រដ្ឋធានីកៀវ៖ នៅក្នុងរយៈប៉ុន្មានសប្ដាហ៍ចុងក្រោយនេះ កងទ័ពអ៊ុយក្រែន កំពុងតែវាយលុករុលទៅមុខយ៉ាងលឿន រំដោះទឹកដីរបស់ខ្លួន នៅតាមសមរភូមិជាច្រើនកន្លែង ទាំងនៅភាគខាងកើត និង ភាគខាងត្បូង ប្រទេស រហូតធ្វើឲ្យក្រុងមូស្គូ មិនអាចសម្រេចបំណង ទើបជំរុញឲ្យប្រធានាធិបតី លោក វ្ល៉ាឌីមៀ ពូទីន ប្រើប្រាស់អាវុធមហាប្រល័យលោក ដើម្បីបញ្ចប់សង្គ្រាមនេះ ប៉ុន្ដែរុស្ស៊ី នឹងត្រូវប្រឈមមុខយ៉ាងធ្ងន់ធ្ងរជាមួយសហរដ្ឋអាមេរិក និង អង្គការណាតូ។
សារព័ត៌មាន Bussiness Insider បានចេញផ្សាយ កាលពីព្រឹក ថ្ងៃសៅរ៍ ទី៨ ខែតុលា ថា លោក វ៉ូឡូឌីមៀរ ហ្សេឡែនស្គី (Volodymyr Zelenskyy) បានបញ្ជាក់ថា រុស្ស៊ី កំពុងតែចាប់ផ្ដើមរៀបចំសង្គមរបស់ពួកគេ សម្រាប់ការប្រើប្រាស់អាវុធមហាប្រល័យលោក ដែលអាចនឹងកើតមានឡើង។ ប៉ុន្ដែគាត់មិនជឿថា រុស្ស៊ី បានត្រៀមខ្លួនរួចរាល់ហើយ សម្រាប់ការប្រើប្រាស់អាវុធនុយក្លេអ៊ែរនោះឡើយ។
នៅក្នុងបទសម្ភាសន៍មួយ ជាមួយនឹងបណ្ដាញទូរទស្សន៍របស់ចក្រភពអង់គ្លេស BBC លោកប្រធានាធិបតីអ៊ុយក្រែន បានបដិសេធ ថា គាត់មិនបានជំរុញឱ្យមានការវាយប្រហារ ទៅលើប្រទេសរុស្ស៊ី នោះទេ។ លោកប្រធានាធិបតី បានអះអាង ថា ការធ្វើអត្ថាធិប្បាយរបស់គាត់ កាលពីពេលមុន ត្រូវបានគេយកទៅបកប្រែខុស។ លោកប្រធានាធិបតី បានសង្កត់ធ្ងន់ ថា«អ្នកត្រូវតែប្រើប្រាស់វិធីសាស្ដ្រការពារ ផ្អែកទៅលើការដាក់កញ្ចប់ទណ្ឌកម្ម គឺមិនមែនជាការវាយប្រហារ នោះឡើយ»។
ក្នុងរយៈពេលប៉ុន្មានសប្តាហ៍កន្លងទៅថ្មីៗនេះ កងទ័ពអ៊ុយក្រែន បានរំដោះទឹកដីរបស់ពួកគេយ៉ាងច្រើនសន្ធឹកសន្ធាប់ ត្រឡប់មកវិញ នៅក្នុងការវាយលុក ប្រកបដោយជោគជ័យ រហូតបង្ខំឱ្យកម្លាំងទាហានរុស្ស៊ី បោះបង់ចោលទីតាំងកាន់កាប់របស់ពួកគេ ចាប់តាំងពីការផ្ទុះសង្គ្រាម រហូតមក។ ជ័យជម្នះនេះ ត្រូវបានរដ្ឋាភិបាលក្រុងកៀវ ពិពណ៌នាថា វាជាការឆ្លើយតបដល់ក្រុងម៉ូស្គូ ចំពោះការបរាជ័យរបស់ខ្លួន ក្រោយពេលប្រធានាធិបតី លោក វ្ល៉ាឌីមៀ ពូទីន បានដាក់បញ្ចូលតំបន់ចំនួន៤របស់អ៊ុយក្រែន ដែលកម្លាំងទាហានក្រុងមូស្គូ បានកាន់កាប់ ជាឧបសម្ព័ន្ធរបស់រុស្ស៊ី។
