រដ្ឋធានីណៃពិដោរ៖ របបយោធាមីយ៉ាន់ម៉ា បានបិទខ្ទប់រដ្ឋរ៉ាឃីន (Rakhine) ស្ថិតនៅភាគខាងលិច ប្រទេសភូមា ធ្វើឲ្យទីក្រុងសីតត្វេ (Sittwe) ដែលជាទីក្រុងធំរបស់រដ្ឋមួយនេះ ខ្វះខាតស្បៀងអាហារ និង ថ្នាំសង្កូវ ក្រោយពេលមានការប្រយុទ្ធគ្នាជាថ្មី រវាងកម្លាំងទាហានរដ្ឋាភិបាល និង ក្រុមចលនាប្រឆាំង។
សារព័ត៌មានរបស់ភូមា The Irrawaddy បានចេញផ្សាយ កាលពីថ្ងៃទី២៤ ខែវិច្ឆិកា ដោយដកស្រង់សម្ដីរបស់អ្នករស់ក្នុងទីក្រុង Sittwe ដែលបានអះអាង ថា របបគ្រប់គ្រងយោធា នៅក្នុងប្រទេសមីយ៉ាន់ម៉ា (ឬភូមា) បានឡោមព័ទ្ធទីក្រុងធំរបស់រដ្ឋរ៉ាឃីន ឲ្យនៅដាច់ពីគេ អស់រយៈពេលជាង២សប្ដាហ៍កន្លងមកហើយ។ ការហ៊ុមព័ទ្ធរបស់កម្លាំងទាហាន នៃរបបសឹក កំពុងតែធ្វើឱ្យអ្នកស្រុក និង ប្រជាជនជាច្រើន បានបាត់បង់ជីវិត នៅទូទាំងរដ្ឋរ៉ាឃីន។
ក្រុមអ្នកស្រុក បានបញ្ជាក់ ថា ទីក្រុងសីតត្វេ ត្រូវបានហ៊ុមព័ទ្ធ ដោយរបបយោធា ក្រោយការវាយប្រហារ កាលពីថ្ងៃទី១០ ខែវិច្ឆិកា ប្រឆាំងនឹងក្បួនយោធារបស់មីយ៉ាន់ម៉ា ឆ្លងកាត់តាមផ្លូវចម្ងាយ១៥គីឡូម៉ែត្រ ចេញពីទីក្រុងសីតត្វេ ទៅកាន់ទីក្រុងប៉ុនណាគ្យុន( Ponnagyun)។
អ្នករស់នៅក្នុងក្រុងសីតត្វេ បានប្រាប់ដល់សារព័ត៌មានភូមា The Irrawaddy ថា «ការបិទទីក្រុងនេះ មានរយៈពេល១សប្ដាហ៍កន្លងមកហើយ។ តម្លៃម្ហូបអាហារ កំពុងតែឡើងថ្លៃខ្ពស់ ហើយអ្នកស្រុក មិនអាចចាកចេញពីក្រុងនេះបាន។ ចំណែកប្រជាជនរស់នៅតំបន់ផ្សេងៗ នៃរដ្ឋរ៉ាឃីន ក៏មិនអាចចេញចូល មកក្នុងទីក្រុងនេះបានដែរ។ ខ្ញុំមិនអាចស្រមើស្រមៃ ថា នឹងមានអ្វីកើតឡើងនោះដែរ ប្រសិនបើស្ថានការណ៍បែបនេះ នៅតែបន្ដ»។
ការបិទទីក្រុង Sittwe ជាមជ្ឈមណ្ឌលពាណិជ្ជកម្ម និង ការដឹកជញជញ្ជូន នៃរដ្ឋរ៉ាឃីន កំពុងតែធ្វើឲ្យជីវិតរស់នៅរបស់អ្នកស្រុក ប្រឈមនឹងការលំបាកខ្លាំង។ ឥឡូវ ប្រជាជនរស់នៅក្នុងរដ្ឋនេះ កំពុងតែប្រឈមនឹងការខ្វះខាតសម្ភារប្រើប្រាស់ រួមទាំង ស្បៀងអាហារ និង ថ្នាំពេទ្យ ខណៈតម្លៃក៏កំពុងតែឡើងថ្លៃខ្លាំងខ្ពស់។
ផ្លូវចូលទៅក្នុងក្រុងស៊ីតត្វេ ត្រូវបានបិទ ដោយប៉ុស្តិ៍ត្រួតពិនិត្យរបស់រដ្ឋាភិបាល នៅជិតចំណតរថយន្តក្រុង ធ្វើដំណើរទៅកាន់ទីឆ្ងាយ ត្រូវគ្រប់គ្រងដោយកងវរសេនាតូចកងអាវុធហត្ថ។ បើប្រភពពីកងទ័ព បានអះអាង ថា សូម្បីតែគ្រូបង្រៀន មកពីក្រុងស៊ីតត្វេ ដែលធ្វើការ នៅសាលាកងទ័ព ក៏មិនត្រូវបានអនុញ្ញាតឲ្យឆ្លងកាត់ប៉ុស្តិ៍ត្រួតពិនិត្យនោះដែរ។
ប្រពន្ធទាហាន នៃរបបសឹក មួយចំនួន រស់នៅក្នុងទីក្រុងសីតត្វេ បានប្រាប់ដល់អ្នកសារព័ត៌មាន ថា «ខ្ញុំឮថា ផ្លូវចូលមកក្នុងទីក្រុងនេះ នៅតែបន្ដបិទដោយប៉េអឹម។ ចំណែកកុមារ នៅតែមិនអាចធ្វើដំណើរ ទៅសាលារៀន អស់រយៈពេល១សប្ដាហ៍កន្លងមកហើយ ដោយសារតែគ្រូបង្រៀនរបស់ពួកគេ មិនអាចធ្វើដំណើរ ឆ្លងការប៉ុស្ដិ៍ត្រួតពិនិត្យទាំងនោះបាន។
ចាប់តាំងពីការវាយប្រយុទ្ធគ្នាជាថ្មី បានផ្ទុះឡើង កាលពីខែសីហា រហូតមក រវាងយោធាមីយ៉ាន់ម៉ា និង កងទ័ពជនជាតិភាគតិចអារ៉ាកាន់ (Rakhine Arakan) នៅរដ្ឋរ៉ាឃីន ហៅកាត់ AA របបសឹក បានបិទផ្លូវទាំងទឹក និង គោក ស្ថិតក្នុងសង្កាត់ប៊ូធីដោង (Buthidaung), មោងដាវ (Maungdaw) និង ក្រុងរ៉ាថេដោង (Rathedaung) ស្ថិតនៅភាគខាងជើងរដ្ឋរ៉ាឃីន (Rakhine) ក៏ដូចជា សង្កាត់ប៉ាឡេត្វា (Paletwa) រដ្ឋឈីន (Chin) ។ របបសឹក បានដាក់បម្រាមលើការផ្គត់ផ្គង់ស៊ីម៉ងត៍ ជី និង ថ្នាំពេទ្យ នៅក្នុងតំបន់នោះ ដោយគ្មានហេតុផល៕
