រដ្ឋធានីកៀវ៖ នៅក្នុងរយៈពេលប៉ុន្មានថ្ងៃមកនេះ កម្លាំងទាហានរុស្ស៊ី បានបង្កើនការវាយប្រហារ ដោយមីស៊ីល និង យន្ដហោះគ្មានមនុស្សបើក ឬដ្រូន បំផ្លិចបំផ្លាញដល់ហេដ្ឋារចនាសម្ព័ន្ធស៊ីវិល អគារលំនៅឋាន និង ស្ថានីយថាមពលអគ្គិសនី នៅក្នុងប្រទេសអ៊ុយក្រែន ហើយឥឡូវនេះ ក្រុងកៀវ បានងាកទៅស្នើសុំប្រព័ន្ធការពារដែនអាកាស ពីប្រទេសអ៊ីស្រាអែល។
ទីភ្នាក់ងារសារព័ត៌មាន Reuters បានចេញផ្សាយ កាលពីព្រឹក ថ្ងៃសុក្រ ទី២១ ខែតុលា ថា លោក ឌីមីត្រូ គូឡេបា (Dmytro Kuleba) រដ្ឋមន្ដ្រីក្រសួងការបរទេសអ៊ុយក្រែន កាលពីថ្ងៃព្រហស្បតិ៍ ថា គាត់បាននិយាយទៅកាន់លោក យែរ ឡាភីដ (Yair Lapid) នាយករដ្ឋមន្ដ្រីអ៊ីស្រាអែល និង បានពិភាក្សាគ្នា អំពីសំណើរបស់ក្រុងកៀវ សុំទិញប្រព័ន្ធការពារមីស៊ីល និង ប្រព័ន្ធការពារដែនអាកាស ហើយបច្ចេកវិទ្យាយោធាផ្សេងៗទៀត។
លោករដ្ឋមន្ដ្រីក្រសួងការបរទេសអ៊ុយក្រែន បានសរសេរ នៅលើបណ្ដាញសង្គមធ្វីធើរ ថា «ខ្ញុំបានប្រាប់ដល់នាយករដ្ឋមន្ដ្រីអ៊ីស្រាអែល អំពីការឈឺចាប់មិនអាចនឹងថ្លែងកើត ការបាត់បង់អាយុជីវិត និង ការបំផ្លិចបំផ្លាញ ដោយមីស៊ីលរបស់រុស្ស៊ី និង ដ្រូនផលិត នៅក្នុងប្រទេសអ៊ីរ៉ង់»។
អ៊ីស្រាអែល បានបញ្ជាក់ ថា អ៊ីស្រាអែល បានស្ដីបន្ទោសដល់ការឈ្លានពានរបស់រុស្ស៊ី ប៉ុន្ដែក្រុងតែលអាវីវ មិនបានផ្គត់ផ្គង់គ្រឿងសព្វាវុធដល់ក្រុងកៀវ នោះឡើយ។ អ៊ីស្រាអែល បានកំណត់ជំនួយរបស់ខ្លួន ទៅកាន់ប្រទេសអ៊ុយក្រែន ដើម្បីដោះស្រាយបញ្ហាវិបត្ដិសមនុស្សធម៌ ដោយថែមទាំងបានលើកឡើង អំពីគោលបំណង ចង់បន្ដកិច្ចសហប្រតិបត្ដិការជាមួយនឹងក្រុងមូស្គូ ជុំវិញស៊ីរី ជាប្រទេសជិតខាង ដែលហែកហួរដោយសារសង្គ្រាម និង ដើម្បីធានាសុខុមាលភាពរបស់ជនជាតិជ្វីហ្វ នៅរុស្ស៊ី ផងដែរ។
ទោះជាយ៉ាងណា កាលពីពេលថ្មីៗនេះ អ៊ីស្រាអែល បានជួយដល់ប្រទេសអ៊ុយក្រែន ដើម្បីបង្កើតសំឡេងប្រកាសអាសន្នវាយប្រហារតាមអាកាស សម្រាប់ជនស៊ីវិល រួចមកហើយដែរ។
ការិយល័យរបស់នាយករដ្ឋមន្ដ្រីអ៊ីស្រាអែល បានបញ្ជាក់ ថា មេដឹកនាំអ៊ីស្រាអែល បានថ្លែងជាដដែលៗ ទៅកាន់លោករដ្ឋមន្ដ្រីក្រសួងការបរទេសអ៊ុយក្រែន ថា ការគាំទ្ររបស់អ៊ីស្រាអែល សម្រាប់អ៊ុយក្រែន និង បានសម្ដែងពីការព្រួយបារម្ភយ៉ាងខ្លាំងរបស់គាត់ អំពីទំនាក់ទំនងយោធា រវាង អ៊ីរ៉ង់ និង រុស្ស៊ី។
កម្លាំងទាហានរុស្ស៊ី បានប្រើប្រាស់ដ្រូនអត្ដឃាត វាយប្រហារទៅលើប្រទេសអ៊ុយក្រែន ដោយបានបំផ្លិចបំផ្លាញ ដល់ហេដ្ឋារចនាសម្ព័ន្ធថាមពលរបស់ប្រទេសនេះ យ៉ាងដំណំ។ មេដឹកនាំក្រុងកៀវ បានអះអាង ថា ដ្រូនអត្ដឃាតទាំងនោះ ជាដ្រូនវាយប្រហារ ប្រភេទ Shahed-136 ផលិត នៅក្នុងប្រទេសអ៊ីរ៉ង់។
ទោះជាយ៉ាងណា រហូតមកដល់ពេលនេះ ក្រុងតេអ៊ីរ៉ង់ នៅតែបន្ដច្រានចោលការចោទប្រកាន់ អំពីការផ្គត់ផ្គង់ដ្រូន ដល់ក្រុងមូស្គូ។ ចំណែកវិមានក្រឹមឡាំងរបស់ប្រធានាធិបតីរុស្ស៊ី កាលពីថ្ងៃអង្គារ ក៏បានបដិសេធ ថា កម្លាំងទាហានរបស់ខ្លួន មិនបានប្រើប្រាស់ដ្រូនអ៊ីរ៉ង់ ដើម្បីវាយប្រហារ ទៅលើអ៊ុយក្រែន នោះឡើយ។ ប៉ុន្ដែក្រុងវ៉ាស៊ីនតោន បានអះអាង ថា ការបដិសេធរបស់ក្រុងតេអ៊ីរ៉ង ជាការកុហក៕
