រដ្ឋធានីអ៊ិស្លាមបាដ៖ អតីតនាយករដ្ឋមន្ដ្រីប៉ាគីស្ថាន លោក អ៊ីមរ៉ាន់ ខាន់ (Imran Khan) កំពុងតែដឹកនាំការតវ៉ាទាមទារឲ្យរដ្ឋាភិបាល បោះឆ្នោត មុនអាណត្ដិ ស្រាប់តែមានខ្មាន់កាំភ្លើង បើកការបាញ់ប្រហារ បណ្ដាលឲ្យគាត់រងរបួស ខណៈអ្នកគាំទ្ររបស់គាត់ម្នាក់បាត់បង់ជីវិត និង ១៤នាក់ផ្សេងទៀតរងរបួ។
សារព័ត៌មាន Business Recorder បានចេញផ្សាយ កាលពីថ្ងៃសុក្រ ទី៤ ខែវិច្ឆិកា ថា លោក អ៊ីមរ៉ាន់ ខាន់ (Imran Khan) អតីតនាយករដ្ឋមន្ត្រីប៉ាគីស្ថាន បានរងរបួសជើង ប៉ុន្ដែមិនគ្រោះថ្នាក់ដល់ជីវិតនោះទេ។ ការបាញ់ប្រហារនេះបានកើតឡើង ខណៈកំពុងតែជួបជុំនយោបាយមួយ កាលពីថ្ងៃព្រហស្បតិ៍ ហើយគណបក្សរបស់គាត់ បានហៅសកម្មភាពនេះ ជាការប៉ុនប៉ងធ្វើឃាត ដែលបានសម្លាប់មនុស្សម្នាក់ និង ជាច្រើននាក់ផ្សេងទៀត បានរងរបួស។
ក្រុមវេជ្ជបណ្ឌិត បានបញ្ជាក់ ថា ការបាញ់ប្រហារ កាលពីវេលាម៉ោង៤ និង៤១នាទីរសៀល ថ្ងៃព្រហស្បតិ៍ ទី៣ ខែវិច្ឆិកា នោះ បានបណ្ដាលឲ្យលោក ខាន់ រងរបួសជើងខាងស្ដាំ។ ចំណែកអ្នកគាំទ្ររបស់គាត់ម្នាក់ បានបាត់បង់ជីវិត និង ១៤នាក់ផ្សេងទៀត រងរបួស។
វីដេអូ បាញ់ប្រហារនោះ បានឃើញលោក ខាន់ គ្រវីដៃ នៅលើរថយន្ដធំ នៅខាងក្រៅទីប្រជុំជន ហ្គូចរ៉ាន់វ៉ាឡា (Gujranwala) ស្ថិតក្នុងខេត្តពុនចាប (Punjab) ខណៈនោះ ក៏មានការបាញ់ប្រហារឡើងតែម្ដង។
លោក អាសាដ អ៊ូម៉ា (Asad Umar) មន្ដ្រីជាន់ខ្ពស់គណបក្ស Tehreek-e-Insaf (PTI) បានអះអាង ថា គ្រាប់កាំភ្លើងបានហោះ មកត្រូវជើងរបស់លោក ខាន់ (Khan) ហើយឆ្អឹងជើងរបស់គាត់ ទំនងជាប្រេះ។ ការវាយប្រហារនេះ បានកើតឡើង នៅក្នុងស្រុកវ៉ាហ្ស៊ីរាបាដ (Wazirabad) ខេត្ត Punjab នាភាគខាងកើត ខណៈលោក Khan កំពុងតែធ្វើដំណើរតាមក្បួនរថយន្ត ឆ្ពោះទៅកាន់រដ្ឋធានីអ៊ិស្លាមបាដ (Islamabad) ដែលជាផ្នែកមួយ នៃយុទ្ធនាការរបស់គាត់ នៅក្នុងគោលបំណងបង្ខំឱ្យរដ្ឋាភិបាល រៀបចំការបោះឆ្នោត នៅមុនកាលកំណត់។
លោក អ៊ីមរ៉ាន់ ខាន់ (Imran Khan) ត្រូវបានបណ្តេញពីតំណែង នៅក្នុងការបោះឆ្នោត ដកទំនុកចិត្តពីរដ្ឋសភា កាលពីខែមេសា ឆ្នាំ២០២២ ដោយសារតែវិបត្ដិសេដ្ឋកិច្ចយ៉ាងធ្ងន់ធ្ងរ នៅក្នុងប្រទេសប៉ាគីស្ថាន។ អតីតនាយករដ្ឋមន្ដ្រីរូបនេះ បានចោទប្រកាន់ ថា ការបណ្តេញគាត់ ចេញពីតំណែង ក៏ជាការសមគំនិត បង្កើតឡើង ដោយអ្នកស្នងតំណែងបន្ទាប់ពីគាត់ គឺលោកនាយករដ្ឋមន្ត្រី សាបាស សារីហ្វ (Shahbaz Sharif) និង សហរដ្ឋអាមេរិក៕