រដ្ឋធានីវ៉ាស៊ីនតោន៖ ស្ថានភាព នៅលើឧបទ្វីបកូរ៉េ កំពុងតែតានតឹងខ្លាំងឡើង ក្រោយពេលក្រុងព្យុងយ៉ាង បានបាញ់សាកល្បងមីស៊ីលជាច្រើនប្រភេទ ដោយរួមទាំងមីស៊ីលបាលិស្ទីអន្ដរទ្វីប (ICBM) ជាញឹកញាប់ ហើយសហរដ្ឋអាមេរិក ជឿថា មានតែចិន និង រុស្ស៊ី ទើបមានឥទ្ធិពលខ្លាំងក្លា អាចបញ្ឈប់កូរ៉េខាងជើង បាន។
សារព័ត៌មាន Daily Hunt បានចេញផ្សាយ កាលពីព្រឹក ថ្ងៃសុក្រ ទី៤ ខែវិច្ឆិកា ថា មន្ដ្រីជាន់ខ្ពស់ សហរដ្ឋអាមេរិក បានអះអាង ថា ក្រុងវ៉ាស៊ីនតោន ជឿ ថា ចិន និង រុស្ស៊ី មានឥទ្ធិពលខ្លាំង អាចបញ្ចុះបញ្ចូល ដល់ប្រទេសកូរ៉េខាងជើង បញ្ឈប់ការសាកល្បងគ្រាប់បែកមហាប្រល័យលោកបាន។
មន្ដ្រីសហរដ្ឋអាមេរិក បានថ្លែងទៅកាន់ទីភ្នាក់ងារសារព័ត៌មានរបស់ចក្រភពអង់គ្លេស Reuters ដោយសុំលក្ខខណ្ឌមិនបញ្ចេញអត្ដសញ្ញាណ ថា ក្រុងវ៉ាស៊ីនតោន បានថ្លែង ចាប់តាំងពីខែឧសភា មក ថា កូរ៉េខាងជើង បានរៀបចំប្រើប្រាស់ការសាកល្បងអាវុធនុយក្លេរអ៊ែរ ជាលើកដំបូង ចាប់តាំងពីឆ្នាំ២០១៧ រហូតមក។ ប៉ុន្ដែសហរដ្ឋអាមេរិក មិនទាន់ច្បាស់ ថា នៅពេលណា កូរ៉េខាងជើង នឹងអនុវត្ដការសាកល្បងអាវុធមហាប្រល័យលោកបែបនេះ បន្ដទៀតនោះដែរ។
កូរ៉េខាងត្បូង ក៏បានព្រមាន អំពីការសាកល្បងអាវុធនុយក្លេអ៊ែរលើកទី៧របស់ក្រុងព្យុងយ៉ាង សម្រាប់រយៈពេលប៉ុន្មានខែមកនេះ ខណៈអង្គការឃ្លាំមើលនុយក្លេអ៊ែររបសអង្គការសហប្រជាជាតិ បានថ្លែង កាលពីសប្ដាហ៍មុន ថា កូរ៉េខាងជើង បានត្រៀមរៀបចំរួចរាល់ហើយ សម្រាប់ការបាញ់សាកល្បងអាវុធដ៏គ្រោះថ្នាក់បំផុតបែបនេះ។
មន្ដ្រីសហរដ្ឋអាមេរិក បានបញ្ជាក់ ថា «យើងមានកម្រិតទំនុកចិត្ត លើអ្វីដែលកូរ៉េខាងជើង បានរៀបចំ។ យើងជឿ ថា កូរ៉េខាងជើង អាចនឹងសាកល្បងអាវុធនុយក្លេអ៊ែរ…ខ្ញុំមិនបានប្រាប់អ្នក អំពីអ្វីដែលយើងគិត ថា កូរ៉េខាងជើង នឹងធ្វើនៅថ្ងៃនេះ សម្រាប់ហេតុផលជាបន្ដន្ទាប់នោះដែរ»។
មន្ដ្រីសហរដ្ឋអាមេរិក បានបញ្ជាក់ ថា «យើងគិត ថា កូរ៉េខាងជើង កំពុងតែគណនា អំពីកម្រិតទទួលបាន ពីប្រទេសផ្សេងៗទៀត នៅក្នុងតំបន់ ជាពិសេស រុស្ស៊ី និងចិន។ ខ្ញុំគិត ថា អាកប្បកិរិយារបស់រុស្ស៊ី និង ចិន មានឥទ្ធិពល លើកូរ៉េខាងជើង។ ចំណែក ក្រុងវ៉ាស៊ីនតោន ចង់ឃើញរុស្ស៊ី និង ចិន ធ្វើអ្វីអាចរារាំងដល់ក្រុងព្យុងយ៉ាង បញ្ឈប់ការបាញ់សាកល្បងអាវុធនុយក្លេអ៊ែរនេះ»។
