រដ្ឋធានីវ៉ាស៊ីនតោន៖ បរាជ័យយ៉ាងធ្ងន់ធ្ងរ នៅលើសមរភូមិរបស់អ៊ុយក្រែន បានធ្វើឲ្យក្រុមឧត្ដមសេនីយ៍យោធារស្ស៊ី មានការខកចិត្តយ៉ាងខ្លាំង ទើបពួកគេនាំគ្នា ជជែកពិភាក្សា អំពីការប្រើប្រាស់អាវុធមហាប្រល័យលោកយុទ្ធសាស្ដ្រ ហើយសកម្មភាពបែបនេះ កំពុងតែបង្កឲ្យបណ្ដាប្រទេសបស្ចិមលោក មានការព្រួយបារម្ភ កាន់តែខ្លាំងឡើងបន្ថែមទៀត។
សារព័ត៌មាន CBS News បានចេញផ្សាយ កាលពីថ្ងៃពុធ ទី២ ខែវិច្ឆិកា ថា មន្ដ្រីជាន់ខ្ពស់របស់សហរដ្ឋអាមេរិក ចំនួន២រូប បានប្រាប់ដល់បណ្ដាញទូរទស្សន៍ CBS News កាលពីថ្ងៃពុធ ថា កាលពីអំឡុងពាក់កណ្ដាល ខែតុលា ក្រុមមន្ដ្រីយោធាកំពូលៗរបស់រុស្ស៊ី បានជជែកពិភាក្សាគ្នា អំពីរបៀប និង ពេលវេលា ដែលពួកគេ អាចនឹងប្រើប្រាស់អាវុធនុយក្លេអ៊ែរយុទ្ធសាស្ដ្រ នៅលើសមរភូមិ នៅអ៊ុយក្រែន។ ព័ត៌មានសម្ងាត់នេះ បានធ្វើឲ្យក្រុមមន្ដ្រីសហរដ្ឋអាមេរិកមានការព្រួយបារម្ភ កាន់តែខ្លាំងឡើង ដោយសារតែការពិភាក្សាពាក់ព័ន្ធនេះ បានកើតឡើង មិនយូរប៉ុន្មាន ក្រោយពេលលោក វ្ល៉ាឌីមៀ ពូទីន (Vladimir Putin) កំពុងតែមើលឃើញកម្លាំងការពារទឹកដីរបស់អ៊ុយក្រែន ដណ្ដើមបានដែនដីរបស់ពួកគេ ពីកម្លាំងទាហានរបស់គាត់ ត្រឡប់ទៅវិញ។
ភាពតានតឹង ជុំវិញការប្រើអាវុធនុយក្លេអ៊ែរ បានកើនឡើងជាលំដាប់ ចាប់តាំងពីកងទ័ពការពារទឹកដីរបស់អ៊ុយក្រែន បានទទួលជោគជ័យ នៅក្នុងការវាយលុក ទៅលើកម្លាំងទាហានរុស្ស៊ី ចាប់តាំងពីដើមខែកញ្ញា រហូតមក។
មន្ដ្រីជាន់ខ្ពស់បស្ចិមលោក បានអះអាងទៀត ថា លោក វ្ល៉ាឌីមៀ ពូទីន (Vladimir Putin) ប្រធានាធិបតីរុស្ស៊ី មិនបានចូលរួម នៅក្នុងកិច្ចពិភាក្សា កាលពីអំឡុងខែតុលា នោះឡើយ។ សកម្មភាពបែបនេះ បានធ្វើឡើង ប្រឆាំងនឹងសង្គ្រាមវោហារសាស្ត្រនុយក្លេអ៊ែរ និង បរាជ័យយ៉ាងខ្លាំងរបស់រុស្ស៊ី នៅលើសមរភូមិ។ ការពិភាក្សារបស់ក្រុមមេបញ្ជាការយោធាជាន់ខ្ពស់របស់រុស្ស៊ី កំពុងតែបង្កក្ដីព្រួយបារម្ភយ៉ាងខ្លាំង ដល់រដ្ឋបាលរបស់ប្រធានាធិបតីសហរដ្ឋអាមេរិក លោក ចូ បៃដិន ដោយសារតែពួកឧត្តមសេនីយ៍របស់រុស្ស៉ី មានការខកចិត្តយ៉ាងខ្លាំង ក្រោយពេលបរាជ័យយ៉ាងធ្ងន់ធ្ងរ នៅលើសមរភូមិរបស់អ៊ុយក្រែន។
កិច្ចពិភាក្សារបស់ពួកមន្ដ្រីយោធាកំពូលរបស់រុស្ស៊ី អាចបានសន្មត់ ថា វាជាការគំរាមកំហែង ប្រើប្រាស់អាវុធនុយក្លេអ៊ែរ ពីប្រធានាធិបតីរុស្ស៊ី លោក ពូទីន អាចនឹងមិនមែន គ្រាន់តែជាការគំរាមកំហែង ដោយប្រើប្រាស់ ត្រឹមតែពាក្យសម្ដីប៉ុណ្ណោះទេ។
ទោះជាយ៉ាងណា ក្រុមមន្ត្រីកំពូលៗរបស់សហរដ្ឋអាមេរិក នៅតែបញ្ជាក់ ជាដដែលៗ ថា រហូតមកដល់ពេលនេះ ក្រុងវ៉ាស៊ីនតោន នៅតែរកមិនទាន់ឃើញមានភស្តុតាងណាមួយបង្ហាញ ថា រុស្ស៉ី កំពុងតែចល័តអាវុធមហាប្រល័យលោក ទៅកាន់ទីតាំង សម្រាប់ការរៀបចំត្រៀមលក្ខណៈវាយប្រហារ នៅក្នុងប្រទេសអ៊ុយក្រែន នោះដែរ៕
