រដ្ឋធានីហ្សាការតា៖ ក្រោយពេលគ្រាប់មីស៊ីលរបស់រុស្ស៊ី បានធ្លាក់ទៅលើទឹកដីរបស់ប៉ូឡូញ ដោយបានសម្លាប់មនុស្ស ចំនួន២នាក់ ធ្វើឲ្យពិភពលោក មានការព្រួយបារម្ភ កាន់តែខ្លាំងឡើង អំពីជម្លោះកាន់តែរីករាលដាលធំឡើង រវាងក្រុងមូស្គូ និង អង្គការណាតូ ខណៈប្រធានាធិបតីសហរដ្ឋអាមេរិក បានអំពាវនាវឲ្យកោះប្រជុំជាបន្ទាន់។
សារព័ត៌មាន ABC បានចេញផ្សាយ កាលពីព្រឹក ថ្ងៃពុធ ទី១៦ ខែវិច្ឆិកា ថា លោក ចូ បៃដិន (Joe Biden) ប្រធានាធិបតីសហរដ្ឋអាមេរិក ខណៈកំពុងតែចូលរួមកិច្ចប្រជុំកំពូល G20 នៅកោះបាលី ប្រទេសឥណ្ឌូណេស៊ី កាលពីព្រឹក ថ្ងៃពុធ បានអំពាវនាវដល់មេដឹកនាំ G7 និង អង្គការណាតូ ឲ្យកោះប្រជុំបន្ទាន់ ពិភាក្សាគ្នា អំពីឧបទ្ទវហេតុនេះ។
លោកប្រធានាធិបតី បានហៅទូរស័ព្ទ ទៅកាន់សមភាគីប៉ូឡូញ លោក អាន់ឌីហ្សេ ឌូដា (Andrzej Duda) ដើម្បីចូលរួមរំលែកទុក្ខ អំពីការបាត់បង់អាយុជីវិត នៅក្នុងការវាយប្រហារនេះ។ ជាមួយគ្នានេះ លោក ចូ បៃដិន បានប្ដេជ្ញា ពីការគាំទ្ររបស់សហរដ្ឋអាមេរិក យ៉ាងពេញទំហឹង សម្រាប់ប្រទេសប៉ូឡូញ និង ផ្ដល់ជំនួយលើការស៊ើបអង្កេត ពាក់ព័ន្ធនឹងមីស៊ីលនេះ។ ក្រៅពីនេះ ក្រុងវ៉ាស៊ីនតោន ក៏បានបញ្ជាក់ឡើងវិញ អំពីការប្តេជ្ញាចិត្តរបស់សហរដ្ឋអាមេរិក សម្រាប់អង្គការណាតូ ផងដែរ។
ប៉ូឡូញ បានអះអាង ថា មីស៊ីលផលិត នៅក្នុងប្រទេសរុស្ស៊ី បានវាយប្រហារមកលើភាគខាងកើត ភូមិព្រហ្សេវ៉ូដូវ (Przewodow) ជិតព្រំដែនរបស់អ៊ុយក្រែន ដោយបានសម្លាប់មនុស្សចំនួន២នាក់។
ទោះជាយ៉ាងណា ក្រសួងការពារជាតិរុស្ស៊ី បានច្រានចោលនូវសេចក្ដីរាយការណ៍នោះ ហើយថែមទាំងបានចាត់ទុកសេចក្ដីរាយការណ៍នោះ ជា«ការបង្កហេតុ ដោយចេតនា សម្ដៅធ្វើឱ្យមានជម្លោះកាន់តែធំឡើង»។
សហរដ្ឋអាមេរិក និង មហាអំណាចរបស់ពិភពលោកដទៃទៀត បានបញ្ជាក់ ថា ពួកគេកំពុងតែស៊ើបអង្កេត អំពីអ្វីដែលបានកើតឡើង នៅលើទឹកដីប៉ូឡូញ ខណៈការិយាល័យសន្ដិសុខជាតិប៉ូឡូញ ក៏កំពុងតែកោះប្រជុំបន្ទាន់ ហើយនឹងចេញសេចក្ដីថ្លែងការណ៍របស់ខ្លួន។ ចំណែករដ្ឋធានីកៀវ ប្រទេសអ៊ុយក្រែន ក៏ស្ថិតក្នុងចំណោមទីក្រុងជាច្រើន បានរងការវាយប្រហារ ពីមីស៊ីលរបស់រុស្ស៊ី ផងដែរ។