ការដាក់បញ្ចូលទឹកដីរបស់អ៊ុយក្រែន មានទំហំប្រហែល១៥ភាគរយ នៃផ្ទៃដីទាំងមូល ជាឧបសម្ព័ន្ធរបស់រុស្ស៊ី នោះ ត្រូវបានក្រុងកៀវ បណ្ដាប្រទេសបស្ចិមលោក និង សម្ពន្ធមិត្ត ជាពិសេស ប្រមុខអង្គការសហប្រជាជាតិ បានអះអាង ថា វាមិនមានតម្លៃស្របច្បាប់នោះទេ ហើយបានទាត់ចោលរាល់ការសម្រេចចិត្តរបស់ក្រុងមូស្គូ ដោយចាត់ទុក ជាការខុសច្បាប់ទាំងស្រុង។ ជាមួយគ្នានេះដែរ សហរដ្ឋអាមេរិក ក៏បានចាត់ទុកសកម្មភាពនេះ ជាការបង្កើនជម្លោះឲ្យកាន់តែខ្លាំងឡើងបន្ថែមទៀត។
ដោយឡែក ប្រធានាធិបតី លោក វ្ល៉ាឌីមៀ ពូទីន និង ក្រុមមន្ត្រីជាន់ខ្ពស់រុស្ស៊ី ផ្សេងៗទៀត បានលើកឡើង ថា អាវុធនុយក្លេអ៊ែរ ប្រហែលជាអាវុធយុទ្ធសាស្ត្រធុនតូច អាចនឹងត្រូវប្រើប្រាស់ សម្រាប់ការការពារតំបន់ឧបសម្ព័ន្ធទាំង៤នោះ បើទោះជាក្រុមមន្ត្រីលោកខាងលិច បានអះអាង ថា មិនមានភស្តុតាងណាមួយ បង្ហាញថា ក្រុងមូស្គូ បានត្រៀមខ្លួនរួចជាសម្រេច សម្រាប់ការប្រើប្រាស់អាវុធមហាប្រល័យលោកនោះ យ៉ាងណាក្ដី។
ថ្លែងជាភាសាអង់គ្លេស នៅឯការិយាល័យរបស់ប្រធានាធិបតី ស្ថិតក្នុងរដ្ឋធានីកៀវ ប្រមុខរដ្ឋអ៊ុយក្រែន លោក ហ្សេឡែនស្គី បានសង្កត់ធ្ងន់ ថា «ក្រុមមន្ដ្រីរុស្ស៊ី ចាប់ផ្ដើមរៀបចំសង្គមរបស់ពួកគេ។ នោះជាគ្រោះមហន្ដរាយយ៉ាងធ្ងន់ធ្ងរបំផុត ប្រសិនបើមានការប្រើប្រាស់អាវុធបរមាណូ។ ប៉ុន្ដែខ្ញុំគិតថា រុស្ស៊ី មិនទាន់បានត្រៀមខ្លួនរួចរាល់ សម្រាប់ការប្រើប្រាស់អាវុធនុយក្លេអ៊ែរនេះទេ។ រុស្ស៊ី ចាប់ផ្ដើមទំនាក់ទំនង ហើយពួកគេមិនទាន់ដឹងថា ពួកគេនឹងប្រើ ឬក៏មិនប្រើអាវុធបរមាណូនោះដែរ។ ខ្ញុំគិត ថា វាមានគ្រោះថ្នាក់ ចំពោះការនិយាយ អំពីបញ្ហានេះ»។
