រដ្ឋធានីអង់ការ៉ា៖ មានការបំផ្ទុះគ្រាប់បែកមួយគ្រាប់ នៅតាមផ្លូវដ៏មមាញឹក នៅកណ្ដាលទីក្រុងអ៊ីស្ដាន់ប៊ូល (Istanbul) កាលពីថ្ងៃអាទិត្យ ដោយបានសម្លាប់មនុស្ស យ៉ាងតិច ៦នាក់ និង រងរបួសរាប់សិបនាក់ ខណៈមនុស្សកំពុងតែដល់កម្សាន្ដ និង ដើររកទិញអីវ៉ាន់។
បណ្ដាញទូរទស្សន៍ France 24 បានផ្សាយ កាលពីថ្ងៃអាទិត្យ ទី១៣ ខែវិច្ឆិកា ថា ការបំផ្ទុះគ្រាប់បែក នៅកណ្ដាលទីក្រុងអ៊ីស្តង់ប៊ុល បានសម្លាប់មនុស្សយ៉ាងហោចណាស់៦នាក់ និង របួស៨១នាក់ កាលពីថ្ងៃអាទិត្យ។ រថយន្តសង្គ្រោះ បានបើកទៅកាន់កន្លែងកើតហេតុ នៅលើវិថីអ៊ីស្ដីក្លាល់ (Istiklal) ដើម្បីដឹកបញ្ជូនអ្នករងរបួសទៅសង្គ្រោះ ខណៈប៉ូលិសត្រូវបានបញ្ជូនទៅកាន់កន្លែងកើតហេតុ ស្ថិតក្នុងសង្កាត់បេយ៉ូហ្គោ (Beyoglu) ទីក្រុងអ៊ីស្តាន់ប៊ូល ប្រទេសតួកគី ជាទីមានមនុស្សកកកុញតាមធម្មតា នៅចុងសប្តាហ៍ជាមួយនឹងអ្នកដើរទិញអ៊ីវ៉ាន់ ភ្ញៀវទេសចរ និង អ្នកដើរកម្សាន្ដជាលក្ខណៈក្រុមគ្រួសារ។
លោក រេសេប តាយយីប អេដូហ្គេន (Recep Tayyip Erdogan) ប្រធានាធិបតីតួកគីបានថ្កោលទោសយ៉ាងខ្លាំង ដល់សកម្មភាពវាយប្រហារនេះ និង ចាត់ទុកជា ទង្វើភេរវកម្ម។
លោក រេសេប តាយយីប អេដូហ្គេន (Recep Tayyip Erdogan) ប្រធានាធិបតីតួកគី បានថ្លែង កាលពីថ្ងៃអាទិត្យ មុនពេលចេញដំណើរទៅកាន់កិច្ចប្រជុំ G-20 ថា ការបំផ្ទុះនេះ ជា«ការវាយប្រហារក្បត់ជាតិ» ហើយបានសន្យា ថា ជនល្មើស នឹងត្រូវបានផ្តន្ទាទោស។
លោកប្រធានាធិបតី បានបញ្ជាក់ នៅក្នុងសន្និសីទសារព័ត៌មានមួយ ថា «ប្រជាជនរបស់យើងអាចធានាបាន ថា ពិរុទ្ធជន នៅពីក្រោយការវាយប្រហារនេះ នឹងត្រូវតែទទួលទោស ដូចអ្វីដែលពួកគេសមនឹងទទួលបាន»៕
