រដ្ឋធានីកៀវ៖ គិតត្រឹមថ្ងៃទី៤ ខែវិច្ឆិកា សង្គ្រាមរបស់ប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) បានអូសបន្លាយ អស់រយៈពេល២៥៤ថ្ងៃ ហើយកំពុងតែបន្ដវាយប្រយុទ្ធយ៉ាងខ្លាំង ប៉ុន្ដែឥឡូវនេះ រដ្ឋមន្ដ្រីក្រសួងការពារជាតិសហរដ្ឋអាមេរិក បង្ហាញពីសុទិដ្ឋិនិយមរបស់ខ្លួន ថា សមត្ថភាពរបស់អ៊ុយក្រែន អាចនឹងរំដោះតំបន់ឃើរសុន ពីកម្លាំងទាហានរុស្ស៊ី ត្រឡប់មកគ្រប់គ្រងវិញបាន។
សារព័ត៌មាន Arab News បានចេញផ្សាយ កាលពីព្រឹក ថ្ងៃសុក្រ ទី៤ ខែវិច្ឆិកា ថា លោក ឡូយ អូស្ទីន (Lloyd Austin) រដ្ឋមន្ដ្រីក្រសួងការពារជាតិសហរដ្ឋអាមេរិក បានថ្លែង នៅឯមន្ទីរបញ្ចកោណ កាលពីថ្ងៃព្រហស្បតិ៍ ថា «ខ្ញុំនឹងមិនឆ្លើយសំណួរ ថាតើកម្លាំងទាហានរុស្ស៊ី កំពុងតែរៀបចំដកថយ ឬយ៉ាងណានោះទេ ប៉ុន្ដែខ្ញុំសូមបង្ហាញ អំពីទំនុកចិត្ដរបស់ខ្ញុំ ថា អ៊ុយក្រែន មានសមត្ថភាព អាចវាយរំដោះតំបន់ឃើរសុន ត្រឡប់មកវិញបាន»។
ជាមួយគ្នានេះដែរ មន្ដ្រីបស្ចិមលោកមួយរូប បានថ្លែងប្រាប់ដល់ទីភ្នាក់ងារសារព័ត៌មាន Reuters សុំលក្ខខណ្ឌមិនបញ្ចេញអត្ដសញ្ញាណ បានវាយតម្លៃ ថា រុស្ស៊ី កំពុងតែរៀបចំគម្រោង ដកទ័ពថយ ចេញពីភាគខាងកើតច្រាំងទន្លេឌីនីប្រូ ព្រោះវាអាចការពារកម្លាំងរបស់ពួកគេបាន។
ដោយឡែក មន្ត្រីលើកបន្តុបដោយក្រុងមូស្គូ នៅក្នុងតំបន់ឃើរសុន (Kherson) បានអះអាង ថា ទាហានរុស្ស៊ី អាចនឹងដកថយ ចេញពីភាគខាងលិច ច្រាំងទន្លេឌីនីប្រូ (Dnieper)។ ប៉ុន្តែមន្ដ្រីការពារជាតិកំពូលរបស់សហរដ្ឋអាមេរិក បានបន្លឺសំឡេង ប្រកបដោយសុទិដ្ឋិនិយម អំពីសមត្ថភាពរបស់កម្លាំងការពារទឹកដីអ៊ុយក្រែន អាចវាយដណ្តើមយកទីក្រុង Kherson ជាតំបន់យុទ្ធសាស្ត្រដ៏សំខាន់ នៅភាគខាងត្បូង ប្រទេស ត្រឡប់មកឡើងវិញ ខណៈក្រុងកៀវ មានការប្រុងប្រយ័ត្នខ្ពស់បន្ថែមទៀត។
លោក គីរីល ស្ដ្រែមូសូវ (Kirill Stremousov) អនុប្រធានរដ្ឋបាលស៊ីវិល តំបន់ឃើរសុន លើកបន្ដុប ដោយក្រុងមូស្គូ បានបញ្ជក់ នៅក្នុងបទសម្ភាសន៍មួយ កាលពីថ្ងៃព្រហស្បតិ៍ ជាមួយនឹងកម្មវិធីផ្សាយបន្ដផ្ទាល់របស់បណ្ដាញផ្សព្វផ្សាយអនឡាញ គាំទ្រវិមានក្រឹមឡាំង ថា «ភាគច្រើន ទំនងជាកងអង្គភាពរបស់យើង ទាហានរបស់យើង នឹងចាកចេញ ពីច្រាំងទន្លេ ភាគខាងកើត»។
