រដ្ឋធានីរូម៖ គិតត្រឹម ថ្ងៃទី២៧ ខែតុលា សង្គ្រាមឈ្លានពានរបស់ប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) បានអូសបន្លាយ អស់រយៈពេល២៤៦ថ្ងៃ ហើយការប្រយុទ្ធគ្នាយ៉ាងសាហាវ ក៏កំពុងតែបន្ដ រកទីបញ្ចប់គ្មាន ប៉ុន្ដែលោកស្រី នាយករដ្ឋមន្ដ្រីអ៊ីតាលី បែរជាអះអាងទៅកាន់សភាជាន់ខ្ពស់របស់ខ្លួន ថា មានវិធីសាស្ដ្រតែមួយគត់ អូសមេដឹកនាំវិមានក្រឹមឡាំង មកចូលតុចរចាសន្ដិភាព។
សារព័ត៌មាន BNN Bloomberg បានចេញផ្សាយ កាលពីព្រឹក ថ្ងៃព្រហស្បតិ៍ ទី២៧ ខែតុលា ថា លោកស្រី ហ្គីយ៉ូជីយ៉ា មេឡូនី (Giorgia Meloni) នាយករដ្ឋមន្ដ្រីអ៊ីតាលី កាលពីថ្ងៃពុធ បានទទួលនូវការផ្ដល់ទំនុកចិត្តពីព្រឹទ្ធសភារបស់ប្រទេសអឺរ៉ុបមួយនេះ ដោយសារបញ្ចេញសារយ៉ាងធ្ងន់ គាំទ្រដល់ប្រទេសអ៊ុយក្រែន។
លោកស្រី នាយករដ្ឋមន្ដ្រីថ្មីរបស់អ៊ីតាលី បានថ្លែងទៅកាន់ព្រឹទ្ធសភា ថា «មធ្យោបាយតែមួយគត់ សម្រាប់ជួយសម្រួលឲ្យមានកិច្ចព្រមព្រៀងសន្តិភាព រវាងរុស្ស៊ី និងអ៊ុយក្រែន មានតែការជួយដល់រដ្ឋាភិបាលក្រុងកៀវ ឲ្យមានលទ្ធភាពអាចពឹងផ្អែក លើសមត្ថភាពអាចការពារជាតិ ដោយខ្លួនឯងបាន។
លោកស្រី នាយករដ្ឋមន្ដ្រីអ៊ីតាលី បានសង្កត់ធ្ងន់ ថា «សន្តិភាពអាចសម្រេចទៅបាន មានតែការគាំទ្រដល់អ៊ុយក្រែន ឲ្យពេញទំហឹង... ព្រោះវាជាឱកាសតែមួយគត់ ដែលយើងអាចធ្វើទៅបាន សម្រាប់ភាគីទាំងពីរ ចូលមកកាន់តុចរចា។ ប៉ុន្ដែរហូតមកដល់ពេលនេះ អ៊ីតាលី នៅតែមិនទាន់ផ្គត់ផ្គង់គ្រឿងសព្វាវុធ ឲ្យបានគ្រប់គ្រាន់ សម្រាប់អ៊ុយក្រែន ដើម្បីសម្រេចបានលទ្ធផលល្អ នៅក្នុងសង្គ្រាមនេះនៅឡើយ។ អ៊ីតាលី បានផ្តល់គ្រឿងសឹកទាំងនេះ នឹងមានសារៈសំខាន់ខ្លាំង សម្រាប់អ៊ុយក្រែន ហើយនឹងទទួលបានទំនុកចិត្ត ពីអន្តរជាតិ មកលើប្រទេសរបស់ខ្លួនថែមផងដែរ»។
ស្របគ្នានេះដែរ បណ្ដាប្រទេសបស្ចិមលោក និង សម្ពន្ធមិត្តផ្សេងៗទៀត ក៏កំពុងតែបង្កើនការគាំទ្រ និង ផ្គត់ផ្គង់គ្រឿងសព្វាវុធ ជួយដល់ប្រទេសអ៊ុយក្រែន បន្ថែមទៀត ដើម្បីការពារខ្លួន ទប់ទល់នឹងការឈ្លានពានពីកម្លាំងទាហានរុស្ស៊ី។ ការអះអាងរបស់លោកស្រី នាយករដ្ឋមន្ដ្រីអ៊ីតាលី បានកើតឡើង ក្រោយពេល លោក វ្ល៉ាឌីមៀ ពូទីន (Vladimir Putin) ប្រធានាធិបតីរុស្ស៊ី កាលពីថ្ងៃអង្គារ បានធ្វើជាប្រធានគណៈកម្មាធិការថ្មីមួយ ត្រូវបានរៀបចំឡើង ដើម្បីបង្កើនល្បឿនការផលិត និង បញ្ជូនគ្រឿងសព្វាវុធ នាំទៅផ្គត់ផ្គង់ដល់កម្លាំងទាហានរុស្ស៊ី នៅគ្រប់សមរភូមិ នៅក្នុងប្រទេសអ៊ុយក្រែន។
ក្រសួងការពារជាតិចក្រភពអង់គ្លេស បានរាយការណ៍ កាលពីថ្ងៃអង្គារ ថា «រុស្ស៊ី ទំនងជានឹងងាកទៅរកការប្រើប្រាស់យន្តហោះគ្មានមនុស្សបើក ឬដ្រូនច្រើន សម្រាប់ព្យាយាមវាយលុក ទៅលើប្រព័ន្ធការពារដែនអាកាសរបស់កងទ័ពការពរទឹកដីអ៊ុយក្រែន។ ចំណែកគ្រាប់កាំភ្លើងធំរបស់ទាហានរុស្ស៊ី កំពុងតែនៅសេសសល់តិចតូច»។
ដោយឡែក វិទ្យាស្ថានសិក្សាពីសង្គ្រាម មានមូលដ្ឋាន នៅក្នុងរដ្ឋធានីវ៉ាស៊ីនតោន សហរដ្ឋអាមេរិក បានអះអាង ថា «រុស្ស៊ី យឺតយ៉ាវវាយប្រហារតាមផ្លូវអាកាស ឬប្រើប្រាស់កាំជ្រួច និង យន្តហោះគ្មានមនុស្សបើក ឬដ្រូន អាចឆ្លុះបញ្ចាំង ពីការថយចុះ នៅក្នុងឃ្លាំងស្តុកមីស៊ីល និង ដ្រូន ហើយការវាយប្រហារ កំណត់ពីប្រសិទ្ធភាពលើការសម្រេចគោលដៅយោធា ជាយុទ្ធសាស្ត្ររបស់រុស្ស៊ី»៕