រាជធានីគួឡាឡាំពួ៖ ដោយសារតែរយៈពេល៤ថ្ងៃ ក្រោយការបោះឆ្នោត មិនមានគណបក្សណាមួយមានអាសនៈ ភាគច្រើនបំផុត តាមច្បាប់របស់ម៉ាឡេស៊ី កំណត់១១២អាសនៈជាសំឡេងភាគច្រើនបំផុត អាចបង្កើតរដ្ឋាភិបាលថ្មីបាន ស្ដេច នៃរាជាណាចក្រអាស៊ានមួយនេះ បានចូលអន្ដរាគមន៍ ចំពោះបញ្ហាជាប់គាំងនេះ។
សារព័ត៌មាន The Straits Times បានចេញផ្សាយ កាលពីព្រឹក ថ្ងៃពុធ ទី២៣ ខែវិច្ឆិកា ថា ព្រះមហាក្សត្រម៉ាឡេស៊ី កំពុងតែប្រកាន់ព្រះរាជតួនាទី នៅកណ្ដាល ខណៈសម្ពន្ធភាពគូប្រជែងព្យាយាមបង្កើតរដ្ឋាភិបាលថ្មី ក្រោយការបោះឆ្នោត កាលពីថ្ងៃសៅរ៍ ត្រូវបានបញ្ចប់ នៅក្នុងការព្យួររដ្ឋសភា។
សម្ពន្ធភាពគណបក្សប្រឆាំង Pakatan Harapan (PH) ដឹកនាំដោយលោក អានវ៉ា អ៊ីប្រាហ៊ីម (Anwar Ibrahim) ទទួលបានឈ្នះអាសនៈ ចំនួន៨០ ប៉ុន្ដែគណបក្សនេះ នៅខ្វះចំនួន៣០អាសនៈ នៅក្នុងសំឡេងភាគច្រើន ចាំបាច់ចំនួន១១២អាសនៈ នៅក្នុងរដ្ឋសភា។ ដោយឡែក សម្ពន្ធភាពគណបក្ស Perikatan Nasional (PN) ក្រោមការដឹកនាំរបស់លោក មូហ៍យីដឌីន យ៉ាសស៊ីន (Muhyiddin Yassin) អតីតនាយករដ្ឋមន្ដ្រីម៉ាឡេស៊ី ទទួលបានអាសនៈចំនួន៧៣។
មេដឹកនាំគណបក្សទាំង២នេះ រួមទាំង លោក Anwar និង លោក Muhyiddin កំពុងតែព្យាយាមស្វះស្វែងរកសំឡេងភាគច្រើន នៅក្នុងរដ្ឋសភា សម្រាប់ការបង្កើតរដ្ឋាភិបាលថ្មី ទើបព្រះមហាក្សត្រម៉ាឡេស៊ី ស៊ូលតង់ អាប់ឌូលឡាហ៍ ស៊ូលតង់ អាហ៍ម៉ាដ សាហ៍ (Sultan Abdullah Sultan Ahmad Shah) សព្វព្រះទ័យកោះហៅមេដឹកនាំទាំង២នេះ មកប្រជុំពិភាក្សាគ្នា ដើម្បីបង្ហាញផ្លូវដល់ការបង្កើតរដ្ឋាភិបាល។
ព្រះមហាក្សត្រម៉ាឡេស៊ី មានព្រះរាជបន្ទូល ទៅកាន់ក្រុមអ្នកសារព័ត៌មាន កាលពីថ្ងៃអង្គារ នៅខាងក្រៅវិមានរដ្ឋាភិបាល ថា «ព្រះអង្គនឹងសម្រេចព្រះទ័យ នៅក្នុងពេលដ៏ឆាប់ៗនេះ។ ជាមួយគ្នានេះ ទ្រង់ក៏ស្នើសុំដល់ប្រជាជាតិម៉ាឡេស៊ី ទាំងអស់ ត្រូវតែទទួលយកនូវការសម្រេចព្រះទ័យណាមួយ ជុំវិញការបង្កើតរដ្ឋាភិបាលថ្មី»។
ចំពេលមានភាពមិនច្បាស់លាស់បែបនេះ ព្រះមហាក្សត្រ បានចេញសេចក្តីថ្លែងការណ៍មួយ កំណត់ថ្ងៃចន្ទ សម្រាប់គណបក្សចម្រុះ ដើម្បីបង្កើតសម្ពន្ធភាពថ្មី ហើយកោះហៅមេដឹកនាំទាំងនោះ ទៅកាន់ព្រះរាជវាំង។ លោក Anwar និង Muhyiddin បានចូលគាល់ព្រះមហាក្សត្រ ដាច់ដោយឡែកពីគ្នា នៅក្នុងព្រះបរមរាជវាំង ខណៈភាពជាក់ស្តែង នៃគណបក្សទាំងពីរ មិនទទួលបានអាសនៈចាំបាច់ចំនួន១១២ សម្រាប់ការបង្កើតរដ្ឋាភិបាល៕