រដ្ឋធានីមូស្គូ៖ ស្របពេលមានភាពតានតឹងកាន់តែខ្លាំងឡើង ទាំងនយោបាយ ការទូត និង យោធា ជាមួយនឹងសហរដ្ឋអាមេរិក និង បស្ចិមលោក ជុំវិញសង្គ្រាមឈ្លានពានរបស់ប្រធានាធិបតី លោក វ្ល៉ាឌីមៀ ពូទីន នៅក្នុងប្រទេសអ៊ុយក្រែន នោះ រុស្ស៊ី បានផ្ដល់ដំណឹងជាមុនទៅកាន់សហរដ្ឋអាមេរិក អំពីផែនការធ្វើសមយុទ្ធកម្លាំងនុយក្លេអ៊ែររបស់ខ្លួន ដើម្បីកុំឲ្យមានការយល់ច្រឡំ ក្លាយបង្កឲ្យកើតទៅជាហានិភ័យណាមួយ ពិបាកនឹងប៉ាន់ស្មានទុកជាមុន។
ទីភ្នាក់ងារសារព័ត៌មាន AFP បានចេញផ្សាយ កាលពីថ្ងៃពុធ ទី២៦ ខែតុលា ថា រុស្ស៉ី បានផ្ដល់ដំណឹងជាមុន ដល់សហរដ្ឋអាមេរិក អំពីផែនការធ្វើសមយុទ្ធប្រចាំឆ្នាំ សម្រាប់កម្លាំងទាហាននុយក្លេអ៊ែររបស់ក្រុងមូស្គូ។ ចំណែក ក្រុមមន្ត្រីអាមេរិក បានចាត់ទុកសមយុទ្ធរបស់រុស្ស៊ី ជាហានិភ័យទាបមួយ អាចនឹងបង្កឲ្យការភ័ន្តច្រឡំ ព្រោះតែរុស្ស៉ី តែងតែប្រើប្រាស់សង្គ្រាមវោហារសាស្ដ្រអាវុធមហាប្រល័យលោក ជាញឹកញាប់។
ក្រុមមន្ដ្រីសហរដ្ឋអាមេរិក បានឲ្យដឹងថា រុស្ស៉ី នឹងដឹកនាំការបាញ់សាកល្បងមីស៊ីល នៅក្នុងអំឡុងការធ្វើសមយុទ្ធប្រចាំឆ្នាំ ឈ្មោះ Grom របស់កងយុទ្ធសាស្ត្រនុយក្លេអ៊ែររបស់ក្រុងមូស្គូ។ កងទ័ពរបស់ក្រុងមូស្គូ បានបាញ់សាកល្បងមីស៊ីលផ្លោងអន្តរទ្វីប នៅក្នុងសមយុទ្ធ កាលពីលើកមុន។ ក្រោមសន្ធិសញ្ញា New START Treaty រុស្ស៉ី និង សហរដ្ឋអាមេរិក មានកាតព្វកិច្ចជូនដំណឹងគ្នាជាមុន សម្រាប់ការបាញ់សាកល្បងមីស៊ីល ដើម្បីបញ្ចៀសនូវការយល់ឡំណាមួយ អាចនឹងកើតឡើង។
លោក ផាតទ្រីក រ៉ៃដឺ (Patrick Ryder) អ្នកនាំពាក្យ កងទ័ពសហរដ្ឋអាមេរិក បានបញ្ជាក់ នៅក្នុងសន្និសីទសារព័ត៌មានខ្លីមួយ កាលពីថ្ងៃអង្គារ ថា «រុស្ស៊ី បានជូនដំណឹងជាមុន មកដល់សហរដ្ឋអាមេរិក ដូចអ្វីដែលយើងទទួលបានដំណឹង កាលពីពេលមុនៗអ៊ីចឹងដែរ ព្រោះវាជាសមយុទ្ធតាមទម្លាប់ប្រចាំឆ្នាំរបស់រុស្ស៉ី»។
ទោះជាយ៉ាងណា អ្នកនាំពាក្យ កងទ័ពសហរដ្ឋអាមេរិក រូបនេះ មិនបានបញ្ជាក់លម្អិត ឬកាលបរិច្ឆេទ នៃការធ្វើសមយុទ្ធរបស់រុស្ស៉ី នោះឡើយ។ រហូតមកដល់ពេលនេះ រុស្ស៊ី នៅតែមានភាពតានតឹងដាក់គ្នាជាមួយនឹងសហរដ្ឋអាមេរិក និង សម្ពន្ធមិត្តលោកខាងលិច ជុំវិញការឈ្លានពាន ទៅលើប្រទេសអ៊ុយក្រែន។
ក្រុងមូស្គូ កាលពីអង្គារ បានថ្លែងទៅកាន់កិច្ចប្រជុំបិទទ្វាររបស់ក្រុមប្រឹក្សាសន្ដិសុខ អង្គការសហប្រជាជាតិ ដោយចោទប្រកាន់អ៊ុយក្រែន កំពុងត្រៀមប្រើប្រាស់គ្រាប់បែកវិទ្យុសកម្ម។ ប៉ុន្តែលោកខាងលិច និងអ៊ុយក្រែន បានចាត់ទុកការចោទប្រកាន់របស់រុស្ស៊ី ជាការប្រឌិតព័ត៌មានក្លែងក្លាយ និង មានចេតនាបង្កើនជម្លោះឲ្យកាន់តែខ្លាំងក្លាឡើងបន្ដទៀត៕