រដ្ឋធានីវ៉ាស៊ីនតោន៖ ជាមួយនឹងការដើរចេញ ពីសេតវិមាន ទាំងការខឹងសម្បា មិនព្រមជួបទទួលស្វាគមន៍អ្នកឈ្នះ ចូលកាន់កាប់សេតវិមាននោះ ឥឡូវ លោក ដូណាល់ ត្រាំ អតីតប្រធានាធិបតីសហរដ្ឋអាមេរិក នឹងចូលខ្លួន មកប្រកួតប្រជែងតំណែងកំពូល នៅក្នុងប្រទេសមហាអំណាចលេខ១ ទាំងសេដ្ឋកិច្ច និង យោធារបស់ពិភពលោក បន្ដទៀត។
សារព័ត៌មាន Al Jazeera បានចេញផ្សាយ កាលពីព្រឹក ថ្ងៃពុធ ទី១៦ ខែវិច្ឆិកា ថា លោក ដូណាល់ ត្រាំ (Donald Trump) បានប្រកាស ថា លោកនឹងឈរឈ្មោះ ជាបេក្ខជន ប្រជែងដណ្ដើមយកតំណែងប្រធានាធិបតីសហរដ្ឋអាមេរិក ម្ដងទៀត នៅក្នុងឆ្នាំ២០២៤ ថ្វីបើគាត់កំពុងតែប្រឈមមុខនឹងការស៊ើបអង្កេត ពីបទល្មើសព្រហ្មទណ្ឌ ជាច្រើនករណី និង ការបំពេញការងារមិនល្អរបស់បេក្ខជន ដែលលោកបានគាំទ្រ នៅក្នុងការបោះឆ្នោតពាក់កណ្តាលអាណត្តិ កាលពីសប្តាហ៍មុនយ៉ាងណាក្ដី។
អតីតប្រធានាធិបតីសហរដ្ឋអាមរិក រូបនេះ បានចាប់ផ្ដើមបើកយុទ្ធនាការស្វែងរកសំឡេងឆ្នោតទី៣របស់គាត់ សម្រាប់តំណែងប្រធានាធិបតី កាលពីល្ងាច ថ្ងៃអង្គារ នៅឯវិមាន Mar-a-Lago របស់គាត់ ស្ថិតក្នុងរដ្ឋ Florida ត្រឹមតែរយៈពេល១សប្ដាហ៍ ក្រោយគណបក្សសាធារណរដ្ឋរបស់គាត់ បានបរាជ័យ នៅក្នុងការឈ្នះអាសនៈច្រើន នៅក្នុងសភា មិនដូចការរំពឹងទុក។ លោក ត្រាំ នឹងក្លាយជាអតីតប្រធានាធិបតីអាមេរិកដំបូងគេ ធ្លាប់ចាញ់ឆ្នោតម្ដងហើយ សុខចិត្តចូលខ្លួន មកប្រកួតប្រជែងសាជាថ្មី នៅក្នុងរយៈពេលជាង១សតវត្ស នៃប្រវត្ដិសាស្ដ្រសហរដ្ឋអាមេរិក។
លោក ដូណាល់ ត្រាំ ធ្លាប់បង្ហាញ អំពីចេតនាឈរឈ្មោះ ជាបេក្ខជនប្រធានាធិបតីសហរដ្ឋអាមេរិក តំណាងឱ្យបក្សសាធារណរដ្ឋ ជាច្រើនលើកមកហើយ។ ប៉ុន្តែការប្រកាស នាពេលនេះ បានធ្វើឡើង ចំពេលគណបក្សសាធារណរដ្ឋ ទទួលបានលទ្ធផលមិនគាប់ប្រសើរ ដូចការរំពឹង នៅក្នុងការបោះឆ្នោតពាក់កណ្ដាលអាណត្តិ កាលពីប៉ុន្មានថ្ងៃកន្លងទៅនេះ៕