ក្រោយមក លោកប្រធានាធិបតី ហ្សេឡែនស្គី បានថ្លែង ជាភាសាអ៊ុយក្រែន ហើយឲ្យដឹង តាមរយៈអ្នកបកប្រែ ថា «អ្វីដែលយើងឃើញ គឺថា ប្រជាជនរុស្ស៊ីមានអំណាច ដូចជីវិត។ ដូច្នេះ ខ្ញុំគិតថា ហានិភ័យ អំពីការប្រើប្រាស់អាវុធនុយក្លេអ៊ែរ គឺមិនច្បាស់លាស់ ដូចអ្នកជំនាញមួយចំនួននិយាយនោះដែរ ព្រោះពួកគេយល់ ថា គ្មានការប្រែក្លាយ ត្រឡប់ថយក្រោយ ខណៈប្រើប្រាស់អាវុធនុយក្លេអ៊ែរ មិនត្រឹមតែជាប្រវត្តិសាស្ត្ររបស់ប្រទេសនេះប៉ុណ្ណោះទេ ប៉ុន្តែខ្លួនរបស់ពួកគេ ក៏ជាបុគ្គលិកជាប់ឈ្មោះ នៅក្នុងរឿងនេះផងដែរ»។
ទោះជាយ៉ាងណា លោកប្រធានាធិបតីអ៊ុយក្រែន បានបដិសេធការអំពាវនាវ ជំរុញឲ្យវាយប្រហារ ទៅលើប្រទេសរុស្ស៊ី នៅក្នុងអំឡុងព្រឹត្ដិការណ៍ តាមអនឡាញ កាលពីថ្ងៃព្រហស្បតិ៍ ដោយគាត់បានអះអាង ថា ពាក្យអ៊ុយក្រែន ដែលគាត់បានប្រើ ត្រូវគេយកទៅបកប្រែខុស។
លោក ម៉ាតធូ ក្រូនីគ (Matthew Kroenig) ជាអ្នកវិទ្យាសាស្ដ្រនយោបាយ និង ជាអតីតមន្ដ្រីទីភ្នាក់ងារស៊ើបការណ៍សម្ងាត់របស់សហរដ្ឋអាមេរិក CIA បានបញ្ជាក់ ថា «ខ្ញុំមិនគិត ថា ការវាយប្រហារ ដោយអាវុធនុយក្លេអ៊ែរ ជាការសម្រេចចិត្តយ៉ាងងាយស្រួល សម្រាប់លោក ពូទីន នោះឡើយ។ ខ្ញុំគិត ថា គាត់កំពុងតែនៅលើរបង។ ខ្ញុំគិតថា នៅលើដៃម្ខាង គាត់មានការព្រួយបារម្ភ ថា ការប្រើប្រាស់អាវុធនុយក្លេអ៊ែរ អាចនាំឱ្យមានការឆ្លើយតបយ៉ាងខ្លាំងបំផុត ពីសហរដ្ឋអាមេរិក និង អង្គការណាតូ ដែលគាត់នឹងត្រូវតែបញ្ចៀសនូវការប្រឈមមុខជាមួយ។ ម្យ៉ាងវិញទៀត គាត់នឹងចាញ់សង្គ្រាមយ៉ាងអាម៉ាស់ នៅតាមព្រំដែនរបស់គាត់ ហើយខ្ញុំគិត ថា គាត់មើលឃើញ ទាំងយុទ្ធសាស្ត្រ និង ប្រយោជន៍យោធា នៅក្នុងការប្រើប្រាស់អាវុធនុយក្លេអ៊ែរ ដើម្បីបង្វែរជំនោរសង្គ្រាមនេះ។ ដូច្នេះខ្ញុំគិត ថា គាត់មិនធ្វើតាមអារម្មណ៍របស់គាត់នោះឡើយ»។