ទីក្រុងប្រ៊ុចសែលស៍ (Brussels) ៖ ប្រមុខការពារជាតិ នៃបណ្ដាប្រទេសទាំង៣០ ជាសមាជិករបស់អង្គការសន្ធិសញ្ញាអាត្លង់ទិកខាងជាងជើង ហៅកាត់ ណាតូ ឬ អូតង់ បានមកជួបប្រជុំ នៅក្នុងទីក្រុងប្រ៊ុចសែលស៍ ប្រទេសប៊ែលហ្ស៊ិក ដើម្បីពិភាក្សាគ្នា ជុំវិញតម្រូវការចាំបាច់ សម្រាប់ការផ្ដល់ប្រព័ន្ធការពារដែនអាកាស ជួយដល់ប្រទេសអ៊ុយក្រែន ការពារខ្លួន បញ្ឈប់ការវាយប្រហារ ពីកម្លាំងទាហានរបស់ក្រុងមូស្គូ បន្ដទៀត។
សារព័ត៌មាន Radio Liberty បានចេញផ្សាយ កាលពីថ្ងៃពុធ ទី១២ ខែតុលា ថា រដ្ឋមន្ដ្រីក្រសួងការពារជាតិ មកពីប្រទេសចំនួន៣០ ជាសមាជិករបស់អង្គការសម្ពន្ធមិត្តយោធាដ៏ខ្លាំងក្លារបស់ពិភពលោក បានជួបប្រជុំគ្នា រយៈពេល២ថ្ងៃ នៅក្នុងប្រទេសប៊ែលហ្ស៊ិក ដោយផ្ដោតចំណុចសំខាន់ ទៅលើការផ្ដល់ប្រព័ន្ធការពារដែនអាកាសយ៉ាងច្រើន ជួយដល់ប្រទេសអ៊ុយក្រែន ដើម្បីការពារទប់ទល់នឹងការវាយប្រហារ ដោយមីស៊ីល មិនរើសមុខ ពីកម្លាំងទាហានរុស្ស៊ី នៅទូទាំងប្រទេស ដែលកំពុងតែហែកហួរ ដោយសារសង្គ្រាមមួយនេះ។
នៅក្នុងរយៈពេល២ថ្ងៃជាប់ៗគ្នា កន្លងមកនេះ រុស្ស៊ី បានបើកការវាយប្រហារ ដោយមីស៊ីល តាមផ្លូវអាកាស ផ្លូវគោក និង ផ្លូវទឹក ទៅលើទីក្រុងជាច្រើន នៅទូទាំង ប្រទេសអ៊ុយក្រែន តាមអ្វីដែលប្រធានាធិបតី លោក វ្ល៉ាឌីមៀ ពូទីន (Vladimir Putin) បានចាត់ទុក ជាការវាយប្រហារសងសឹក ចំពោះការបំផ្ទុះស្ពានឃើច (Kerch) ឬស្ពានគ្រីមៀ (Crimea) កាលពីថ្ងៃសៅរ៍ សប្ដាហ៍មុន ដោយបានបំផ្លាញស្ពានតែមួយគត់ តភ្ជាប់ពីដីគោករបស់ប្រទេសរុស្ស៊ី ទៅកាន់ឧបទ្វីបគ្រីមៀ ដែលក្រុងមូស្គូ បានរឹបអូសយក កាលពីឆ្នាំ២០១៤។
លោក ហ្សង់ស៍ ស្ដូលថែនប៊ឺគ (Jens Stoltenberg) អគ្គលេខាធិការ អង្គការណាតូ (NATO) បានគូសបញ្ជាក់ អំពីការសម្រេចចិត្តសំខាន់ៗ ដែលរដ្ឋមន្ត្រីការពារជាតិសម្ពន្ធមិត្ត នឹងធ្វើ នៅក្នុងកិច្ចប្រជុំរបស់ពួកគេ នៅទីក្រុងប្រ៊ុចសែលស៍ នៅថ្ងៃនេះ និង ថ្ងៃស្អែក (១២-១៣តុលា ២០២២) ដោយបានហៅកិច្ចប្រជុំនេះ ថា ជា «ពេលវេលាដ៏សំខាន់ សម្រាប់សន្តិសុខរបស់យើង»។