លោក ពីយ៉ូត មូលល័រ (Piotr Muller) អ្នកនាំពាក្យ រដ្ឋាភិបាលប៉ូឡូញ បានបញ្ជាក់ ថា «ការវាយប្រហារនេះ បានសម្លាប់ប្រជាជនប៉ូឡូញ ចំនួន២នាក់។ ទន្ទឹមគ្នានេះ ក្រុងវ៉ាសាវី បានដាក់កងទ័ពឲ្យប្រុងជើងការខ្ពស់ ហើយនឹងពិនិត្យមើល ប្រសិនបើយើងត្រូវអនុវត្ដតាមមាត្រាទី៤របស់អង្គការណាតូ»។
នៅក្នុងមាត្រាទី៤របស់អង្គការណាតូ បានចែងថា «គ្រប់ភាគី នឹងពិភាក្សាជាមួយគ្នា នៅពេលណាក៏ដោយ តាមគំនិតរបស់ភាគីណាមួយ លើបូរណភាពទឹកដី ឯករាជភាពខាងនយោបាយ ឬ សន្តិសុខ នៃភាគីណាមួយ ត្រូវរងការគំរាមកំហែង»។
លោក អែមម៉ាញែល ម៉ាក្រុង (Emmanuel Macron) ប្រធានាធិបតីបារាំង បានបញ្ជាក់ថា លោកបានទាក់ទងទៅកាន់ប៉ូឡូញ ហើយរំពឹងលើការចរចាគ្នា នៅក្នុងកិច្ចប្រជុំ G20 នៅថ្ងៃស្អែក ជុំវិញឧបទ្ទវហេតុនេះ។
លោក ឆាលស៍ មីឆែល (Charles Michel) ប្រធានកិច្ចប្រជុំកំពូលសហភាពអឺរ៉ុប និង ជាប្រធានក្រុមប្រឹក្សាអឺរ៉ុប បានសរសេរ នៅលើបណ្ដាញសង្គមធ្វីធើរ ថា «ពិតជាមានការរន្ធត់ចិត្ដខ្លាំងណាស់ ចំពោះព័ត៌មាន ពីមីស៊ីលមួយគ្រាប់ និង គ្រាប់កាំភ្លើងផ្លោងផ្សេងៗទៀត បានសម្លាប់មនុស្ស នៅលើទឹកដីរបស់ប៉ូឡូញ។ យើងឈរនៅជាមួយនឹងប៉ូឡូញ ហើយខ្ញុំកំពុងតែទាក់ទងទៅកាន់អាជ្ញាធរប៉ូឡូញ និង សមាជិកក្រុមប្រឹក្សាអឺរ៉ុប ហើយសម្ពន្ធមិត្តដទៃទៀត»៕
លោកស្រី អេឡេន លូរៀ (Elaine Luria) សមាជិកព្រឹទ្ធសភាសហរដ្ឋអាមេរិក បានជំរុញឲ្យរក្សាភាពស្ងៀមស្ងាត់ ចំពេលមានការអំពាវនាវឱ្យលើកយកសន្ធិសញ្ញាការពារជាតិរួមរបស់អង្គការណាតូ អនុវត្ដតាមមាត្រា៥។ បើតាមមាត្រានេះ ប្រសិនបើមានការវាយប្រហារ ប្រឆាំងនឹងរដ្ឋជាសមាជិកណាមួយនោះ ប្រទេសទាំង៣០ជាសមាជិករបស់អង្គការនេះ នឹងចូលរួមធ្វើសង្គ្រាមព្រមគ្នាតែម្ដង។
លោកស្រី បានសរសេរ នៅលើបណ្ដាញសង្គមធ្វីធឺរ ថា «អ្នកដែលអំពាវនាវឲ្យអង្គការណាតូ លើកយកមាត្រាទី៥មកអនុវត្ដ ក្រោយការវាយប្រហារ មកលើទឹកដីរបស់ប៉ូឡូញ ដោយមិនបានយល់ពីអង្គការសម្ពន្ធយោធារបស់ពិភពលោកមួយនេះ ហើយមិនគួរគិតខ្លាំងពេកនោះទេ ព្រោះរុស្ស៊ី កំពុងតែចាញ់សង្គ្រាម។ លុះត្រាតែនេះ ជាការវាយប្រហារដោយចេតនា ទើបត្រូវគិតខ្លាំង ដូច្នេះសូមរក្សាភាពស្ងប់ស្ងាត់សិន៕