយ អូស្ទីន (Lloyd Austin) រដ្ឋមន្ត្រីក្រសួងការពារជាតិសហរដ្ឋអាមេរិក កាលពីថ្ងៃទី២ ខែតុលា បានបញ្ជាក់ ថា មន្ត្រីសហរដ្ឋអាមេរិក កំពុងតែពិចារណា អំពីការឆ្លើយតប នឹងអ្វីដែលអាចនឹងកើតមានឡើង ចំពោះការកើនឡើង នៃសង្គ្រាមរបស់រុស្ស៊ី នៅក្នុងប្រទេសអ៊ុយក្រែន រហូតឈានដល់ជម្លោះអាវុធនុយក្លេអ៊ែរ។ ប៉ុន្តែលោករដ្ឋមន្ដ្រី មិនបានបង្ហាញ អំពីអ្វីដែលអាចកើតមានឡើងនោះឡើយ។
ប្រសិនបើយុទ្ធសាស្ត្ររារាំងរបស់សហរដ្ឋអាមេរិក ទទួលបរាជ័យ ដោយហេតុផលណាមួយ ប្រហែលជា ដោយសារតែលោក ពូទីន មានអារម្មណ៍ ថា មានជ្រុង និង ខ្វះជម្រើសផ្សេងទៀតសម្រាប់ការលេចចេញនូវជ័យជម្នះ នៅក្នុងសង្គ្រាមអ៊ុយក្រែន។ រដ្ឋបាលរបស់ប្រធានាធិបតីសហរដ្ឋអាមេរិក លោក ចូ បៃដិន គួរតែអនុវត្តការគំរាមកំហែងរបស់ខ្លួន សម្រាប់រារាំងដល់ការប្រើប្រាស់អាវុធមហាប្រល័យលោក។
លោក ម៉ាតធូ ក្រូនីគ (Matthew Kroenig) បានសង្កត់ធ្ងន់ អំពីការឆ្លើយតបរបស់សហរដ្ឋអាមេរិក ថា «ខ្ញុំគិតថា រដ្ឋបាលរបស់លោក ចូ បៃដិន ប្រហែលជាមិនទាន់សម្រេចចិត្តនៅឡើយ ហើយប្រហែលជានឹងមិនសម្រេចចិត្តទេ រហូតដល់អាវុធនុយក្លេអ៊ែរ ត្រូវបានប្រើប្រាស់ ជាក់ស្តែង។ ខ្ញុំគិតថា បញ្ហាមួយចំនួន នៅក្នុងរដ្ឋបាលរបស់សហរដ្ឋអាមេរិក នឹងនិយាយ ថា មែនហើយ ចូរយើងធ្វើកំណែទម្រង់ដ៏តឹងរ៉ឹង ចំពោះអ្វីដែលយើងកំពុងធ្វើរួចហើយ។ ការដាក់ទណ្ឌកម្មកាន់តែច្រើន ការផ្ដល់អាវុធកាន់តែច្រើន សម្រាប់ប្រទេសអ៊ុយក្រែន ប្រហែលជាដាក់ពង្រាយកងទ័ពបន្ថែមទៀត នៅក្នុងបណ្តាប្រទេសជាសមាជិករបស់អង្គការណាតូ។ ពួកគេ នឹងប្រកែក ថា នេះជាការឆ្លើយតបយ៉ាងខ្លាំងក្លា ជាងអ្វីដែលយើងកំពុងតែធ្វើ នាពេលឥឡូវនេះ»។
បើតាមលោក ម៉ាតធូ ក្រូនីគ (Matthew Kroenig) បានឲ្យដឹងទៀត ថា នៅក្នុងសេណារីយ៉ូទី១នោះ ប្រធានាធិបតីសហរដ្ឋអាមេរិក លោក ចូ បៃដិន ត្រូវបញ្ចៀសសង្គ្រាម ដោយផ្ទាល់ជាមួយនឹងរុស្ស៊ី។ ប៉ុន្ដែគាត់ជឿ ថា មានមនុស្សជាច្រើន ដោយរួមទាំងខ្លួនគាត់ផង នឹងលើកឡើង ថា ប្រតិកម្មបែបនេះ មិនមានកម្លាំងគ្រប់គ្រាន់នោះឡើយ។
