ទីក្រុងតៃប៉ិ៖ ជាមួយនឹងការបង្កើនសម្ពាធយោធា និង ការទូត កាន់តែខ្លាំង ពីក្រុងប៉េកាំង មកលើតៃវ៉ាន់ ខណៈប្រធានាធិបតីសហរដ្ឋអាមេរិក និង ចិន គ្រោងនឹងជួបទល់មុខគ្នាជាលើកដំបូង នៅថ្ងៃចន្ទ មុនកិច្ចប្រជុំកំពូលរបស់ក្រុមប្រទេស G-20 នៅក្នុងប្រទេសឥណ្ឌូណេស៊ី លើកយកតៃវ៉ាន់ជារបៀបវារៈចម្បងមកពិភាក្សាគ្នានោះ ប្រធានាធិបតីដែនកោះមួយនេះ បានអះអាងយ៉ាងម៉ឺងម៉ាត់ ថា លោកស្រីត្រូវតែបំពេញបេសកកម្មរបស់លោកស្រី បន្ដការពារដែនកោះមួយនេះ សម្រាប់ប្រជាជនតៃវ៉ាន់។
សារព័ត៌មាន The Economic Times បានចេញផ្សាយ កាលពីថ្ងៃអាទិត្យ ទី១៣ ខែវិច្ឆិកា ថា លោកស្រី សៃ អ៊ីងវ៉ិន (Tsai Ing-wen) ប្រធានាធិបតីតៃវ៉ាន់ បានថ្លែង ថា បេសកកម្ម នៅក្នុងជីវិតរបស់លោកស្រី ដើម្បីធ្វើឲ្យប្រាកដ ថា ដែនកោះមួយនេះ ត្រូវនៅតែបន្ដ ជាកម្មសិទ្ធិរបស់ប្រជាជនតៃវ៉ាន់ ហើយអត្ថិភាពរបស់តៃវ៉ាន់ មិនមែនជាការបង្កហេតុដល់ប្រទេសណាមួយនោះឡើយ។
លោកស្រី ប្រធានាធិបតីតៃវ៉ាន់ បានសង្កត់ធ្ងន់ ថា «ក្នុងឋានៈជាប្រធានាធិបតី ការអះអាងរបស់ខ្ញុំ គឺត្រូវតែធ្វើឲ្យកិច្ចខិតខំប្រឹងប្រែងគ្រប់បែបយ៉ាង ដើម្បីអនុញ្ញាតឲ្យតៃវ៉ាន់ នៅតែជាកម្មសិទ្ធិរបស់ប្រជាជនតៃវ៉ាន់»។
ការបោះឆ្នោត នៅក្នុងស្រុកនៅថ្ងៃទី២៦ ខែវិច្ឆិកា នៅតៃវ៉ាន់ កើតឡើង រយៈពេល១ខែ ក្រោយពេលលោក ស៊ី ជិនពីង (Xi Jinping) ប្រធានាធិបតីចិន បង្កើនការដាក់សម្ពាធខាងយោធាកាន់តែខ្លាំងឡើង ទៅលើដែនកោះគ្រប់គ្រងដោយខ្លួនឯង តាមបែបប្រជាធិបតេយ្យ ដើម្បីជំរុញឲ្យដែនកោះមួយទទួលស្គាល់ អំពីអធិបតេយ្យភាពរបស់ចិន ដែលបានធានានូវអាណត្ដិទី៣របស់ប្រធានាធិបតី មិនធ្លាប់មានពីមុនមក។
ការបោះឆ្នោតជ្រើសរើសអភិបាលក្រុង និង សមាជិកក្រុមប្រឹក្សា គឺបញ្ហាធម្មតា នៅក្នុងស្រុកហើយលោកស្រី ប្រធានាធិបតី បានប្រាប់ដល់អ្នកគាំទ្ររាប់ពាន់នាក់ ដែលអបអរសាទរ នៅក្នុងការជួបជុំគ្នាមួយ នៅកណ្តាលទីក្រុងតៃប៉ិ ថា មានការប្រឈមមុខច្រើន ជាលើកដំបូង ដែលលោកស្រី ត្រូវតែធ្វើឲ្យប្រាកដប្រជា ក្រោយពេលចិន បានបង្កើនសម្ពាធយោធា។
