រដ្ឋធានីវ៉ាស៊ីនតោន៖ រហូតមកដល់ពេលនេះ ក្រុងប៉េកាំង នៅតែមិនបានទទួលស្គាល់ អំពីរដ្ឋការរបស់តៃវ៉ាន់ ដដែល ហើយ ចិន ថែមទាំងទាមទារឲ្យក្រុងតៃប៉ិ ទទួលស្គាល់អធិបតេយ្យភាពរបស់ចិន ប៉ុន្ដែរដ្ឋាភិបាលរបស់លោកស្រី សៃ អ៊ីងវ៉ិន (Tsai Ing-wen) ប្រធានាធិបតីតៃវ៉ាន់ បានប្រឆាំងយ៉ាងដាច់អហង្ការ ដោយលើកហេតុផល ថា មានតែប្រជាជន នៅលើដែនកោះមួយនេះតែប៉ុណ្ណោះ ទើបអាចសម្រេចជោគវាសនាអនាគតរបស់ពួកគេបាន។
សារព័ត៌មាន CNA បានចេញផ្សាយ កាលពីព្រឹក ថ្ងៃព្រហស្បតិ៍ ទី២៧ ខែតុលា ថា លោក អេនតូនី ប្ល៊ីនខែន (Antony Blinken) រដ្ឋមន្ត្រីក្រសួងការបរទេសអាមេរិក បានបញ្ជាក់ កាលពីថ្ងៃពុធ ថា ចិន បានសម្រេចចិត្ត ច្រានចោលឋានៈជារដ្ឋរបស់តៃវ៉ាន់ ហើយក្រុងប៉េកាំង បានចាប់ផ្តើម ដាក់សម្ពាធ ទៅលើដែនកោះ គ្រប់គ្រងដោយខ្លួនឯង រួមទាំងការលទ្ធភាព អំពីការប្រើប្រាស់កម្លាំងយោធាថែមទៀតផង។
លោករដ្ឋមន្ត្រីក្រសួងការបរទេសអាមេរិក បានថ្លែង នៅក្នុងព្រឹត្ដិការណ៍មួយ រៀបចំឡើង ដោយ Blooberg ថា ចិន បានផ្លាស់ប្តូរការយល់ដឹងជាមូលដ្ឋាន ដែលមានអាយុកាលជាច្រើនទសវត្សរ៍កន្លងមកហើយ រវាងក្រុងវ៉ាស៊ីនតោន និង ក្រុងប៉េកាំង ដោយសារតែមានភាពខុសគ្នារបស់ចិន ជាមួយនឹងតៃវ៉ាន់ គ្រប់គ្រងដោយសន្តិវិធី។ ចំណែករដ្ឋាភិបាលក្រុងប៉េកាំង ចង់បង្កើនល្បឿន ស្វែងរកការបង្រួបបង្រួមជាមួយតៃវ៉ាន់ឡើងវិញ។
លោក អេនតូនី ប្ល៊ីនខែន បានបន្ថែម ថា ចិន បានសម្រេចចិត្ត ដាក់សម្ពាធបន្ថែមទៀត ទៅលើកោះតៃវ៉ាន់ និង រក្សានូវលទ្ធភាព ពីការប្រើប្រាស់កម្លាំងយោធា ដើម្បីសម្រេចបាននូវគោលបំណងរបស់ក្រុងប៉េកាំង ប្រសិនបើយុទ្ធសាស្ត្រដាក់សម្ពាធនេះ មិនអាចប្រព្រឹត្ដទៅបាន។
ប្រមុខការទូតសហរដ្ឋអាមេរិក រូបនេះ បានបន្ដ ថា ជាការពិតណាស់ ក្រុងវ៉ាស៊ីនតោន មិនចង់ឲ្យមាន«សង្គ្រាមត្រជាក់» កើតឡើងជាថ្មីនោះទេ ហើយគាត់ក៏មិនបានព្យាយាមរារាំងចិននោះដែរ ប៉ុន្តែគាត់បានតាំងចិត្ត និង ក្រោកឈរឡើង ដើម្បីផលប្រយោជន៍របស់សហរដ្ឋអាមេរិក និង សម្ពន្ធមិត្ត។
ប្រមុខការទូតសហរដ្ឋអាមេរិក រូបនេះ កាលពីសប្ដាហ៍កន្លងទៅ បានអះអាង ថា ក្រុងប៉េកាំង បានកំណត់គោលដៅ បង្រួបបង្រួមជាមួយតៃវ៉ាន់ ឲ្យបានលឿនជាងការកំណត់ទុកពីមុន។ ប៉ុន្ដែគាត់មិនបានកំណត់ អំពីកាលបរិច្ឆេទនោះដែរ។
ក្រុមមន្ដ្រីសហរដ្ឋអាមេរិក បានព្រមាន ថា ចិន មានសមត្ថភាព នឹងដណ្ដើមយកតៃវ៉ាន់ នៅក្នុងឆ្នាំ២០២៧។ ជាមួយនឹងការប្រមើលឃើញជាមុន ទើបសហរដ្ឋអាមេរិក បានពិចារណា អំពីការផលិតគ្រឿងសព្វាវុធរបស់ខ្លួន រួមគ្នាជាមួយនឹងតៃវ៉ាន់ នៅលើដែនកោះនេះតែម្ដង ដើម្បីបង្កើនលឿនការផ្គត់ផ្គង់គ្រឿងសឹក ដល់រដ្ឋាភិបាលតៃប៉ិរបស់លោកស្រី សៃ អ៊ីងវ៉ិន ប្រធានាធិបតីតៃវ៉ាន់៕