អតីតមន្ដ្រី CIA របស់សហរដ្ឋអមេរិក រូបនេះ បានបញ្ជាក់ ថា «យើងបាននិយាយ អំពីផលវិបាក ប្រកបដោយគ្រោះមហន្តរាយ ហើយបន្ទាប់មក យើងឆ្លើយតប ដោយការដាក់ទណ្ឌកម្ម នោះជាការឆ្លើយតបដ៏ទន់ខ្សោយបំផុត។ ចំណែកការឆ្លើយតបនេះ នឹងផ្ញើសារទៅកាន់ប្រធានាធិបតីរុស្ស៊ី លោក ពូទីន ថា គាត់អាចវាយប្រហារ ដោយអាវុធនុយក្លេអ៊ែរលើកទីពីរ ទីបី និងទីបួន ដោយគ្មានផលវិបាក។ ខ្ញុំ នឹងគាំទ្រដល់ការវាយប្រហារយោធារបស់សហរដ្ឋអាមេរិក ដោយផ្ទាល់ប្រឆាំងនឹងប្រទេសរុស្ស៊ី។ នោះអាចធ្វើ ដោយផ្ទាល់ ប្រឆាំងនឹងកម្លាំងរុស្ស៊ី ដែលបានបើកការវាយប្រហារ។ សហរដ្ឋអាមេរិក អាចប្រឆាំងនឹងមូលដ្ឋានយោធារុស្ស៊ី ផ្សេងៗទៀត នៅក្នុងអ៊ុយក្រែន ឬនៅក្នុងសមុទ្រខ្មៅ»។
លោក ម៉ាតធូ ក្រូនីគ (Matthew Kroenig) បានបន្ថែមទៀតថា នៅក្នុងសេណារីយូទី២នេះ សង្គ្រាមលោកលើកទី៣ អាចនឹងផ្ទុះឡើង ដោយសារសហរដ្ឋអាមេរិក វាយប្រហារដោយផ្ទាល់ ទៅលើរុស្ស៊ី ហើយការវាយប្រហារនេះ អាចនឹងធ្វើឲ្យក្រុងមូស្គូ សងសឹកតបតវិញ។ តើលោក ចូ បៃដិន សងសឹកវិញទេ? នោះ យើងនឹងត្រូវប្រឈមមុខនឹងជម្លោះ កាន់តែធំ ហើយវានឹងមានលទ្ធភាពមួយផ្សេងទៀត។
អតីតមន្ដ្រី CIA រូបនេះ បានបន្ដថា «ខ្ញុំគិតថា អ្នកប្រហែលជា អាចឱ្យបុរសយុទ្ធសាស្ត្ររបស់សហរដ្ឋអាមេរិក និយាយថា លោកប្រធានាធិបតី អាវុធនុយក្លេអ៊ែរ ត្រូវប្រើប្រាស់ជាលើកដំបូង ចាប់តាំងពីសង្គ្រាមលោកលើកទីពីរមក។ មនុស្សជាច្រើន តែងតែសន្មត ថា យើងនឹងឆ្លើយតបជាមួយនឹងអាវុធនុយក្លេអ៊ែរ ចំពោះការវាយប្រហារនុយក្លេអ៊ែរ។ យើងត្រូវតែប្រើប្រាស់អាវុធនុយក្លេអែរ ដើម្បីឆ្លើយតបទៅនឹងការស្ដារឡើងវិញនូវការរារាំងអាវុធនុយក្លេអ៊ែរ។ ប៉ុន្ដែខ្ញុំគិតថា ប្រធានាធិបតីសហរដ្ឋអាមេរិក លោក ចូ បៃដិន នឹងមិនដើរតមផ្លូវនេះ យ៉ាងហោចណាស់ តាំងពីដំបូងទី ប៉ុន្តែខ្ញុំគិតថា អ្នកខ្លះ ប្រហែលជាកំពុងតែតស៊ូមតិ សម្រាប់រឿងនេះផងដែរ»។
