រដ្ឋធានីកៀវ៖ មួយរយៈពេលចុងក្រោយនេះ កងទ័ពការពារទឹកដីរបស់អ៊ុយក្រែន ហាក់មានប្រៀប ហើយវាយប្រហារយ៉ាងសន្ធាប់ រំដោះទឹកដីរបស់ពួកគេត្រឡប់មកវិញ ទើបក្រុងកៀវ បានបង្កើតខ្សែទូរស័ព្ទ Hotline សម្រាប់ទាហានរុស្ស៊ី ចុះចាញ់ និង ធានាដល់អាយុជីវិតរបស់ពួកគេ។
សារព័ត៌មាន BBC បានចេញផ្សាយ កាលពីព្រឹក ថ្ងៃពុធ ទី៣០ ខែវិច្ឆិកា ថា អ៊ុយក្រែន បានអះអាង ថា គម្រោង ដែលក្រុងកៀវ បានបង្កើតឡើង សម្រាប់ទាហានរុស្ស៊ី ចុះចាញ់នោះ កំពុងតែត្រូវបានទាក់ទងសាកសួរ រហូតដល់១០០ដង នៅក្នុង១ថ្ងៃ។ ទាហានរុស្ស៊ី អាចរៀបចំបានតាមវិធីសាស្ដ្រដ៏ល្អប្រសើរ ចំពោះការចុះចាញ់ មកខាងកងទ័ពការពារទឹកដីអ៊ុយក្រែន តាមរយៈការហៅទូរស័ព្ទ Hotline ឬ ចូលមើលព័ត៌មានលម្អិត នៅក្នុង Apps នោះ ។
ក្រុមមន្ដ្រីក្រុងកៀវ បានអះអាង ថា ពួកគេមានការទាក់ទងជាង ៣ ៥០០នាក់ ពីទាហានរុស្ស៊ី ក៏ដូចជា ក្រុមគ្រួសាររបស់ពួកគេ។ ចំនួននេះ បានបង្ហាញ អំពីការកើនឡើង ចាប់តាំងពីប្រធានាធិបតី លោក វ្ល៉ាឌីមៀ ពូទីន បានប្រកាស ពីការកេណ្ឌទ័ព ចំនួន៣០០ ០០០នាក់មក និង ចាប់តាំងពីការរំដោះបានទីក្រុងខឺរសុន យកមកគ្រប់គ្រងវិញ។
អ្នកស្រី ស្វីតឡាណា ជាឈ្មោះក្រៅផ្លូវការ បម្រើការងារជាអ្នកលើកទូរស័ព្ទ នៃទីស្នាក់ការកណ្ដាលរបស់អ៊ុយក្រែន សម្រាប់ព្យាបាលឈ្លើយសឹក តែងតែនិយាយទៅកាន់ទាហានរុស្ស៊ី ជារៀងរាល់ថ្ងៃ តាមទូរស័ព្ទ ក៏ដូចជា Telegram និង WhatsApp ។
អ្នកស្រី បានពន្យល់ ថា ជារៀងរាល់ល្ងាច គឺរវល់ខ្លាំងណាស់ ខណៈទាហានរុស្ស៊ី មានពេលទំនេរច្រើន ហើយអាចលួចនិយាយតាមទូរស័ព្ទ និង ហៅទូរស័ព្ទបាន។ បញ្ហានេះ ក៏មានការចង់ដឹង ចង់ឃើញដែរ ពីព្រោះទាហានរុស្ស៊ី ជាច្រើនហៅមក មិនព្រមចុះចាញ់។ ប៉ុន្តែពួកគេឈ្វេងយល់ អំពីរបៀប ដែលពួកគេអាចធ្វើបាន ប្រសិនបើមានការចាំបាច់។
ទោះជាយ៉ាងណា អ្នកស្រី បានលើកឡើង ថា ទាហានរុស្ស៊ី មួយចំនួន ក៏បានទាក់ទងមក ដើម្បីបង្ករឿងដែរ។ ប៉ុន្តែគាត់និយាយថា បើទោះបីជាគាត់មិនគិត ថា ពួកគេទាំងអស់ជឿ អំពីការអះអាង ដោយគ្មានមូលដ្ឋានរបស់វិមានក្រឹមឡាំង ដោយបានចោទប្រកាន់ មកលើអ៊ុយក្រែន ជារបបគ្រប់គ្រង ដោយពួកណាស៊ី យ៉ាងណាក៏ដោយ។
អ្នកស្រី បានបញ្ជាក់ ថា «យើងមិនអាចសម្រេចបានទូទាំងប្រទេសនោះដែរ។ ប៉ុន្ដែទាហានរុស្ស៊ី ភាគច្រើន ព្រួយបារម្ភ អំពីអាយុជីវិតរបស់ពួកគេ»។
បើតាមវិទ្យាស្ថានសិក្សាពីសង្គ្រាម បានឲ្យដឹង ថា វិមានក្រឹមឡាំង ក៏កំពុងតែអនុវត្តការដោះដូរឈ្លើយសឹកបន្ថែមទៀត ខណៈក្រុងមូស្គូ ព្យាយាមបន្ធូរបន្ថយការរិះគន់ ពីខាងក្នុងប្រទេសរុស្ស៊ី។ បើតាមការគិត អាចនឹងមានឈ្លើយសឹក រាប់ពាន់នាក់ ស្ថិតក្រោមការគ្រប់គ្រង រវាងភាគីរុស្ស៊ី និង អ៊ុយក្រែ ប៉ុន្ដែចំនួននេះ នៅមិនទាន់ច្បាស់ នៅឡើយ។
លោក វីតាលី ម៉ាតវីយ៉ែនកូ (Vitalii Matviyenko) ប្រធានគ្រប់គ្រងគម្រោង សម្រាប់ទាហានរុស្ស៊ី ចុះចាញ់ បានអះអាង ថា «យើងចង់ផ្តោត ជាពិសេស ទៅលើការប្រមូលទាហានរុស្ស៊ី។ គម្រោងនេះ នឹងធានាដល់អាយុជីវិតរបស់ពួកគេ ប្រសិនបើពួកគេយល់ព្រមចុះចាញ់ ដោយសការស្ម័គ្រចិត្ត»៕