រាជធានីឡុងដ៍៖ ចក្រភពអង់គ្លេស ចាប់តាំងពីលោក បូរីស ចនសុន បានលាលែងពីតំណែងជានាយករដ្ឋមន្ដ្រី ហើយលោកស្រី លីស ត្រាស់ ចូលមកស្នងតំណែង និង ប្រកាសលាលែងបន្ដទៀត ហើយត្រូវបានលោក រីស៊ី ស៊ូណាក់ ចូលមកជំនួសថ្មី ក៏ពួកគេ នៅតែប្រកាន់គោលនយោបាយការបរទេសប្រឆាំងនឹងការឈ្លានពានរបស់ប្រធានាធិបតីរុស្ស៊ី លោក វ្ល៉ាឌីមៀ ពូទីន និង បន្ដផ្ដល់ជំនួយយោធា ទៅដល់អ៊ុយក្រែន បន្ថែមទៀត។
សារព័ត៌មានរបស់ឥណ្ឌា Republic World បានចេញផ្សាយ កាលពេលថ្មីៗថា ចក្រភពអង់គ្លេស ជាសម្ពន្ធមិត្តដ៏ខ្លាំងបំផុតមួយរបស់ក្រុងកៀវ នៅក្នុងអំឡុងសង្គ្រាមរុស្ស៊ី-អ៊ុយក្រែន។ ការបោះជំហានឆ្ពោះទៅរកទិសដៅ នៃកិច្ចសហប្រតិបត្តិការកាន់តែរឹងមាំនោះ នាយករដ្ឋមន្ត្រីថ្មីរបស់ចក្រភពអង់គ្លេស លោក រីស៊ី ស៊ូណាក់ (Rishi Sunak) កាលពីថ្ងៃព្រហស្បតិ៍ បានសន្ទនាតាមទូរស័ព្ទជាមួយប្រធានាធិបតីអ៊ុយក្រែន លោក វ៉ូឡូឌីមៀរ ហ្សេឡែនស្គី (Volodymyr Zelenskyy) ។ មេដឹកនាំទាំងពីរ បានពិភាក្សាគ្នា អំពីកិច្ចគាំទ្រផ្នែកការពារពហុភាគី សម្រាប់អ៊ុយក្រែន ក៏ដូចជា ការបន្តកិច្ចព្រមព្រៀងនាំគ្រាប់ធញ្ញជាតិចេញពីកំពង់ផែសមុទ្រខ្មៅ និង ការពិភាក្សាគ្នា អំពីការដកកម្លាំងទាហានរបស់រុស្ស៊ី ចេញពីតំបន់ឃើរសុន (Kherson)។
ការិយាល័យរបស់នាយករដ្ឋមន្ត្រី បានផ្សព្វផ្សាយព័ត៌មាននេះ នៅលើគេហទំព័ររបស់ពួកគេ ថា «មេដឹកនាំទាំង២ បានព្រមព្រៀងគ្នា ថា ការដកទ័ពរបស់រុស្ស៊ី ចេញពីទីក្រុង Kherson នឹងបង្ហាញ អំពីវឌ្ឍនភាពដ៏រឹងមាំ សម្រាប់កងទ័ពការពារទឹកដីរបស់អ៊ុយក្រែន និង បង្ហាញពីភាពទន់ខ្សោយរបស់ទាហានរុស្ស៊ី»។
នៅក្នុងជំនួបតាមទូរស័ព្ទនោះ លោកនាយករដ្ឋមន្ដ្រីចក្រភពអង់គ្លេស បានប្ដេជ្ញា ថា រដ្ឋាភិបាលក្រុងឡុងដ៍ នឹងបញ្ជូនមីស៊ីលបាញ់ពីលើដីទៅអាកាស ចំនួន ១ ០០០គ្រាប់បន្ថែមទៀត ទៅជួយដល់ក្រុងកៀវ។ ក្រៅពីនេះ ចក្រភពអង់គ្លេស នឹងផ្គត់ផ្គង់សម្លៀកបំពាក់យោធា ទប់ទល់នឹងរដូវរងា ជាង ២៥ ០០០សម្រាប់ ជួយដល់កងទ័ពអ៊ុយក្រែន ផងដែរ។
រដ្ឋាភិបាលចក្រភពអង់គ្លេស ក្រោមការដឹកនាំរបស់លោក បូរីស ចនសុន កាលនៅជានាយករដ្ឋមន្ដ្រី បានជួយជ្រោមជ្រែងយ៉ាងខ្លាំង ដល់ប្រទេសអ៊ុយក្រែន ចាប់តាំងពីការផ្ទុះសង្គ្រាមឈ្លានពានរបស់ប្រធានាធិបតីរុស្ស៊ី លោក វ្ល៉ាឌីមៀ ពូទីន កាលពីថ្ងៃទី២៤ ខែកុម្ភៈ រហូតដល់ថ្ងៃ ដែលគាត់ ត្រូវដើរចេញពីតំណែង។ លើសពីនេះទៅទៀត នៅក្នុងឋានៈជានាយករដ្ឋមន្ដ្រីចក្រភពអង់គ្លេស នោះ លោក ចនសុន បានទៅជួបមេដឹកនាំអ៊ុយក្រែន ដល់រដ្ឋធានីកៀវ ដើម្បីពិភាក្សា និង សិក្សា ពីតម្រូវការរបស់ពួកគេ ថែមទៀតផង។
ទោះជាយ៉ាងណា រហូតមកដល់ពេលនេះ ចក្រភពអង់គ្លេស នៅតែបន្តឈរនៅជួរមុខ សម្រាប់កិច្ចគាំទ្រជាលក្ខណៈអន្តរជាតិ តាមរយៈការផ្តល់ជំនួយ ទាំងផ្នែកសេដ្ឋកិច្ច និ ងសន្តិសុខ ជួយដល់ក្រុងកៀវ ហើយថែមទាំងបានជួយបង្ហាត់បង្រៀនដល់កងទ័ពអ៊ុយក្រែន សរុបរាប់ពាន់នាក់ នៅលើទឹកដីរបស់ខ្លួនផងដែរ។ ប៉ុន្ដែបើតាមសេចក្តីរាយការណ៍ចុងក្រោយនេះ លោក រីស៊ី ស៊ូណាក់ នាយករដ្ឋមន្ដ្រីចក្រភពអង់គ្លេស គ្រោងនឹងទៅបំពេញទស្សនកិច្ច នៅក្នុងរដ្ឋធានីកៀវ ប្រទេសអ៊ុយក្រែន តាមលំនាំលោក បូរីស ចនសុន អតីតនាយករដ្ឋមន្ដ្រី ផងដែរ៕
