រដ្ឋធានីវ៉ាស៊ីនតោន៖ ចាប់តាំងពីកងទ័ពរុស្ស៊ី បានចូលលុកលុយ នៅក្នុងប្រទេសអ៊ុយក្រែន កាលពីថ្ងៃទី២៤ ខែកុម្ភៈ រហូតមក ក្រុងមូស្គូតែងតែគំរាមកំហែង ជាញឹកញាប់ អំពីការប្រើប្រាស់អាវុធនុយក្លេអ៊ែរ ទើបអតីតទឹប្រឹក្សាសន្ដិសុខជាតិសហរដ្ឋអាមេរិក បានទាមទារឲ្យក្រុងវ៉ាស៊ីនតោន គួរតែសម្លាប់មេដឹកនាំវិមានក្រឹមឡាំង រូបនេះចេញ ប្រសិនបើគាត់បញ្ជាឲ្យប្រើប្រាស់អាវុធនុយក្លេអ៊ែរ។
សារព័ត៌មានរបស់ចក្រភពអង់គ្លេស LBC បានចេញផ្សាយ កាលពីថ្ងៃអង្គារ ទី១១ ខែតុលា ថា លោក ចន បូលតុន (John Bolton) អតីតទីប្រឹក្សាសន្ដិសុខជាតិសហរដ្ឋអាមេរិក កាលពីថ្ងៃអង្គារ បានលើកឡើង ថា សហរដ្ឋអាមេរិក គួរតែធ្វើឃាតប្រធានាធិបតី ពូទីន ប្រសិនបើគាត់បញ្ជាឲ្យប្រើប្រាស់អាវុធមហាប្រល័យលោក។
ដោយសារតែសង្គ្រាមវាយប្រយុទ្ធគ្នាយ៉ាងសាហាវ រវាងកម្លាំងការពារទឹកដីអ៊ុយក្រែន និង កម្លាំងទាហានរុស្ស៊ី កំពុងតែបន្ដឈានចូលដល់ខែទី៩ហើយ នៅតែមិនអាចស្វែងរកពន្លឺចរចាសន្ដិភាពបាន ខណៈមានការព្រួយបារម្ភជាច្រើន អំពីលទ្ធភាព នៃការវាយប្រហារ ដោយអាវុធនុយក្លេអ៊ែរ កំពុងតែកើនឡើងខ្ពស់ ក្រោយពេល ក្រុងមូស្គូ តែងតែគំរាមកំហែង ជាញឹកញាប់ អំពីការប្រើប្រាស់អាវុធបរមាណូ។ លោក ពូទីន កាលពីថ្មីៗនេះ បានលើកឡើងនូវវោហារសាស្ត្ររបស់គាត់ អំពីការប្រឈមមុខដាក់គ្នា អំពីអាវុធនុយក្លេអ៊ែ ជាពិសេស ដោយសារតែគាត់បានមើលឃើញ អំពីកម្លាំងទាហានរបស់គាត់ បាត់បង់តំបន់គ្រប់គ្រងជាច្រើន កំពុងតែកើនឡើង ចាប់តាំងពីការចាប់ផ្តើម«ប្រតិបត្តិការយោធាពិសេស»របស់មេដឹកនាំវិមានក្រឹមឡាំង នៅក្នុងប្រទេសអ៊ុយក្រែន កាលពីថ្ងៃទី២៤ ខែកុម្ភៈ រហូតមក។
លោក បូលតុន ជាទីប្រឹក្សាសន្ដិសុខជាតិរបស់អតីតប្រធានាធិបតី ដូណាល់ ត្រាំ (Donald Trump) បានថ្លែង អំពីលទ្ធភាព នៃសង្គ្រាមនុយក្លេអ៊ែរ នៅក្នុងបទបង្ហាញ នៅក្នុងវិធីវិទ្យុរបស់ចក្រភពអង់គ្លេស LBC កាលពីថ្ងៃអង្គារ ដោយបានសង្កត់ធ្ងន់ ថា «យើងត្រូវតែធ្វើឲ្យប្រាកដ ថា តើលោក ពូទីន បញ្ជាឱ្យប្រើប្រាស់អាវុធនុយក្លេអ៊ែរយុទ្ធសាស្ត្រ ដូចអ្វីដែលគាត់នឹងចុះហត្ថលេខា លើលិខិតអត្តឃាតនោះដែរឬយ៉ាងណា? ខ្ញុំគិតថា នោះជាអ្វីដែលសហរដ្ឋអាមេរិក អាចរារាំង ពូទីន ប្រសិនបើគាត់ធ្លាក់ចូល ទៅក្នុងកាលៈទេសៈដ៏ធ្ងន់ធ្ងរបំផុត»។
លោក បូលតុន បានបន្ថែមថា គាត់ជឿ ថា «ការធ្វើឲ្យប្រាកដនោះ យើងនឹងដាក់បន្ទុក ទៅលើការទទួលខុសត្រូវ សម្រាប់ ពូទីន ប្រសិនបើគាត់បញ្ជាឱ្យប្រើប្រាស់អាវុធនុយក្លេអ៊ែរ នឹងបង្កើនឱកាសរារាំងគាត់ បញ្ចៀសពីការធ្វើដូច្នេះ។ គាត់ជឿជាក់ថា សហរដ្ឋអាមេរិក មានសមត្ថភាព អាចវាយប្រហារ ទៅលើលោក ពូទីន បាន។
អតីតទីប្រឹក្សាសន្ដិសុខជាតិសហរដ្ឋអាមេរិក បានថ្លែង ដោយសំដៅទៅលើមេទ័ពកំពូលរបស់អ៊ីរ៉ង់ ដែលបានសម្លាប់ ដោយការវាយប្រហារ តាមអាកាសពីកងទ័ពសហរដ្ឋអាមេរិក នៅក្នុងប្រទេសអ៊ីរ៉ាក់ កាលពីអំឡុងឆ្នាំ២០២០ ថា «អ្នកអាចសួរលោក ហ្គេសសែម សូឡេម៉ានី (Qassem Soleimani) មេទ័ពកំពូលអ៊ឺរ៉ង់ អំពីអ្វីដែលបានកើតឡើង ខណៈយើងសម្រេចចិត្តលើអ្នកណាម្នាក់ គំរាមកំហែង ដល់សហរដ្ឋអាមេរិក»។
លោក ចូ បៃដិន (Joe Biden) ប្រធានាធិបតីសហរដ្ឋអាមេរិក កាលពីសប្ដាហ៍មុន បានព្រមានពីការដើរដល់ចំណុចសង្គ្រាមនុយក្លេអ៊ែរ។ នេះជាការទទួលស្គាល់ដោយត្រង់ ចំពោះការគំរាមកំហែងពីអាវុធនុយក្លេអ៊ែររបស់រុស្ស៊ី៕