លោកប្រមុខអង្គការណាតូ បានបញ្ជាក់ ថា កិច្ចប្រជុំប្រមុខការពារជាតិរបស់អង្គការសម្ពន្ធមិត្តយោធាកំពូល នៅលើពិភពលោកនេះ ក៏មានការចូលរួម ពីលោក អូឡែកស៊ីយ រ៉េស្នីកូវ (Oleksiy Reznikov) រដ្ឋមន្ដ្រីក្រសួងការពារជាតិអ៊ុយក្រែន ដោយផ្ដោតលើអាទិភាពកំពូល សម្រាប់ប្រព័ន្ធការពារដែនអាកាស។
នៅមុនកិច្ចប្រជុំរបស់ប្រមុខការពារជាតិណាតូ នោះ ក៏មានតំណាង មកពីប្រទេសជាង៥០ ដែលគេស្គាល់ ថា ជាក្រុមទំនាក់ទំនងការពារជាតិអ៊ុយក្រែន បានប្រមូលផ្ដុំគ្នា នៅខាងក្រៅកិច្ចប្រជុំរបស់អង្គការណាតូ នៅក្នុងទីក្រុងប្រ៊ុចសែលស៍ ដោយមានគោលបំណងស្រដៀងគ្នានេះដែរ។ ការជួបជុំគ្នារបស់តំណាងប្រទេសទាំងនោះ បានកើតឡើង ក្រោយពេលប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡែនស្គី (Volodymyr Zelenskyy) បានស្នើដល់មេដឹកនាំ G-7 កាលពីថ្ងៃទី១១ ខែតុលា សម្រាប់សមត្ថភាពការពារដែនអាកាស ដើម្បីរារាំង ពីការវាយប្រហារតាមអាកាស ពីកម្លាំងទាហានរុស្ស៊ី។
លោកប្រធានអង្គការសម្ពន្ធមិត្តយោធាដ៏ខ្លាំងក្លារបស់ពិភពលោក រូបនេះ បានបន្ថែម ថា ក្រោយពេល ក្រុងកៀវ ទទួលបានប្រព័ន្ធការពារដែនអាកាសដ៏ទំនើបបែបនេះ អាចនឹងបញ្ឈប់រាល់ការវាយប្រហារ ដោយគ្រាប់រ៉ុក្កែត ឬមីស៊ីល ពីរុស្ស៊ី មកលើប្រទេសអ៊ុយក្រែន បន្ដទៀតហើយ។
លោកឧត្ដមសេនីយ៍ ម៉ាក មីលឡេ (Mark Milley) នាយអគ្គសេនាធិការចម្រុះ កងទ័ពសហរដ្ឋអាមេរិក បានបញ្ជាក់ ថា អ៊ុយក្រែន ចង់បានប្រព័ន្ធការពារដែនអាកាសខ្លាំង សម្រាប់ការពារ ទប់ទល់នឹងការវាយប្រហារតាមអាកាស ពីរុស្ស៊ី។
លោកនាយអគ្គសេនាធិការចម្រុះ កងទ័ពសហរដ្ឋអាមេរិក រូបនេះ បានប្រាប់ដល់ក្រុមអ្នករាយការណ៍ព័ត៌មាន ថា «អ្វីដែលអ៊ុយក្រែនកំពុងតែស្នើសុំ ហើយអ្វីដែលយើងកំពុងតែគិត ថា អាចនឹងផ្តល់ឱ្យនោះ ជាប្រព័ន្ធការពារដែនអាកាស រួមបញ្ចូលទាំងមីស៊ីលផងដែរ។ ដូច្នេះប្រព័ន្ធការពារ ដែលត្រូវបានផុ្ដល់ឲ្យទាំងនោះ នឹងមិនអាចគ្រប់គ្រងដែនអាកាសទាំងស្រុង នៅទូទាំងប្រទេសអ៊ុយក្រែន បាននោះឡើយ។ ប៉ុន្តែក្រុងកៀវ អាចរៀបចំឡើង ដើម្បីគ្រប់គ្រង នៅលើគោលដៅអាទិភាព ដែលអ៊ុយក្រែន ត្រូវការការពារ ជាចាំបាច់បំផុត»៕