រដ្ឋធានីវ៉ាស៊ីតោន៖ រហូតមកដល់ពេលនេះ សហរដ្ឋអាមេរិក កំពុងតែតាមដាន អំពីសកម្មភាពរបស់ក្រុងមូស្គូ ខ្លាចមានការបង្កប់ការដាក់ពង្រីកអាវុធមហាប្រល័យលោក នៅក្នុងធ្វើសមយុទ្ធកម្លាំងទាហាននុយក្លេអ៊ែរប្រចាំឆ្នាំរបស់រុស្ស៊ី។
ទីភ្នាក់ងារសារព័ត៌មាន AFP បានចេញផ្សាយ កាលពីថ្ងៃសុក្រ ទី២៨ ខែតុលា ថា មន្ដ្រីជាន់ខ្ពស់ ក្រសួងការពារជាតិសហរដ្ឋអាមេរិក បានអះអាង ថា មន្ទីរបញ្ចកោណ មិនបានមើលឃើញសញ្ញាណាមួយ បង្ហាញថា ការធ្វើសមយុទ្ធប្រចាំឆ្នាំរបស់កម្លាំងយុទ្ធសាស្ត្រនុយក្លេអ៊ែររុស្ស៉ី មានបង្កប់ការដាក់ពង្រាយអាវុធមហាប្រល័យលោក ពិតប្រាកដនោះឡើយ។
លោក ឡយដ៍ អូស្ទីន (Lloyd Austin) រដ្ឋមន្ត្រីការពារជាតិសហរដ្ឋអាមេរិក បានបញ្ជាក់ ថា «យើងមិនបានមើលឃើញសញ្ញាណាមួយ ធ្វើឱ្យយើង ជឿថា រុស្ស៊ី កំពុងតែធ្វើសកម្មភាពលួចលាក់ ដាក់ពង្រាយនុយក្លេអ៊ែរពិតប្រាកដនោះទេ»។
លោករដ្ឋមន្ដ្រីក្រសួងការពារជាតិសហរដ្ឋអាមេរិក បានបន្ថែម ថា លោក មិនជឿ ថា ប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) ហ៊ានសម្រេចចិត្តប្រើប្រាស់អាវុធនុយក្លេអ៊ែរយុទ្ធសាស្ដ្រ នោះឡើយ។ ប៉ុន្ដែលោករដ្ឋមន្ដ្រី ក៏មិនបានបញ្ជាក់ ថាតើសហរដ្ឋអាមេរិក នឹងឆ្លើយតបបែបណា ប្រសិនបើមូស្គូ សម្រេចចិត្តយ៉ាងពិតប្រាកដ អំពីការប្រើអាវុធមហាប្រល័យលោកនេះដែរ។
លោក វ្ល៉ាឌីមៀ ពូទីន (Vladimir Putin) ប្រធានាធិបតីរុស្ស៊ី កាលពីថ្ងៃពុធ បានត្រួតពិនិត្យការធ្វើសមយុទ្ធប្រចាំឆ្នាំ ឈ្មោះ «Grom» ដោយផ្ទាល់។ សមយុទ្ធនោះ ក៏មានការចូលរួម ពីកម្លាំងទាហានយុទ្ធសាស្ត្រនុយក្លេអ៊ែររបស់រុស្ស៉ី ដោយមានការធ្វើតេស្ដមីស៊ីលបាលិស្ទីកអន្តរទ្វីប បាញ់ចេញពីនាវាមុជទឹក និង យន្ដហោះទម្លាក់គ្រាប់បែកយុទ្ធសាស្ត្រ ផងដែរ។
ជាមួយគ្នានេះដែរ បុរសខ្លាំង នៅរុស្ស៊ី រូបនេះ បានចោទប្រកាន់ដល់បណ្ដាប្រទេសលោកខាងលិ ពីការបង្កាច់បង្ខូចនុយក្លេអ៊ែរ ប្រឆាំងនឹងរុស្ស៊ី ដើម្បីបង្ខំសម្ពន្ធមិត្ត ឱ្យងាកចេញពីក្រុងម៉ូស្គូ។ ប្រទេសមហាអំណាចលោកខាងលិច កាលពីពេលថ្មីៗនេះ បានបរិហារ ពីការគំរាមកំហែងប្រើប្រាសអាវុធមហាប្រល័យលោក បង្កឡើង ដោយវិមានក្រឹមឡាំង ក្រោយពេលក្រុងមូស្គូ ចោទប្រកាន់ ដល់អ៊ុយក្រែន ពីការរៀបចំប្រើប្រាស់គ្រាប់បែកវិទ្យុសកម្ម វាយប្រហារទៅលើប្រទេសរុស្ស៊ី៕