កម្លាំងទាហានរុស្ស៊ី បានដណ្ដើមកាន់កាប់តំបន់ឃើរសុន (Kherson) ជាភូមិសាស្ដ្រយុទ្ធសាស្ដ្រដ៏សំខាន់របស់អ៊ុយក្រែន ស្ថិតនៅភាគខាងត្បូង ប្រទេស ចាប់តាំងពីប្រធានាធិបតី លោក វ្ល៉ាឌីមៀ ពូទីន (Vladimir Putin) បានបញ្ជាឲ្យកងទ័ពរបស់គាត់ ឆ្លងកាត់ព្រំដែនរបស់ខ្លួន វាយលុកចូល ទៅក្នុងប្រទេសជិត នាថ្ងៃទី២៤ ខែកុម្ភៈ ឆ្នាំ២០២២ រហូតមក។ តំបន់ឃើរសុន ក៏រួមបញ្ចូលជាមួយផ្នែកម្ខាង នៃទំនប់ទន្លេឌីនីប្រូ Dnieper គ្រប់គ្រងការផ្គត់ផ្គង់ទឹក ស្រោចស្រព នៅតំបន់គ្រីមៀ (Crimea) ជាឧបទ្វីបរបស់អ៊ុយក្រែន ដែលក្រុងមូស្គូ បានរឹបអូសយក និង ដាក់បញ្ចូលជាទឹកដីរបស់រុស្ស៊ី នៅក្នុងឆ្នាំ២០១៤។
កន្លងមក រុស្ស៊ី មិនព្រមដកកម្លាំងទាហានរបស់ខ្លួន ចេញពីតំបន់ឃើរសុន នោះឡើយ ព្រោះថា ការដកកងទ័ពចេញ បង្ហាញពីបរាជ័យយ៉ាងធ្ងន់ សម្រាប់ក្រុងមូស្គូ។ ប៉ុន្ដែ កាលពីថ្ងៃព្រហស្បតិ៍ មិនមានពាក្យមួយមាត់ណា ចេញពីក្រុមមន្ដ្រីជាន់ខ្ពស់ នៅក្នុងវិមានក្រឹមឡាំង នោះដែរ ដោយសារមានរូបភាពជាច្រើន ត្រូវបានបង្ហោះ នៅលើបណ្ដាញសង្គម ពីអគារសំខាន់ៗជាច្រើន មិនមានដោតទង់ជាតិរបស់រុស្ស៊ី បន្ដទៀត។
លោកស្រី ណាតាលៀ ហ៊ូមេនូក (Natia Humeniuk) អ្នកនាំពាក្យ នៃបញ្ជាការដ្ឋានកងទ័ពប្រចាំតំបន់ភាគខាងត្បូងរបស់អ៊ុយក្រែន បានបញ្ជាក់ ថា ការនិយាយ អំពីការដកទ័ព អាចជាអន្ទាក់របស់រុស្ស៊ី ហើយរូបថតដែលបានចែករំលែក នៅលើគណនី Telegram គាំទ្រវិមានក្រឹមឡាំង ជាព័ត៌មានមិនពិត។
លោកស្រី បានថ្លែង តាមបណ្ដាញទូរទស្សន៍ ថា «សកម្មភាពនេះ អាចជាការបង្ហាញ អំពីការបង្កហេតុជាក់លាក់មួយ ដើម្បីបង្កើតចំណាប់អារម្មណ៍ ថា តាំងទីឈរជើងទាំងនោះ ត្រូវបានបោះបង់ចោល ហើយវាមានសុវត្ថិភាព សម្រាប់ការចូលទៅកាន់ទីនោះ ខណៈរុស្ស៊ី កំពុងតែរៀបចំ សម្រាប់ការប្រយុទ្ធគ្នា នៅតាមដងផ្លូវ»៕