លោក ម៉ាតធូ ក្រូនីគ (Matthew Kroenig) បានអះអាងទៀត ថា នៅក្នុងសេណារីយ៉ូទី៣ សហរដ្ឋអាមេរិក ត្រូវតែឆ្លើយតប ចំពោះការវាយប្រហារ ដោយអាវុធបរមាណូជាមួយប្រទេសណាមួយ ដែលបង្កសង្គ្រាម ដោយអាវុធនុយក្លេអ៊ែរ។
លោក ឡយ អូស្ទីន (Lloyd Austin) រដ្ឋមន្ដ្រីក្រសួងការពារជាតិសហរដ្ឋអាមេរិក បានថ្លែងទៅកាន់បណ្ដាញទូរទស្សន៍ CNN កាលពីថ្ងៃទី២ ខែតុលា ថា «មិនមានវិធីសាស្ដ្រណាមួយដឹង ថាតើប្រធានាធិបតីរុស្ស៊ី លោក វ្ល៉ាឌីមៀ ពូទីន នឹងប្រើប្រាស់អាវុធមហាប្រល័យលោក តាមអ្វីដែលគាត់ធ្លាប់គំរាមកំហែងនោះឡើយ។ គ្មានអ្នកណាម្នាក់ ត្រួតលើ ពូទីន នោះទេ ព្រោះគាត់បានសម្រេចចិត្ត មិនទទួលខុសត្រូវ ចំពោះការឈ្លានពាន ទៅលើប្រទេសអ៊ុយក្រែន។ ដូច្នេះ ពូទីន អាចនឹងមានការសម្រេចចិត្តផ្សេង»។
ក្រុមអ្នកវិភាគ បានឯកភាពតាមលោក ក្រូនីគ បានអះអាង ថា បញ្ហានេះ ទំនងច្រើនជាង ការដែលពូទីន មិនចាប់ផ្តើមវាយប្រហារ ដោយអាវុធនុយក្លេអ៊ែរ ប៉ុន្តែវាមានហានិភ័យពិតប្រាកដប្រសិនបើគាត់វាយប្រហារ ដោយអាវុធបរមណូ»។
អតីតមន្ដ្រី CIA របស់សហរដ្ឋអាមេរិក បានបន្ដថា «ខ្ញុំមិនគិត ថា ការវាយប្រហារ ដោយអាវុធនុយក្លេអ៊ែរ ជាការសម្រេចចិត្តយ៉ាងងាយស្រួល សម្រាប់លោក ពូទីន នោះឡើយ។ ខ្ញុំគិត ថា គាត់កំពុងតែនៅលើរបង។ ខ្ញុំគិតថា នៅលើដៃម្ខាង គាត់មានការព្រួយបារម្ភ ថា ការប្រើប្រាស់អាវុធនុយក្លេអ៊ែរ អាចនាំឱ្យមានការឆ្លើយតបយ៉ាងខ្លាំងបំផុត ពីសហរដ្ឋអាមេរិក និង អង្គការណាតូ ដែលគាត់នឹងត្រូវតែបញ្ចៀសនូវការប្រឈមមុខជាមួយ។ ម្យ៉ាងវិញទៀត គាត់នឹងចាញ់សង្គ្រាមយ៉ាងអាម៉ាស់ នៅតាមព្រំដែនរបស់គាត់ ហើយខ្ញុំគិត ថា គាត់មើលឃើញ ទាំងយុទ្ធសាស្ត្រ និង ប្រយោជន៍យោធា នៅក្នុងការប្រើប្រាស់អាវុធនុយក្លេអ៊ែរ ដើម្បីបង្វែរជំនោរសង្គ្រាមនេះ។ ដូច្នេះខ្ញុំគិត ថា គាត់មិនធ្វើតាមអារម្មណ៍របស់គាត់នោះឡើយ»៕