លោកស្រី សៃ អ៊ីងវ៉ិន (Tsai Ing-wen) ប្រធានាធិបតីតៃវ៉ាន់ បានសង្កត់ធ្ងន់ ថា លោកស្រី មិនបានចុះញ៉ម ឬទោរទន់ទៅរកគោលនយោបាយ«ប្រទេសមួយ ប្រព័ន្ធច្បាប់២» របស់លោក ស៊ី ជិនពីង (Xi Jinping) ប្រធានាធិបតីចិន ដែលស្នើសុំ សម្រាប់ស្វយភាព ក្រោមអធិបតេយ្យភាពរបស់ចិន នោះឡើយ។ នៅក្រោមភាពជាអ្នកដឹកនាំរបស់លោកស្រី មានប្រទេសជាច្រើន គោរពដល់ប្រជាធិបតេយ្យ និង សន្ដិសុខរបស់តៃវ៉ាន់ ដោយសារជាគោលដៅ ឆ្ពោះទៅរកសន្ដិភាព។
លោកស្រី ប្រធានាធិបតីតៃវ៉ាន់ បានថ្លែងទៅកាន់ពិធីប្រមូលផ្ដុំរបស់គណបក្សវឌ្ឍនភាពប្រជាធិបតេយ្យ (DPP) ដែលកំពុងតែគ្រប់គ្រងអំណាចរបស់លោកស្រី ថា «ខ្ញុំចង់ប្រាប់ដល់អស់លោក និង លោកស្រី ទាំងអស់គ្នា ថា អត្ថិភាព និង ការទទូចចង់បានរបស់តៃវ៉ាន់ និង ប្រជាជនតៃវ៉ាន់ ផ្ដោតទៅលើសេរីភាព និង លទ្ធិប្រជាធិបតេយ្យ គឺមិនមែនជាការបង្កហេតុណាមួយ ទៅលើប្រទេសដទៃនោះឡើយ»។
ចិន បានបង្កើនសម្ពាធយោធា កាន់តែខ្លាំងឡើង មកលើតៃវ៉ាន់ ក្រោយពេលលោកស្រី ណានស៊ី ផេឡូស៊ី (Nancy Pelosi) ប្រធានសភាដ៏មានឥទ្ធិពលរបស់សហរដ្ឋអាមេរិក បានទៅបំពេញទស្សនកិច្ច នៅទីក្រុងតៃប៉ិ ចន្លោះពីថ្ងៃទី២-៣ ខែសីហា ឆ្នាំ២០២២។ ជាការប្រឆាំងតបនឹងដំណើរទស្សនកិច្ចនេះ ក្រុងប៉េកាំង បានបញ្ជូនកងទ័ព នាវាចម្បាំង និង យន្ដហោះយោធា ទៅធ្វើសមយុទ្ធយោធា បាញ់គ្រាប់ពិត ឡោមព័ទ្ធដែនកោះគ្រប់គ្រងដោយខ្លួនឯងតាមបែបលទ្ធិប្រជាធិបតេយ្យ រហូតបង្កើនឲ្យមានភាពតានឹង នៅតាមច្រកសមុទ្រតៃវ៉ាន់។
បើតាមមន្ដ្រីសេតវិមាន បានឲ្យដឹង ថា លោក ចូ បៃដិន ប្រធានាធិបតីសហរដ្ឋអាមេរិក នឹងជួបទល់មុខគ្នាជាលើកដំបូង ជាមួយនឹងសមភាគីចិន លោក ស៊ី ជិនពីង នៅសប្ដាហ៍នេះ នៅមុនកិច្ចប្រជុំកំពូល G-20 ។ មេដឹកនាំប្រទេសមហាអំណាចទាំង២នេះ នឹងលើកយកបញ្ហាតៃវ៉ាន់ មកធ្វើជារបៀបវារៈកំពូល នៅក្នុងជំនួបរបស់ពួកគាត់។ ប៉ុន្ដែកាលពីពេលកន្លងមក ប្រធានាធិបតីសហរដ្ឋអាមេរិក ធ្លាប់ព្រមានត្រង់ៗ ខណៈគាត់បានធ្វើដំណើរ មកបំពេញទស្សនកិច្ច នៅលើទឹកដីប្រទេសជាសម្ពន្ធមិត្ត នៅអាស៊ីបូព៌ា ថា សហរដ្ឋអាមេរិក នឹងប្រើប្រាស់កងទ័ពការពារតៃវ៉ាន់ ប្រសិនក្រុងប៉េកាំង សម្រេចចិត្តលើកទ័ពឈ្លានពាន ទៅលើតៃវ៉ាន់។
ទោះជាយ៉ាងណា នៅក្នុងជំនួបតាមការគ្រោងទុក នៅក្នុងប្រទេសឥណ្ឌូណេស៊ី នោះ គេនៅមិនទាន់ដឹង អំពីលទ្ធភាព នៃជំនួប រវាងមេដឹកនាំ នៃប្រទេសមហាអំណាចទាំង២នេះនៅឡើយ៕