រដ្ឋធានីមូស្គូ៖ ស្របពេលទាហានរុស្ស៊ី តែងតែបាក់ទ័ពរត់ចោលសមរភូមិជាញឹកញាប់ ទើបធ្វើឲ្យមេដឹកនាំវិមានក្រឹមឡាំង មានការព្រួយបារម្ភ ពីការចាញ់សង្គ្រាម ហើយឥឡូវក្រុងមូស្គូ បានប្រកាសជ្រើសរើសអតីតទ័ពពិសេសរបស់អាហ្វហ្កានីស្ថាន ធ្លាប់ទទួលបានការបណ្ដុះបណ្ដាល និង កៀកស្មាប្រយុទ្ធជាមួយនឹងកងទ័ពសហរដ្ឋអាមេរិក មកជួយធ្វើសង្គ្រាម ក្រោយពេលកេណ្ឌប្រជាជន និង បញ្ចុះបញ្ចូលអ្នកទោស នៅក្នុងពន្ធនាគារ។
សារព័ត៌មាន Military Times បានចេញផ្សាយ កាលពីព្រឹក ថ្ងៃអង្គារ ទី១ ខែវិច្ឆិកា ថា កងទ័ពពិសេសរបស់អាហ្វហ្គានីស្ថាន ធ្លាប់ចូលរួមប្រយុទ្ធជាមួនឹងកងទ័ពសហរដ្ឋអាមេរិក ហើយបានរត់ភៀសខ្លួន ចេញពីប្រទេសកំណើត ចូលទៅកាន់ប្រទេសអ៊ីរ៉ង់ បន្ទាប់ពីពេលប្រធានាធិបតីសហរដ្ឋអាមេរិក បានសម្រេចចិត្តដកទ័ពរបស់ខ្លួន នាំឲ្យមានភាពច្របូកច្របល់ កាលពីថ្ងៃទី១៥ ខែសីហា ឆ្នាំ២០២១នោះ ឥឡូវរុស្ស៊ី បានជ្រើសរើស ឲ្យមកចូលរួមប្រយុទ្ធ នៅក្នុងសង្គ្រាមអ៊ុយក្រែន។
អតីតឧត្តមសេនីយ៍អាហ្វហ្កានីស្ថាន ចំនួន៣រូប បានប្រាប់ដល់ទីភ្នាក់ងារសារព័ត៌មាន AP ថា រុស្ស៉ី ចង់ទាក់ទាញអតីតកងកុម្មង់ដូរបស់អាហ្វហ្កានីស្ថាន រាប់ពាន់នាក់ ឲ្យទៅចូលរួម នៅក្នុងក្រុម«កងកម្លាំងបរទេស» របស់ក្រុងមូស្គូ សម្រាប់បញ្ជូនទៅធ្វើសង្គ្រាម នៅក្នុងប្រទេសអ៊ុយក្រែន។ រុស្ស៊ី បានសន្យាផ្តល់ប្រាក់បៀវត្សរ៍ នៅក្នុង១ខែ ចំនួន១ ៥០០ដុល្លារ ហើយថែមទាំងសន្យា ផ្តល់កន្លែងជ្រកកោន ប្រកបដោយសុវត្ថិភាព សម្រាប់ពួកគេ និង ក្រុមគ្រួសារថែមទៀត ដើម្បីឱ្យពួកគេ អាចចៀសវាង ពីការបណ្តេញឲ្យវិលត្រឡប់ ទៅកាន់ប្រទេសអាហ្វហ្កានីស្ថានវិញ ជាកន្លែងដែលមនុស្សជាច្រើនសន្មត់ ថា ពួកគេអាចនឹងសម្លាប់ ក្រោមស្នាដៃរបស់ពួកតាលីបង់។
ការជ្រើសរើសអតីតទ័ពពិសេសរបស់អាហ្វហ្កានីស្ថាន នេះ គឺដឹកនាំដោយកម្លាំងទាហានស៊ីឈ្នួលរបស់រុស្ស៊ី ឈ្មោះ Wagner Group ហើយបានធ្វើឡើង បន្ទាប់ពីមានការព្រមាន អស់រយៈពេលជាច្រើនខែ ពីទាហានអាមេរិក ដែលធ្លាប់បានប្រកៀកស្មាគ្នាប្រយុទ្ធជាមួយកងកម្លាំងពិសេសអាហ្វហ្កានីស្ថាន ថា ពួកតាលីបង់ មានចេតនាសម្លាប់ពួកគេ ក្រោមលេសថា ពួកគេចូលរួមជាមួយនឹងសត្រូវ។
ទ័ពពិសេសអាហ្វហ្កានីស្ថាន ចន្លោះពី២០ ០០០នាក់ ទៅ៣០ ០០០នាក់ បានចូលរួមកៀកស្មាប្រយុទ្ធជាមួយកងទ័ពសហរដ្ឋអាមេរិក នៅក្នុងអំឡុងសង្គ្រាម រយៈពេល២ទសវត្សរ៍ នៅក្នុងប្រទេសកំណើតរបស់ពួកគេ។ ប៉ុន្ដែមានតែមន្ត្រីជាន់ខ្ពស់ ប្រមាណ ២០០ទៅ៣០០នាក់ប៉ុណ្ណោះ បានចាកចេញពីប្រទេស ខណៈយោធាអាមេរិក ដកខ្លួនចេញពីអាហ្វហ្កានីស្ថាន ក្រោយការដួលរលំរបបគ្រប់គ្រង ដោយលោក អាស្រាហ្វ ហ្កានី នៅថ្ងៃទី១៥ ខែសីហា ឆ្នាំ២០២១៕
