រដ្ឋធានីអង់ការ៉ា៖ គ្រោះរញ្ជួយដី នៅក្នុងប្រទេសតួកគី បានបង្កនូវវិនាសកម្មយ៉ាងធ្ងន់ធ្ងរ ដោយការដួលរលំអគារម៉ឺនខ្នង ធ្វើឲ្យប្រជាជន ជាង១០លាននាក់បាត់បង់ទីជម្រក និង មនុសុ្ស រាប់ម៉ឺននាក់ បាត់បង់អាយុជីវិត ហើយឥឡូវនេះ អាជ្ញាធររបស់ប្រទេសជាសមាជិកអង្គការណាតូមួយនេះ បានចាប់ខ្លួនអ្នកពាក់ព័ន្ធ ជាង១១០នាក់ នាំទៅឃុំឃាំង។
សារព័ត៌មាន Al Jazeera បានចេញផ្សាយ កាលពីព្រឹក ថ្ងៃចន្ទ ទី១៣ ខែកុម្ភៈ ថា តួកគី បានសម្រេចចិត្ត ស៊ើបអង្កេតឱ្យបានហ្មត់ចត់ ចំពោះអ្នកណាដែលសង្ស័យ អំពីការទទួលខុសត្រូវ ចំពោះការដួលរលំអគារ នៅក្នុងការរញ្ជួយដីដ៏មហន្តរាយ នៅក្នុងប្រទេសនេះ។ ជាមួយគ្នានេះ អាជ្ញាធរ ក៏បានបញ្ជាឱ្យចាប់ខ្លួនជនសង្ស័យ ចំនួន១១៣នាក់រួចមកហើយដែរ។
លោក ហ្វ៊ូត អូកតាយ (Fuat Oktay) អនុប្រធានាធិបតីតួកគី បានបញ្ជាក់ ថា ជនសង្ស័យ ចំនួន១៣១នាក់ ត្រូវបាកំណត់អត្ដសញ្ញាណ ជាអ្នកទទួលខុសត្រូវ ចំពោះការដួលរលំអគារ រាប់ពាន់ខ្នង នៅក្នុងខេត្តចំនួន១០ រងផលប៉ះពាល់ ដោយគ្រោះរញ្ជួយដី កាលពីថ្ងៃចន្ទ សប្ដាហ៍មុន។
លោកអនុប្រធានាធិបតីតួកគី បានថ្លែងទៅក្រុមអ្នកសារព័ត៌មាន នៅក្នុងសន្និសីទមួយ ថា «បទបញ្ជាឃុំខ្លួន បានចេញទៅលើអ្នកទទួលខុសត្រូវ ចំនួន១១៣នាក់។ ប៉ុន្ដែយើងនឹងតាមដានរឿងនេះ ឱ្យបានហ្មត់ចត់ រហូតទាល់តែដំណើរការរបស់តុលាការ ចាំបាច់ ត្រូវបានបញ្ចប់ ជាពិសេស សម្រាប់អគារដែលរងការខូចខាតខ្លាំង»។
ជាមួយគ្នានេះ រដ្ឋមន្ត្រីក្រសួងយុត្តិធម៌តួកគី បានសន្យា ថា នឹងដាក់ទណ្ឌកម្ម ប្រឆាំងនឹងអ្នកទទួលខុសត្រូវ ហើយព្រះរាជអាជ្ញា បានចាប់ផ្តើម ប្រមូលសំណាកអគារ សម្រាប់ភស្តុតាង អំពីសម្ភារប្រើប្រាស់ នៅក្នុងការសាងសង់អគារទាំងនោះ។
ស្របពេលកើតមានគ្រោះរញ្ជួយដីដ៏មានកម្លាំងខ្លាំងនោះ ក្រុមអ្នកជំនាញ ជនរងគ្រោះ និង ប្រជាជន នៅទូទាំង ប្រទេសតួកគី កំពុងតែស្ដីបន្ទោស ដល់សំណង់អគារ សាងសង់មិនត្រូវតាមស្ដង់ដាសំណង់ ទើបនាំឲ្យមានការខូចខាតយ៉ាងធ្ងន់ធ្ងរបែបនេះ។
លោក មូរ៉ាត គូរូម (Murat Kurum) រដ្ឋមន្ដ្រីក្រសួងបរិស្ថាន បានបញ្ជាក់ ដោយផ្អែកលើការវាយតម្លៃសំណង់អគារ ជាង ១៧០ ០០០ខ្នង គឺមានសំណង់ ចំនួន ២៤ ៩២១ខ្នង នៅពាសពេញតំបន់នោះ បានដួលរលំ ឬ រងនូវការខូចខាតយ៉ាងដំណំ។
ក្រុមអ្នកជួយសង្គ្រោះ នៅតែបន្ដស្វែងរកអ្នករស់រានមានជីវិត នៅក្នុងគំនរបាក់បែក អស់រយៈពេល៦ថ្ងៃកន្លងមកហើយ ក្រោយពេលកើតមានគ្រោះរញ្ជួយដី នៅតាមផ្នែកជាច្រើន នៃទឹកដីតួកគី និង ស៊ីរី។ រហូតមកដល់ពេលនេះ អ្នកបាត់បង់ជីវិតសរុប កើនឡើង ជាង ៣៣ ០០០នាក់ ហើយចំនួនអ្នកស្លាប់អាចនឹងកើតឡើងបន្ថែមទៀត។
គណបក្សប្រឆាំងជាច្រើន បានចោទប្រកាន់ ដល់រដ្ឋាភិបាលរបស់ប្រធានាធិបតីតួកគី លោក រេសេប តាយយីប អេដូហ្គេន (Recep Tayyip Erdogan) ថា មិនបានអនុវត្ត តាមបទដ្ឋានសំណង់ និងខកខាននូវការយកពន្ធពិសេស ដែលបានបង់ ក្រោយការរញ្ជួយដីដ៏ធំចុងក្រោយ កាលពីអំឡុងឆ្នាំ១៩៩៩ ដើម្បីធ្វើឱ្យអគារ កាន់តែធន់នឹងគ្រោះរញ្ជួយដី។
ទីភ្នាក់ងារព័ត៌មានរដ្ឋតួកគី Anadolu (អាណដូលូ) បានរាយការណ៍ ថា រដ្ឋអាជ្ញារដ្ឋ នៅខេត្ត អាដាណា (Adana) បានបញ្ជាឱ្យចាប់ខ្លួនមនុស្ស ចំនួន៦២នាក់ ពាក់នឹងការស៊ើបអង្កេត ទៅលើអគារដួលរលំ ខណៈរដ្ឋអាជ្ញា បានស្វែងរកចាប់ខ្លួនមនុស្សចំនួន៣៣នាក់ផ្សេងទៀត នៅក្នុងទីក្រុងឌីយ៉ាបាឃើរ (Diyarbakir) សម្រាប់ហេតុផលដូចគ្នានេះដែរ។
លោកប្រធានាធិបតីតួកគី កាលពីមុននេះ បានទទួលស្គាល់ថា ការឆ្លើយតបដំបូង ត្រូវបានរំខាន ដោយការខូចខាតសំណងអគារច្រើនពេក។ ចំណែកតំបន់រងផលប៉ះពាល់ខ្លាំងបំផុត មានទំហំ៥០០ គីឡូម៉ែត្រ ហើយវាជាទីជម្រករបស់ប្រជាជន ចំនួន១៣,៥លាននាក់៕
