រាជធានីបាងកក៖ បុរសមិនស្គាល់អត្ដសញ្ញាណម្នាក់ ស្លៀកពាក់ឯកសណ្ឋានជាមន្ដ្រីប៉ូលិស បើករថយន្ដចូលទៅបំផ្ទុះគ្រាប់បែកដល់បរិវេណរបស់ប៉ូលិសថៃ បណ្ដាលឲ្យមនុស្សម្នាក់ បានបាត់បង់ជីវិត និង ចំនួន៣១នាក់ផ្សេងទៀត រងរបួស កាលពីថ្ងៃអង្គារ ស្ថិតក្នុងស្រុកមួង (Muang) នាភាគខាងត្បូង ប្រទេស។
សារព័ត៌មានថៃ The Nation បានចេញផ្សាយ កាលពីព្រឹក ថ្ងៃពុធ ទី២៣ ខែវិច្ឆិកា ថា អគ្គស្នងការនគរបាលជាតិ បានបញ្ជាក់ ថា មេប៉ូលិសម្នាក់ ត្រូវបានសម្លាប់ នៅក្នុងការវាយប្រហារដោយការបំផ្ទុះគ្រាប់បែកក្នុងរថយន្ត នៅឯកន្លែងប៉ូលិសណារ៉ាធីវ៉ាត់ (Narathiwat) កាលពីថ្ងៃអង្គារ នឹងត្រូវបានផ្តល់ឋានន្ដរស័ក្ដិ ជាឧត្តមសេនីយប៉ូលិស ខណៈគ្រួសាររបស់គាត់ នឹងទទួលបានសំណង សរុប៣,៧៧លានបាត (ប្រាក់ថៃ) ឬស្មើនឹងប្រហែល ១០៤ ២០០ដុល្លារសហរដ្ឋអាមេរិក។
លោកវរសេនីយ៍ ចេហ្វហ្វ្រៃ សាឡៃម៉ាន់គុល (Jeffrey Salaimankul) អធិការស្រុកមួង បានបញ្ជាក់ ថា ការបំផ្ទុះនេះ បានកើតឡើង នៅវេលាម៉ោង១២ និង ៤៥នាទីរសៀល ថ្ងៃអង្គារ ស្ថិតក្នុងឃុំតាមប៊ុន បាងណាក់ (Tambon Bang Nak) ដោយបានបណ្ដាលឲ្យមនុស្សម្នាក់បាត់បង់ជីវិត និង ៣១នាក់ផ្សេងទៀត រងរបួស។
បើតាមការស៊ើបអង្កេតរបស់បញ្ជាការប្រតិបត្ដិការសន្ដិសុខផ្ទៃក្នុង (ISOC) បានឲ្យដឹងថា មុនពេលកើតហេតុ មានបុរសម្នាក់ ស្លៀកពាក់ឯកសណ្ឋានជាមន្ដ្រីនគរបាល បានបើករថយន្ដ២បាំងកន្លះមួយគ្រឿង ចូលមកក្នុងបរិវេណរបស់ប៉ូលិស។ ប៉ុន្ដែគេបានចាកចេញរថយន្ដភ្លាមៗ ក្រោយចតរួច មុននឹងមានហេតុការណ៍បំផ្ទុះនេះ កើតឡើង។
លោកវរសេនីយ៍ទោ នីតទី សុខសាន (Nitti Soksan) ស្នងការរងនគរបាលខេត្តណារ៉ាធីវ៉ាត (Narathiwat) បានបញ្ជាក់ ថា ថា «ឧបទ្ទវហេតុនេះ ជាការបំផ្ទុះរថយន្ត ហើយចំនួនអ្នកស្លាប់ អាចកើនឡើង។ ឥឡូវ យើងកំពុងតែបោសសម្អាតកន្លែងនោះ។
លោក ផនប្រាស៊ីត ចាន់ត្រា (Pornprasit Jantra) ប្រធានមន្ទីរពេទ្យណារ៉ាធីវ៉ាត រ៉ាចាណាហ្ការីនដ្រា (Narathiwat Rajanagarindra) បានអះអាង ថា យ៉ាងហោចណាស់មនុស្ស ២៩នាក់ ត្រូវបានបញ្ជូនមកព្យាបាល នៅក្នុងមន្ទីរពេទ្យរបស់លោក ហើយក្នុងចំណោមអ្នករងរបួសទាំងនោះ មានទាំងមន្ត្រីប៉ូលិស និង ជនស៊ីវិលផងដែរ។
ក្រោយការបំផ្ទុះរថយន្ដភ្លាម នៅមិនទាន់មានអ្នកណាម្នាក់ ចេញមុខមកអះអាងទទួលខុសត្រូវចំពោះការវាយប្រហារនេះនៅឡើយ៕
