រដ្ឋធានីសេអ៊ូល៖ រហូតមកដល់ពេលនេះ ប្រជាជនរុស្ស៊ី នៅតែបន្ដភ័យខ្លាច ហើយរត់ចោលប្រទេស ក្រោយពេលប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) ប្រកាសកេណ្ឌទ័ព បញ្ជូនទៅកាន់សមរភូមិនោះ ហើយអ្នកខ្លះ ក៏អភ័ព្វខ្លាំង ខំរត់តាមទូក ទៅដល់ប្រទេសកូរ៉េខាងត្បូង ហើយ ក៏ត្រូវអាជ្ញាធរ បដិសេធចូលទៅក្នុងប្រទេសរបស់ពួកគេ។
សារព័ត៌មាន Hindustan Times បានចេញផ្សាយ កាលពីថ្ងៃពុធ ទី១២ ខែតុលា ថា បើតាមសេចក្ដីរាយការណ៍ ពីបណ្ដាញផ្សព្វផ្សាយរបស់កូរ៉េខាងត្បូង បានឲ្យដឹង ថា ជាមួយនឹងការភ័យខ្លាច និង ការគេចវេះ ពីការអំពាវនាវឲ្យចូលបម្រើទ័ព ដើម្បីទៅចូលរួមប្រយុទ្ធ នៅក្នុងប្រទេសអ៊ុយក្រែន នោះ ជនជាតិរុស្សី បាននាំគ្នារត់ចេញពីប្រទេស ឆ្ពោះទៅកាន់ប្រទេសជិតខាង។ ប៉ុន្ដែអភ័ព្វខ្លាំងណាស់ សម្រាប់ជនជាតិរុស្ស៊ី ជាង២០នាក់ បានរត់ភៀសខ្លួនតាមទូក ចេញពីកំពង់ផែ ភាគខាងជើងប៉ាស៊ីហ្វិក ចូលទៅដល់ប្រទេសកូរ៉េខាងត្បូង ហើយ ប៉ុន្តែពួកគេ ភាគច្រើន ត្រូវបានអាជ្ញាធរប្រទេសអាស៊ីបូព៌ាមួយនេះ បដិសេធការចូល ទៅក្នុងប្រទេសរបស់ពួកគេ។
ចាប់តាំងពីប្រធានាធិបតី លោក វ្ល៉ាឌីមៀ ពូទីន កាលពីថ្ងៃទី២១ ខែកញ្ញា បានចេញបទបញ្ជាឲ្យមានការចល័តទ័ពមួយផ្នែក បញ្ជូនទៅជួយគាំទ្រកម្លាំងទាហានរបស់ក្រុងមូស្គូ ដែលកំពុងតែជាប់ដៃប្រយុទ្ធ នៅក្នុងប្រទេសអ៊ុយក្រែន នោះមក ប្រជាជនរុស្ស៊ី ដែលគ្រប់អាយុធ្វើទាហាន មានការភ័យខ្លាចយ៉ាងខ្លាំង។ ពួកគេ ភាគច្រើន បានរត់ភៀសខ្លួន តាមផ្លូវគោក ផ្លូវដែក និង តាមផ្លូវអាកាស ឆ្ពោះទៅកាន់តំបន់អឺរ៉ុប និង ប្រទេសជិតខាង ជាធ្លាប់រដ្ឋរបស់អតីតសហភាពសូវៀត រួមមាន ហ្សកហ្ស៊ី អាស៊ែបៃហ្សង់ និង កាហ្សាក់ស្ថាន ហើយខ្លះទៀត បានរត់ទៅកាន់ប្រទេសម៉ុងហ្គោលី។
បណ្ដាញទូរទស្សន៍កូរ៉េខាងត្បូង KBS បានរាយការណ៍ កាលពីថ្ងៃអង្គារ ថា យ៉ាងហោចណាស់ មានជនជាតិរុស្សី ចំនួន២១នាក់ បានធ្វើដំណើរតាមកប៉ាល់ មកដល់កំពង់ផែ នៅភាគខាងត្បូង នៃប្រទេសអាស៊ីបូព៌ាមួយនេះ។ ប៉ុន្តែនៅក្នុងចំណោមជនជាតិរុស្ស៊ី ទាំងនោះ មានតែ២នាក់ប៉ុណ្ណោះ បានអនុញ្ញាតឱ្យចូលមកក្នុងប្រទេស ខណៈអ្នកផ្សេងទៀតត្រូវបដិសេធ ដោយសារតែអាជ្ញាធរ ចាត់ទុកថា គោលបំណងរបស់ពួកគេ «មិនច្បាស់លាស់»៕
