ទីក្រុងប្រ៊ុចសែលស៍៖ ជាមួយនឹងតម្រូវការកម្លាំងទ័ពដ៏ខ្លាំងក្លា សម្រាប់ទប់ទល់នឹងសង្គ្រាមរបស់ប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) នោះ នៅទីបំផុត សហភាពអឺរ៉ុប បានសម្រេចចិត្តចំណាយលុយរាប់លានដុល្លារ ជួយនាំកងទ័ពរបស់អ៊ុយក្រែន ទៅបណ្ដុះបណ្ដាលជំនាញទាហានបន្ថែមទៀត។
ទីភ្នាក់ងារសារព័ត៌មាន Ukrinform បានចេញផ្សាយ កាលពីថ្ងៃអង្គារ ទី១៥ ខែវិច្ឆិកា ថា សហភាពអឺរ៉ុប បានគាំទ្រយ៉ាងពេញទំហំដល់អ៊ុយក្រែន សម្រាប់បេសកកម្មផ្ដល់ជំនួយយោធា ជួយដល់កងទ័ពការពារទឹកដីរបស់អ៊ុយក្រែន ចាប់តាំងពីការផ្ទុះសង្គ្រាមឈ្លានពានរបស់រុស្ស៊ី នៅថ្ងៃទី២៤ ខែកុម្ភៈ រហូតមក។ ជាមួយគ្នានេះ កងទ័ពអ៊ុយក្រែន ប្រហែល ១៥ ០០០នាក់ នឹងត្រូវនាំទៅបណ្ដុះបណ្ដាល នៅតាមប្រទេសផ្សេងៗ នៃបណ្ដារដ្ឋជាសមាជិកអឺរ៉ុប។
លោក ចូសែប ប័ររ៉ែល (Josep Borrell) ប្រធានគោលនយោបាយការបរទេសអឺរ៉ុប បានប្រាប់ដល់ក្រុមអ្នករាយការណ៍ព័ត៌មាន នៅក្នុងទីក្រុងប្រ៊ុចសែលស៍ កាលពីថ្ងៃអង្គារ ថា «បេសកកម្មនេះ ជាការឆ្លើយតបដោយផ្ទាល់ ចំពោះសំណើរបស់អ៊ុយក្រែន ហើយការបណ្ដុះបណ្ដាលទាហានអ៊ុយក្រែន ចំនួន១៥ ០០០នាក់ ក៏ជាផ្នែកមួយ នៃបេសកកម្មរបស់យើង ផងដែរ»។
លោក ជេនស៍ ស្ដូលថែនប៊ឺគ (Jens Stoltenberg) អគ្គលេខាធិការ អង្គការណាតូ បានស្វាគន៍ដល់ការសម្រេចចិត្តរបស់សហភាពអឺរ៉ុប ចំពោះការបង្កើតបេសកកម្មបណ្ដុះបណ្ដាលកងទ័ពអ៊ុយក្រែន។ នេះជាការអនុវត្ដនូវអ្វីដែលប្រទេសជាសមាជិកណាតូ ធ្វើរួចហើយ។
បេសកកម្មនេះ នឹងត្រូវដឹកនាំ ដោយឧត្តមនាវីឯកបារាំង លោក អ៊ែរវេ ប្លេហ្សង់ (Hervé Bléjean) ហើយរដ្ឋមន្ត្រីការពារជាតិសហភាពអឺរ៉ុប ក៏បានយល់ព្រម បែងចែកមូលនិធិ មានទំហំទឹកប្រាក់ ១៦,៥លានដុល្លារ ក្រោមមូលនិធិសន្តិភាពអឺរ៉ុប (EPF) ផងដែរ៕
