រដ្ឋធានីកៀវ៖ មេដឹកនាំអ៊ុយក្រែន បានប្រកាសស្នើសុំប្រព័ន្ធការពារដែនអាកាស ពីបណ្ដាប្រទេសមហាអំណាចបស្ចិមលោក បន្ថែម ក្រោយពេលកម្លាំងទាហានរុស្ស៊ី ចាប់ផ្ដើមបង្កើនការវាយប្រហារ ដោយមីស៊ីល ប្រឆាំងនឹងហេដ្ឋារចនាសម្ព័ន្ធស៊ីវិល និង រោងចក្រថាមពល រហូតធ្វើឲ្យមនុស្ស រាប់លាននាក់ អត់ភ្លើងប្រើប្រាស់។
សារព័ត៌មាន BBC បានចេញផ្សាយ កាលពីព្រឹក ថ្ងៃសុក្រ ទី១៨ ខែវិច្ឆិកា ថា លោក វ៉ូឡូឌីមៀរ ហ្សេឡែនស្គី (Volodymyr Zelensky) ប្រធានាធិបតីអ៊ុយក្រែន បានអះអាង ថា ការវាយប្រហារជាថ្មី ពីកម្លាំងទាហានរុស្ស៊ី មកលើសំណង់អគារស៊ីវិល និង ហេដ្ឋារចនាសម្ព័ន្ធថាមពល នៅក្នុងប្រទេសរបស់គាត់ បានធ្វើឲ្យប្រជាជនអ៊ុយក្រែន ចំនួន១០លាននាក់ អត់មានអគ្គិសនីប្រើប្រាស់។ ក្រៅពីនេះ សកម្មភាពដ៏ព្រៃផ្សៃរបស់រុស្ស៊ី ក៏បានសម្លាប់មនុស្ស យ៉ាងតិច ចំនួន៧នាក់ ហើយចំនួនអ្នកស្លាប់ អាចនឹងបន្ដកើនឡើងបន្ថែមទៀត។
លោកប្រធានាធិបតី បានថ្លែងសុន្ទរកថា ប្រចាំរាត្រីរបស់គាត់ ថា «យើងនឹងធ្វើអ្វីៗគ្រប់យ៉ាង ដើម្បីស្ដារការផ្គត់ផ្គង់អគ្គិសនី ឲ្យវិលមករកភាពប្រក្រតីឡើងវិញ»។
កម្លាំងទាហានរុស្ស៊ី កាលពីថ្ងៃព្រហស្បតិ៍ បានវាយប្រហារយ៉ាងខ្លាំងជាថ្មី ទៅលើស្ថានីយថាមពល និង សំណង់អគារស៊ីវិល ពោលគឺត្រឹមតែរយៈពេលមិនដល់២ថ្ងៃ ក្រោយការទម្លាក់គ្រាប់បែកយ៉ាងខ្លាំងបំផុតមួយ។
មន្ដ្រីអ៊ុយក្រែន បានអះអាង ថា រោងចក្រផលិតឧស្ម័នមួយកន្លែង នៅភាគខាងកើត និង រោងចក្រមីស៊ីសមួយកន្លែងទៀត នៅឌីនីប្រូ (Dnipro) ក៏ស្ថិតក្នុងចំណោមគោលដៅវាយប្រហារផងដែរ។ ដោយឡែក ការកាត់ផ្ដាច់ថាមពលយ៉ាងធ្ងន់ធ្ងរបំផុត ភាគច្រើន កើតមាន នៅក្នុងរដ្ឋធានីកៀវ (Kyiv) តំបន់ភាគខាងលិច ទីក្រុងវីននីតសៀ (Vinnytsia) ទីក្រុងកំពង់ផែអូដេសា (Odesa) នាភាគនិរតី និង ទីក្រុងស៊ូមី (Sumy) នៅភាគខាងឦសាន ប្រទេសអ៊ុយក្រែន។
លោក ហ្សេឡែនស្គី បានចោទប្រកាន់ដល់រុស្ស៊ី អំពីការកំណត់គោលដៅ បំផ្លិចបំផ្លាញលើបណ្ដាញផ្គត់ផ្គង់អគ្គិសនី សម្រាប់ប្រជាជនអ៊ុយក្រែន។ ស្របគ្នានេះ លោកប្រធានាធិបតី ក៏បានថ្លែងជាដដែលៗ ស្នើសុំប្រព័ន្ធការពារដែនអាកាស ពីមហាអំណាចលោកខាងលិច ដើម្បីយកមកការពារប្រទេស ឲ្យបានពេញលេញ បញ្ចៀសការវាយប្រហារបំផ្លិចបំផ្លាញ ពីរុស្ស៊ី បន្ដទៀត ព្រោះគ្រឿងសព្វាវុធទាំងនោះ អាចឈានដល់ការបញ្ចប់សង្គ្រាមរបស់ក្រុងមូស្គូ បាន៕