សហរដ្ឋអាមេរិក បានស្នើសុំ ឲ្យកិច្ចប្រជុំបើកទ្វាររបស់ក្រុមប្រឹក្សាសន្ដិសុខ អង្គការសហប្រជាជាតិ ជាកន្លែងក្រុងមូស្គូ និង ក្រុងប៉េកាំង ក៏ស្ថិតក្នុងចំណោមសមាជិកអចិន្ដ្រៃយ៍ទាំង៥ មានសិទ្ធិអំណាចវេតូ ដើម្បីពិភាក្សា លើបញ្ហាកូរ៉េខាងជើង ក្រោយពេលក្រុងព្យុងយ៉ាង បានបាញ់មីស៊ីលជាច្រើនប្រភេទ ជាបន្ដបន្ទាប់ កាលពីប៉ុន្មានថ្ងៃមុននេះ ដោយរួមទាំងមីស៊ីលបាលិស្ទីកអន្ដរទ្វីប (ICBM) ដែលកូរ៉េខាងត្បូង និង ជប៉ុន បានរកឃើញ កាលពីថ្ងៃព្រហស្បតិ៍។
កូរ៉េខាងជើង បានជាប់បម្រាម លើការសាកល្បងអាវុធនុយក្លេអ៊ែរ និង មីស៊ីលបាលិស្ទីក ក្រោមទណ្ឌកម្មរបស់ក្រុមប្រឹក្សាសន្ដិសុខ អង្គការសហប្រជាតិ ដែលបានរឹតបន្ដឹង អស់រយៈពេលជាច្រើនឆ្នាំកន្លងមកហើយ ដើម្បីព្យាយាមកាត់បន្ថយមូលនិធិ សម្រាប់កម្មវិធីអាវុធរបស់ក្រុងព្យុងយ៉ាង។
កូរ៉េខាងជើង បានចាប់ផ្ដើមបាញ់សាកល្បងមីស៊ីល នៅឆ្នាំនេះ និង ការបាញ់សាកល្បង នៅក្នុងសប្ដាហ៍នេះ ស្របពេលកងទ័ពសហរដ្ឋអាមេរិក និង កូរ៉េខាងត្បូង បានធ្វើសមយុទ្ធទ័ពអាកាសទ្រង់ទ្រាយធំ ដោយមានការចូលរួមពីយន្ដហោះចម្បាំង ប្រហែលជាង២៤០គ្រឿង។ កូរ៉េខាងជើង បានចាត់ទុក ការធ្វើសមយុទ្ធនេះ ជាការបង្កហេតុ ហើយត្រៀមហាត់សម សម្រាប់ចូលលុកលុយ ទៅលើប្រទេសរបស់ខ្លួន។
មីស៊ីលបាលិស្ទិកអន្ដរទ្វីប ស្ថិតក្នុងចំណោមមីស៊ីលបាលិស្ទីក ចំនួន៣គ្រាប់ ត្រូវបានបាញ់ កាលពីថ្ងៃព្រហស្បតិ៍ ពោលគឺរំលងមួយថ្ងៃ ក្រោយកូរ៉េខាងជើង បានបាញ់មីស៊ីលយ៉ាងតិច២០គ្រាប់ ត្រឹមតែរយៈពេល១ថ្ងៃ។ នៅក្នុងចំណោមគ្រាប់មីស៊ីលជាច្រើនប្រភេទទាំងនោះ មានមីស៊ីលមួយគ្រាប់ បានធ្លាក់ជាលើកដំបូង នៅជិតព្រំដែនសមុទ្ររបស់កូរ៉េខាងត្បូង។
ជាការឆ្លើយតបវិញនោះ កូរ៉េខាងត្បូង បានបញ្ជូនយន្ដហោះចម្បាំងជាច្រើនគ្រឿង បាញ់មីស៊ីល ពីលើអាកាសទៅលើដី ស្ថិតក្នុងដែនទឹក ភាគខាងជើង ព្រំដែនសមុទ្រ។ សកម្មភាពបែបនេះ បានបញ្ឆេះកំហឹងរបស់កូរ៉េខាងជើង ឲ្យបន្ដបាញ់តបត កាន់តែច្រើនឡើង បន្ថែមទៀត។
សហរដ្ឋអាមេរិក និង កូរ៉េខាងត្បូង កាលពីថ្ងៃព្រហស្បតិ៍ បានបញ្ជាក់ ថា ពួកគេនឹងពង្រីកពេលវេលា នៃការធ្វើសមយុទ្ធទ័ពអាកាសបន្ថែមទៀត ហើយក៏មិនបានកំណត់ អំពីពេលវេលា នឹងត្រូវបញ្ចប់នោះដែរ។ ការប្រកាសរបស់សហរដ្ឋអាមេរិក និង សម្ពន្ធមិត្ត នៅអាស៊ីបូព៌ានេះ បានកើតឡើង ដោយសារការបាញ់មីស៊ីលបាលិស្ទីកអន្ដរទ្វីបរបស់កូរ៉េខាងជើង ហើយការសម្រេចចិត្តរបស់ក្រុងព្យុងយ៉ាង នឹងនាំមកនូវគ្រោះថ្នាក់បំផុត៕
